Home ព័ត៌មានជាតិ នយោបាយ អនុប្រធាន​ទី​...

អនុប្រធាន​ទី​២​រដ្ឋសភា​ដឹកនាំ​គណៈប្រតិភូ​អញ្ជើញ​ចូលរួម​“​កិច្ចប្រជុំ​កំពូល​ពិភពលោក​ឆ្នាំ​២០២០​នៅ​កូរ៉េ​

ដោយៈ​សុផល​/​ភ្នំពេញៈ​គណៈប្រតិភូ​ជាន់ខ្ពស់​រដ្ឋសភា​នៃ​ព្រះរាជាណាចក្រ​កម្ពុជា​និង​ក្រុមប្រឹក្សា​វប្បធម៌​អាស៊ី​(ACC)​ដឹកនាំ​ដោយ​លោកស្រី​កិត្តិ​សង្គហ​បណ្ឌិត​ឃួន​សុ​ដារ​អនុប្រធាន​ទី​២​នៃ​រដ្ឋសភា​និង​ជា​ប្រធាន​ក្រុមប្រឹក្សា​វប្បធម៌​អាស៊ី​(ACC)​បាន​អញ្ជើញ​ចូលរួម​ជា​អធិបតី​ក្នុង​“​កិច្ចប្រជុំ​កំពូល​ពិភពលោក​ឆ្នាំ​២០២០-​សេ​អ៊ូ​ល នៃ​សហព័ន្ធ​សន្តិភាព​សកល UPF” ចាប់ពី​ថ្ងៃទី​២ ដល់​ថ្ងៃទី​៩ ខែកុម្ភៈ ឆ្នាំ​២០២០ នៅ​ទីក្រុង​សេ​អ៊ូ​ល​នៃ​សាធារណរដ្ឋ​កូរ៉េ​ក្រោម​ប្រធានបទ​“​សន្តិភាព​សន្តិសុខ​និង​ការអភិវឌ្ឍ​ធនធានមនុស្ស​”​។​
​ការអញ្ជើញ​ចូលរួម​របស់​គណៈប្រតិភូ​ជាន់ខ្ពស់​រដ្ឋសភា​នៃ​ព្រះរាជាណាចក្រ​កម្ពុជា​និង​ក្រុមប្រឹក្សា​វប្បធម៌​អាស៊ី​នាពេលនេះ ធ្វើឡើង​តប​តាម​ការអញ្ជើញ​របស់ លោក​បណ្ឌិត ថូ​ម៉ាស ជី​. វ៉ែល (Thomas G. Walsh) ប្រធាន នៃ​សហព័ន្ធ​សន្តិភាព​សកល​។​នៅក្នុង​ព្រឹ​តិ្ត​ការណ៍​នេះ លោកស្រី កិត្តិ​សង្គហ​បណ្ឌិត ឃួន​សុ​ដា​រី​បាន​ចូលរួម​ថ្លែង​សុន្ទរកថា​ក្នុង​សន្និបាត​ពិភពលោក​នៃ​សមាគម​អន្តរជាតិ​នៃ​សមាជិកសភា​សម្រាប់​សន្តិ​ភាព​(IAPP) ស្តីពី​តួនាទី​ដ៏​សំខាន់​របស់​សភា​ក្នុងការ​ចូលរួម​ថែរក្សា ការពារ សន្តិភាព និង​ស​និ្ត​សុខ​។

ដោយ​ធ្វើការ​ចែករំលែក និង​ផ្លាស់ប្តូរ​នូវ​ទស្សនៈវិស័យ ពាក់ព័ន្ធ​នឹង​បញ្ហា​នានា​ដូចជា បញ្ហា​ហិង្សា​ជ្រុលនិយម​អំពើ​ភេ​វរ​កម្ម​ការប្រែប្រួល​អាកាសធាតុ​គ្រោះមហន្តរាយ​អន្តរជាតិ​និង​ការកើនឡើង​វិសមភាព​ដែល​បង្ក​ការគំរាមកំហែង​យ៉ាងខ្លាំង​ដល់​សន្តិសុខ​មនុស្ស​និង​សុខុមាលភាព​សង្គម​ក្នុង​ពិភពលោក​នាពេល​បច្ចុប្បន្ន​។​

