ចាប់ខ្លួន​ជនសង្ស័យ​បួន​នាក់​ក្រោយពី​កាប់​បុរស​ម្នាក់​ស្លាប់​

456
ចែករម្លែក

ដោយ​:​អង្គរតូច​/​សៀមរាប​៖​កម្លាំង​នគរបាល​ខេត្ត​ដឹកនាំ​ដោយ​លោក​ឧ​ត្ត​ម​សេនីយ៍​ត្រី ភឹង ច​ន្តា​រ៉េត ស្នងការ​ង​កាលពី​ថ្ងៃទី​៣១​ខែមករា​បាន​ចាប់​ឃាត់ខ្លួន​ជនសង្ស័យ​ចំនួន​៤​នាក់​ក្រោយពី​កាប់​បុរស​ម្នាក់​ស្លាប់​។​ជនសង្ស័យ​ដែល​ចាប់ខ្លួន​ទី​១​ឈ្មោះ​វ៉ន​វ៉ែន​ភេទ​ប្រុស​អាយុ​២១​ឆ្នាំ​មុខរបរ​ជាងភ្លើង​បច្ចុប្បន្ន​ស្នាក់នៅ​បន្ទប់​ជួល ភូមិ​មណ្ឌល​៣ សង្កាត់​ស្លក្រាម​។​

​ទី​២​ឈ្មោះ​គង់​សូរិយា​ហៅ​យ៉ា​ឬ​ទើ​យ​ភេទ​ប្រុស​អាយុ​១៩​ឆ្នាំ​បច្ចុប្បន្ន​នៅ​ភូមិ​វាល​សង្កាត់​សំបួរ​។​ទី​៣​ឈ្មោះ​ងួន​ធារ៉ា​ហៅ​ហល់​ភេទ​ប្រុស​អាយុ​១៨​ឆ្នាំ​មុខរបរ​មិន​ពិតប្រាកដ​បច្ចុប្បន្ន​ស្នាក់នៅ​បន្ទប់​ជួល​ភូមិ​សាលាកន្សែង​សង្កាត់​ស្វាយដង្គំ​។​ទី​៤​ឈ្មោះ​លុន​ចំរើន​រិ​ទ្ធ​ហៅ​វិត​ភេទ​ប្រុស​អាយុ​១៨​ឆ្នាំ​មុខរបរ​មិន​ពិតប្រាកដ​បច្ចុប្បន្ន​ស្នាក់នៅ​បន្ទប់​ជួល ភូមិ​ភ្ញា​ជ័យ សង្កាត់​ស្វាយដង្គំ​។

​លោក​ឧ​ត្ត​ម​សេនីយ៍​ត្រី ភឹង ចិន្តា​រ៉េត បាន​បញ្ជាក់ថា​កាលពី​ថ្ងៃទី​២៦ ខែមករា ឆ្នាំ​២០២០ វេលា​ម៉ោង ១២​និង​៣០​នាទី​រំលង​អា​ធ្រា​ត្រ​ជនរងគ្រោះ​ឈ្មោះ​ហេង​វិ​ឆាយ​ភេទ​ប្រុស​អាយុ​២០​ឆ្នាំ​មុខរបរ​កម្មករ​ទិញ​-​លក់​អេតចាយ មាន​ទីលំនៅ​បច្ចុប្បន្ន នៅ​ភូមិ​ក្រសាំង សង្កាត់​ជ្រាវ និង​បក្ខពួក​ចំនួន​៣​នាក់​ទៀត បាននាំគ្នា​ចូលទៅ​ផឹកស៊ី​និង​រាំលេង​នៅក្នុង​ក្លិប​ឈ្មោះ​(​កាឡាក់ស៊ី​)​ដែលមាន​ទីតាំង​ស្ថិតនៅ​ភូមិ​សាលាកន្សែង​សង្កាត់​ស្វាយដង្គំ​។​

​ពេលដែល​ចូល​រាំ​លែង​ក្នុង​ក្លិប​ក៏មាន​ការឈ្លោះប្រកែក​គ្នា​ជាមួយនឹង​បក្ខពួក​ក្រុមក្មេងស្ទាវ​ម្ខាង​ទៀត ដែល​គេ​ពុំ​ធ្លាប់​ស្គាល់​ហើយ​មានការ​វាយតប់​គ្នា​ទៅវិញទៅមក​។​ក្នុងការ​វ៉ៃតប់​នោះ​មិន​បណ្ដាលឱ្យ​អ្នក​ណាមួយ​រងរបួស​នោះទេ​។​លុះ​វេលា​ម៉ោង​២​នឹង​៣០​នាទី​រំលង​អា​ធ្រា​ត្រ ថ្ងៃទី​៣១ ខែមករា ឆ្នាំ​២០២០ ជនរងគ្រោះ​ឈ្មោះ​ហេង​វិ​ឆាយ​និង​បក្ខពួក​របស់គេ​បាននាំគ្នា​ចេញពី​ក្លិប​ជិះ​ម៉ូតូ​បំណង​ទៅផ្ទះ​។​

