Home ព័ត៌មានជាតិ នយោបាយ ​ក្រសួងការបរទ...

​ក្រសួងការបរទេស​ប្រយុទ្ធ​នៅលើ​សមរភូមិ​ការទូត​តប​ទៅនឹង​ការប៉ុនប៉ង​ជ្រៀត​ជ្រែកចូល​កិច្ចការ​ផ្ទៃក្នុង​

​លោក​អ៊ុច បូរ​រិ​ទ្ធ រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​រដ្ឋលេខាធិការ​ប្រចាំការ នៃ​ក្រសួងការបរទេស​

ដោយៈ មុនី​រ័ត្ន​/ភ្នំពេញៈ លោក​អ៊ុច បូរ​រិ​ទ្ធ រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​រដ្ឋលេខាធិការ​ប្រចាំការ នៃ​ក្រសួង ការបរទេស និង​សហប្រតិបត្តិការ​អន្តរជាតិ​បាន​ថ្លែងថា ក្រសួងការបរទេសបាន​សកម្មប្រយុទ្ធ​តស៊ូ នៅលើ​សមរភូមិ​ការទូត និង​សាធារណៈមតិ តប​ទៅនឹង​ការប៉ុនប៉ង ជ្រៀត​ជ្រែកចូល​កិច្ចការ​ផ្ទៃក្នុង និង​ការវាយប្រហារ​ជា​បន្តបន្ទាប់​មកលើ​ឯករាជ្យ និង​អធិបតេយ្យភាព កម្ពុជា ដោយបាន​ធ្វើការ​ពន្យល់ ចេញ​សេចក្តីថ្លែងការណ៍ និង​ណែនាំ រួមទាំង​តស៊ូ​យ៉ាង​ស្វិតស្វាញ​។ ការ​ថ្លែង​នេះ បាន​ធ្វើឡើង​នៅក្នុង​សន្និបាត​ប្រចាំឆ្នាំ​២០២០ របស់​ក្រសួងការបរទេស​កាល​ពី​ព្រឹក​ថ្ងៃទី​៣០ ខែមករា ឆ្នាំ​២០២០​។​
​ ​ទាក់ទង​បញ្ហា​ខាងលើនេះ លោក​អ៊ុច បូរ​រិ​ទ្ធ បាន​បញ្ជាក់ថា ក្រសួងការបរទេស​បាន​ធ្វើការ​ពន្យល់​បកស្រាយ​ជាច្រើនលើក អំពី​សច្ចភាព និង​លំហ​សេរីភាព​នយោបាយ​នៅ​កម្ពុជា តាមរយៈ​ជំនួប​រវាង​ថ្នាក់ដឹកនាំ​ជាន់ខ្ពស់​កម្ពុជា ជាមួយ​ឥស្សរជន​បរទេស ស្ថាប័ន​អន្តរជាតិ និង​សហគមន៍​ខ្មែរ​នៅ​បរទេស​។ ចេញ​សេចក្តីថ្លែងការណ៍ និង​សេចក្តីប្រកាស​ព័ត៌មាន ទាន់ពេលវេលា បកស្រាយ​បំភ្លឺ និង ឆ្លើយតប​ចំពោះ​ការនិយាយ​បំផ្លើស​សភាពការណ៍​ពិត និង​ការបំពាន​លើ​អធិបតេយ្យ​កម្ពុជា ។ បានធ្វើ​ការណែនាំ និង​ផ្តល់​ឯកសារ​ដល់​គ្រប់​ស្ថានទូត និង​ស្ថាន​តំណាង​កម្ពុជា​នៅ​បរទេស សំរាប់​ជា​មូលដ្ឋាន ក្នុង​ការជួប​ប្រាស្រ័យ​ភ្ញៀវ​បរទេស​។ សកម្ម​តស៊ូ​យ៉ាង​ស្វិតស្វាញ នៅក្នុង​ក្របខ័ណ្ឌ EBA តាមរយៈ​ការបញ្ជូន​គណៈប្រតិភូ​កម្ពុជា​ទៅ​ជួបពិភាក្សា​ជាមួយ​ឥស្សរជន​សំខាន់ៗ​នៃ​គណៈកម្មការ​អឺរ៉ុប និង​ទទួល​ក្រុម​បេសកកម្ម​ស្វែងរក​ការពិត​របស់​សហភាព​អឺរ៉ុប​នៅ​កម្ពុជា សំដៅ​រក្សា​របប​អនុគ្រោះ​ពន្ធ​តាមរយៈ EBA ជូន​ប្រទេសជាតិ ដោយ​ប្រកាន់​ជំហរ​ដាច់ខាត​មិន​ធ្វើការ​ដោះដូរ​ឯករាជ្យ និង​អធិបតេយ្យភាព​របស់​ក​ម្ពុ​ជា ជាមួយនឹង​ជំនួយ​ណាមួយ​ឡើយ​។​
​លោក​អ៊ុច បូរ​រិ​ទ្ធ បាន​បន្តថា ទាក់ទង​ការងារ​ព្រំដែន ក្រសួង​បាន​សហការ​យ៉ាង​ជិតស្និទ្ធ​ជាមួយ​គណៈកម្មាធិការ​ចម្រុះ​ព្រំដែន​កម្ពុជា និង​ប្រទេសជិតខាង ក្នុងការ​ដោះស្រាយ​បញ្ហា​ព្រំដែន​ដែល​នៅ​សេសសល់​ដោយ​សន្តិវិធី និង​ដោយ​ឈរលើ​មូលដ្ឋាន​ច្បាប់​អន្តរជាតិ និង​គោលការណ៍​មិន​កែប្រែ​ខ្សែបន្ទាត់​ព្រំដែន ក្រោយពេល​ទទួលបាន​ឯករាជ្យ​ពី​បារាំង ដើម្បី​ប្រែក្លាយ​តំបន់​ព្រំដែន​ជា​តំបន់​សន្តិភាព មិត្តភាព កិច្ចសហប្រតិបត្តិការ និង​ការអភិវឌ្ឍ​។​