​ក្នុងកំឡុងពេល​នេះដែរ​លោកស្រី​កិត្តិ​សង្គហ​បណ្ឌិត​ឃួន​សុ​ដា​រី​ក៏​គ្រោង​នឹង​ជួប​សំណេះសំណាល​និង​ពិភាក្សា​លើ​ការពង្រឹង​កិច្ចសហប្រតិបត្តិការ​ទ្វេភាគី​ជាមួយ​បណ្តា​ប្រតិភូ​តំណាង​មកពី​ស្ថាប័ន​ជាច្រើន​ចូលរួម​ក្នុង​ព្រឹត្តិការណ៍​នេះ​ដែលជា​សមាជិកសមាគម​អន្តរជាតិ​នៃ​សមាជិកសភា​សម្រាប់​សន្តិ​ភាព​(IAPP)​។​

“​កិច្ចប្រជុំ​កំពូល​ពិភពលោក​២០២០-​សេ​អ៊ូ​ល​” គឺជា​វេទិកា​អន្តរជាតិ ដែល​បង្កើតឱ្យមាន​ការ​ពិភាក្សា ការផ្លាស់ប្តូរ​បទពិសោធ​ន៍ ការចែករំលែក​គតិបណ្ឌិត និង​ការយល់ឃើញ​របស់​ថ្នាក់ដឹកនាំ​ផ្សេងៗ មេដឹកនាំ​សាសនា​ធុរៈជន​និង​តំណាង​សង្គម​ស៊ីវិល​ក្នុង​គោលបំណង​ចូលរួម​កសាង​ពិភពលោក​មួយ​ប្រកបដោយ​ការ​អធ្យាស្រ័យ​គ្នា​ទៅវិញទៅមក​សន្តិភាព​ប្រកបដោយ​និរន្ត​ភាព​និង​វិបុលភាព​សម្រាប់​មនុស្ស​ទាំង​អស់​។​

ពិសេស​ជាងនេះទៅទៀត​សម្តេច​អគ្គមហាសេនាបតី​តេ​ជោ​ហ៊ុនសែន​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​និង​ជា​ប្រធាន​ស្ថាបនិក​កិត្តិយស​នៃ​ក្រុមប្រឹក្សា​អាស៊ី​ត្រូវ​បានផ្តល់​កិត្តិយស​ជា​ប្រមុខ​ថ្នាក់ដឹកនាំ​ដ៏​សំខាន់​ដើម្បី​អញ្ជើញ​ថ្លែង​សុន្ទរកថា​គន្លឹះ​ទៅកាន់​អ្នកចូលរួម​រាប់ពាន់នាក់​មកពី​គ្រប់ទិសទី​ក្នុង​ពិភពលោក​អំពី​បទពិសោធ​ន៍​របស់​ប្រទេស​កម្ពុជា​ក្នុង​ដំណើរ​ការកសាង​សន្តិភាព​និង​ប្រទេសជាតិ​តាមរយៈ​«​គោលនយោបាយ​ឈ្នះ​-​ឈ្នះ​»​ដែល​ធ្វើឱ្យ​កម្ពុជា​អាច​បញ្ចប់​ការតស៊ូ​ប្រដាប់អាវុធ​ហើយ​ទទួលបាន​សន្តិភាព​និង​ការបង្រួបបង្រួម​ជាតិ​ពេញលេញ​នៅ​ចុង​ទសវត្ស​ឆ្នាំ​១៩៩០​។​