​ពេល​ជិះ​ដល់​ចំណុច​ខាងក្រោយ​សណ្ឋាគារ​សូ​ហ្វី​តែ​ល​ស្ថិតនៅ​ភូមិ​សាលាកន្សែង​សង្កាត់​ស្វាយដង្គំ ក៏មាន​មនុស្ស​មួយក្រុម​មាន​គ្នា​ជាច្រើន​នាក់​និង​ម៉ូតូ​ប្រហែល​៦​គ្រឿង​បាន​ប្រើ​កាំបិត​ខ្វែវ​កាប់​ទៅលើ​ជនរងគ្រោះ​ឈ្មោះ​ហេង​វិ​ឆាយ​ត្រូវ​ចំក្បាល​ខាងស្ដាំ​បណ្ដាលឱ្យ​មុត​រយៈ​ប្រវែង​១៥​សង់ទីម៉ែត្រ​។​ភ្លាមៗ​នោះ​ពួកគេ​ជិះ​ម៉ូតូ​គេចខ្លួន​បាត់អស់​។​

ចំណែក​ជនរងគ្រោះ​ក៏បាន​ស្លាប់​ក្រោយពី​បញ្ជូនទៅ​សង្គ្រោះ​នៅ​មន្ទីរពេទ្យ​បង្អែ​ខេត្ត​។
​លោក​បន្តថា​បន្ទាប់មក​សមត្ថកិច្ច​បាន​ស៊ើបអង្កេត​ស្រាវជ្រាវ​ហើយ​កំណត់​មុខសញ្ញា​ទើប​នាំខ្លួន​ជនសង្ស័យ​ចំនួន​៤​នាក់​ខាងលើ​មក​សាកសួរ​។ ក្រោយពី​សាកសួរ​ជន​ទាំង​៤​នាក់ ឆ្លើយ​សារភាពថា​ពួកគេ ពិតជា​បានធ្វើ​សកម្មភាព​ជិះ​ម៉ូតូ​ដេញ​កាប់​ទៅលើ​ជនរងគ្រោះ​ខាងលើ​ពិតប្រាកដ​មែន​។​ក្នុងនោះ​គឺមាន​បក្ខពួក​ចំនួន​ពីរ​នាក់​ទៀត​បាន​ចូលរួម​ធ្វើ​សកម្មភាព​កាប់​ជាមួយ​ដែរ​។

​ដោយ​ទី​១​ឈ្មោះ​ចិន​ភេទ​ប្រុស​អាយុ​ប្រហែល​១៨​ឆ្នាំមាន​ទីលំនៅ​បច្ចុប្បន្ន​ភូមិ​វាល​សង្កាត់​គោកចក​។​ទី​២​ឈ្មោះ​សិទ្ធិ​ភេទ​ប្រុស​អាយុ​ប្រហែល​១៨​ឆ្នាំ​មិន​ស្គាល់​ទីលំនៅ​។​ឈ្មោះ​ចិន​ជា​អ្នកធ្វើ​សកម្មភាព​កាប់​ទៅលើ​ជនរងគ្រោះ​ផ្ទាល់​។​ពេលនេះ​ឈ្មោះ​ចិន​និង​ឈ្មោះ​សិទ្ធិ​បាន​រត់​គេចខ្លួនបាត់​មិនដឹង​ទៅ​ទីណា​នោះទេ​។​

លោកស្នងការ​ង​ឱ្យដឹងទៀតថា ជាមួយ​ការនាំ​ខ្លួន​ជនសង្ស័យ​ខាងលើ សមត្ថកិច្ច​បាន​ចាប់យក កាំបិត​ខ្វែវ​ចំនួន​១​ដើម​ពីក្នុងផ្ទះ​របស់​ឈ្មោះ​ចិន​គឺជា​កាំបិត​ខ្វែវ​ដែល​ជនសង្ស័យ​ធ្វើ​សកម្មភាព​កាប់​ទៅលើ​ជនរងគ្រោះ​។​បច្ចុប្បន្ន ជនសង្ស័យ​ត្រូវបាន​សមត្ថកិច្ច​ឃាត់ខ្លួន និង​កំពុង​កសាង​សំណុំរឿង ដើម្បី​បញ្ជូនទៅ​តុលាការ​៕S/​

ទីតាំងផ្សាយពាណិជ្ជកម្ម