ជាមួយ​ប្រទេស​វៀតណាម ប្រទេស​ទាំងពីរ បាន​ចុះហត្ថលេខា​លើ សន្ធិសញ្ញា​បំពេញបន្ថែម​លើ​សន្ធិសញ្ញា​កំណត់ព្រំដែន​រដ្ឋ​ឆ្នាំ​១៩៨៥ និង​សន្ធិសញ្ញា​បំពេញបន្ថែម​ឆ្នាំ​២០០៥ (​ហៅថា​សន្ធិសញ្ញា​បំពេញបន្ថែម​ឆ្នាំ​២០១៩) និង​ពិធីសារ​ខណ្ឌសីមា និង​បោះបង្គោល​ព្រំដែន​រវាង​ក​ម្ពុ​ជា និង​វៀតណាម ដែល​ទទួលស្គាល់​សមិទ្ធ​ផល​លើ​ការងារ​ខណ្ឌសីមា និង​បោះបង្គោល​ព្រំដែន​នៅ​តំបន់​ដែល​បាន​ឯកភាពគ្នា​លើ​ខ្សែ​ព្រំដែន​ចំនួន ៨៤%​។
​ជាមួយ​ប្រទេស​ថៃ ក្រុមបច្ចេកទេស​ព្រំដែន​កម្ពុជា​-​ថៃ បានធ្វើការ​វាស់វែង និង​រុករក​បង្គោល​ព្រំដែន​បារាំង​-​សៀម បាន ពីរ បង្គោល​បន្ថែមទៀត ដែល​រហូតមក​ដល់ពេលនេះ បាន​រកឃើញ​បង្គោល​សរុប​ទាំងអស់​ចំនួន ៧៣ បង្គោល ដែល​បោះ​ដោយ​បារាំង​-​សៀម​។ ភាគី​ទាំងពីរ ក៏បាន​សម្ពោធ​ឱ្យប្រើ​ប្រាស់​ស្ពាន​ឆ្លង​ព្រំដែន​ស្ទឹង​បត់ (​ខេត្តបន្ទាយមានជ័យ​) – បាន​ណង​អៀន (​ខេត្ត​ស្រះកែវ​) កាលពី​ថ្ងៃទី​២២ ខែមេសា និង​កំពុង​ជំរុញ​ឱ្យ​អាជ្ញាធរ​ពាក់ព័ន្ធ​នៃ​ប្រទេស​ទាំងពីរ​រៀបចំ​សហការ​សម្ពោធ​បើក​ជា​ផ្លូវការ​នូវ​ច្រកទ្វារព្រំដែន​អន្តរជាតិ​ចំនួន​បួន​ទៀត ឱ្យបាន​ឆាប់ ដើម្បី​ពង្រឹង​កិច្ចសហប្រតិបត្តិការ​ពា​ណិ​ជ្ជ​កម្ម និង​ទំនាក់ទំនង​រវាង​ប្រជាជន និង​ប្រជាជន​នៃ​ប្រទេស​ទាំងពីរ​។
​ជាមួយ​ប្រទេស​ឡាវ គឺ​យើង បាន​ច្រានចោល​នូវ​ការទាមទារ​របស់​ភាគី​ឡាវ​ចំពោះ​ការសើរើ​តំបន់​អូ​តា​ង៉ៅ​វ ដែល​ស្ថិតនៅក្នុង​ទឹកដី​ក្រោម​អធិបតេយ្យភាព​របស់​ក​ម្ពុ​ជា ដោយ​ផ្អែកលើ​ផែនទី​ដែល​គណៈកម្មការ​ទទួល​បន្ទុក​កិច្ចការ​ព្រំដែន​ប្រទេស​ទាំងពីរ​បានទទួល​យក​កាលពី​ឆ្នាំ​១៩៩៨​។ ស្របគ្នា​នេះ ភាគី​ទាំងពីរ កំពុង​ចរចា​លើ​សេចក្តីព្រាង​បែបបទ​បច្ចេកទេស (TOR) ស្តីពី​ការស្នើ​អ្នកឯកទេស​បារាំង​ខាង​ផែនទី ដើម្បី​គូស​ចម្លង​ខ្សែ​ព្រំដែន​ពី​ផែន​ទីបោ​ន ខ្នាត ១/១០០.០០០ មកលើ​ផែនទី UTM ខ្នាត ១/៥០.០០០ សម្រាប់​កំណត់​ខ្សែ​ព្រំដែន​ដែល​នៅ​សេសសល់​ចំនួន ១៤​ភាគរយ ទៀត​៕សរន

ទីតាំងផ្សាយពាណិជ្ជកម្ម

- Advertisment -

Most Popular

រោងភាពយន្ត លេ​ជិន ផ្អាក​ប...

​ដោយៈ សុផល / ភ្នំពេញៈ រោង...

ក្រោយ​ការធ្វើ​តេស្ត​ជំងឺ​...

​ដោយ​៖ ទេព មង្គល / ភ្នំពេ...

ថ្នាក់ដឹកនាំ​និង​មន្ត្រី​...

ដោយៈ​ដេប៉ូ​/​ភ្នំពេញៈ​ថ្ន...

ក្រសួង​អប់រំ​ប្រកាស​ផ្អាក...

​ដោយ​:​សុផល​/​ភ្នំពេញៈ​ដើ...