​គួរបញ្ជាក់​ផងដែរ​ថា សហព័ន្ធ​សន្តិភាព​សកល​(UPF) គឺជា​អ្នករៀបចំ​ដ៏​សំខាន់​នៃ​កិច្ចប្រជុំ​កំពូល​នេះ ហើយ​ដែលមាន​ឋានៈ​ជា​អ្នកពិគ្រោះ​យោបល់​ទូទៅ​ជាមួយ​ក្រុមប្រឹក្សា​សេដ្ឋកិច្ច​និង​សង្គម​របស់​អង្គការសហប្រជាជាតិ​(ECOSOC) ។​

គួរ​រំលឹក​ផងដែរ​ថាស​ម្តេច​អគ្គមហាសេនាបតី​តេ​ជោ​ហ៊ុនសែន​នាយករដ្ឋមន្ត្រី​នៃ​ព្រះរាជា​-​ណា​ចក្រ​កម្ពុជា​ធ្លាប់​ត្រូវបាន​អញ្ជើញ​ទៅ​ចូលរួម​ជា​អធិបតី​ក្នុង​កិច្ចប្រជុំ​កំពូល​អាស៊ី​ប៉ាស៊ីហ្វិក​លើក​ទី​១​ដែលជា​កិច្ចប្រជុំ​ដ៏​សំខាន់​មួយ ចំណុះឱ្យ​កិច្ចប្រជុំ​កំពូល នៅ​ប្រទេស​នេ​ប៉ាល់ កាលពី​ឆ្នាំ​២០១៨ ហើយ​បន្ទាប់មក ព្រះរាជាណាចក្រ​កម្ពុ​ជាមាន​កិត្តិយស​និង​មោទនភាព​ក្រៃលែង​ដោយបាន​ប្រារព្ធ​កិច្ចប្រជុំ​កំពូល​អាស៊ី​ប៉ាស៊ីហ្វិក​លើក​ទី​២ នៅ​រាជធានី​ភ្នំពេញ កាលពី​ថ្ងៃទី​១៨-២១ ខែវិច្ឆិកា ឆ្នាំ​២០១៩​។​

​កិច្ចប្រជុំ​កំពូល​ពិភពលោក​ឆ្នាំ​២០២០​នេះ មានការ​រំពឹងទុក​ថា នឹងមាន​ការចូលរួម​ពី​ប្រមុខរដ្ឋ ប្រមុខ រដ្ឋាភិបាល​ប្រធានសភា​ភ្ញៀវ​អន្តរជាតិ​មកពី​គ្រប់ទិសទី​នៅលើ​ពិភពលោក​ដែល​នឹង​រួមគ្នា​ផ្តល់នូវ​វិភាគទាន​ជា​វិជ្ជមាន​ក្នុងការ​សម្រេច​គោលដៅ​អភិវឌ្ឍន៍​ប្រកបដោយ​ចីរភាព​របស់​អង្គការសហប្រជាជាតិ និង​ដើម្បី​កសាង​ពិភពលោក​សន្តិភាព​យូរអង្វែង​សម្រាប់​គ្រួសារ​មនុស្សជាតិ​ទាំងមូល​៕S/​

ទីតាំងផ្សាយពាណិជ្ជកម្ម

- Advertisment -

Most Popular

អភិបាលក្រុង​ស៊ូ​វ៉ុ​ន កូរ...

​ដោយៈ រ៉ា​ម៉ន / ភ្នំពេញៈ ...

រដ្ឋមន្ត្រីក្រសួង​រ៉ែ និង...

​ដោយៈ រិ​ទ្ធិ​សែន / ពោធិស...

កងទ័ពជើងទឹក បាន​ដឹកបញ្ជូន...

ដោយៈ វណ្ណៈ / ព្រះសីហនុៈ ក...

រដ្ឋបាល​ខេត្តសៀមរាប​ចែក​ម...

ដោយ​: គូលែន / សៀមរាប​: នៅ...