ចិត្តថ្លើម​អ្នក​ភ្នំពេញ គឺ​សូមមេត្តា ប្រមូល​សំរាម ឱ្យ​ស្រួល​ដូច​ប្រមូល​លុយ​ផង

508
ចែករម្លែក

​កាលពី​ព្រឹក​ថ្ងៃទី​១ ខែកុម្ភៈ ឆ្នាំ​២០២០ អាជ្ញាធរ​រាជធានី​ភ្នំពេញ បានធ្វើ​សន្និសីទ កាសែត​ជុំវិញការគ្រប់គ្រង​សំរាម និង​ការប្រមូល​ថ្លៃ​សំរាម ដើម្បី​ពន្យល់​ដល់​ប្រជាពល រដ្ឋ​រស់នៅក្នុង​រាជធានី ភ្នំពេញ ឲ្យ​បាន​យល់ដឹង​បន្ថែម ពាក់ព័ន្ធ​នឹង​ការគ្រប់គ្រង​សំរាម និង​ការប្រមូល​ថ្លៃ​សំរាម នៅ​រាជធានី​ភ្នំពេញ​។​

​លោក ហួត ហៃ អភិបាលរង​រាជធានី​ភ្នំពេញ បាន​បញ្ជាក់ថា ចាប់ពី​ថ្ងៃទី​១ ដល់​ថ្ងៃទី​១៥ ខែកុម្ភៈ ឆ្នាំ​២០២០ គឺជា​ពេលវេលា ដែល​ប្រជាពលរដ្ឋ រស់នៅក្នុង​រាជធានី​ភ្នំពេញ​ទាំងអស់ ត្រូវ​ទៅ​បង់ ថ្លៃ​សេវា​ប្រមូល​សំរាម សម្រាប់​ខែមករា ឆ្នាំ​២០២០​។ ការបង់ថ្លៃ​សេវា​ប្រមូល​សំរាម និង​សំណល់ រឹង នៅក្នុង​រាជធានី​ភ្នំពេញ មិន​ត្រូវបាន​ភ្ជាប់​គ្នា ជាមួយ​វិក្កយបត្រ​អគ្គិសនី​ទៀត​នោះទេ ពោល គឺ​ត្រូវ​ទូទាត់ តាម​មធ្យោបាយ​ប្រព័ន្ធ​ទូទាត់​អេឡិចត្រូនិក តាម​ទូរស័ព្ទដៃ ឬ​បញ្ជរ​ទូទាត់​នៅ ធនាគារ​ដៃគូ​សហការ​មួយចំនួន ដើម្បី​បង្កលក្ខណៈ​ងាយស្រួល​ដល់​ប្រជាពលរដ្ឋ​ដែល ចំណេញ​ពេលវេលា និង​កាត់បន្ថយ​ចំណាយ​។​
​ ​
ប្រព័ន្ធ​ទូទាត់​អេឡិចត្រូនិក ក្នុងការ​បង់ថ្លៃ​សេវា​ប្រមូល​សំរាម និង​សំណល់​រឹង នៅក្នុង​រាជធានីភ្នំពេញ រួមមាន ធនាគារ​អេស៊ីលីដា ធនាគារ​ឯកទេស​វី​ង អ៊ី​-​ម៉ាន់​នី លី​ហួរ​វេរ​លុយ ផៃ​ផេ ទ្រូ​ម៉ាន់​នី និង​ដា​រ៉ា​ផេ ដោយ​ក្នុង​មួយ​ប្រ​ត្តិ​ប​ត្តិ​ការ ចំណាយ​ថ្លៃ​សេវា​ចាប់ពី ៥០០​រៀល ទៅ​៨០០ រៀល​តែប៉ុណ្ណោះ ទៅតាម​ទំហំ​ទឹកប្រាក់​នៃ​ការបង់​ទូទាត់ ប៉ុន្តែ​ប្រជាពលរដ្ឋ​ក៏​អាច​បង់​ជាប្រចាំ ឆ្នាំ​ក៏បាន ដោយមាន​ភាព​ចំណេញ​ច្រើន គឺ​អស់ថ្លៃ​សេវា​តែមួយ​ប្រតិបត្តិ​ការទូទាត់​ប៉ុណ្ណោះ​។​

​សម្រាប់​ការបង់ថ្លៃ​សេវា​ប្រមូល​សំរាម ប្រជាពលរដ្ឋ ត្រូវ​បង់ថ្លៃ ចាប់ពី​ថ្ងៃទី​១ ដល់​ថ្ងៃទី​១៥ នៃ​ខែ​បន្ទាប់ ហើយ​ក្នុងករណី​ខកខាន​មិនបាន​បង់​ទូទាត់ ក្រោយ​រយៈពេល ១៥​ថ្ងៃ នៃ​ដំណាច់ ខែ​នីមួយៗ នឹងត្រូវ​ចាត់ទុកជា​បំណុល ដែលជា​កម្មវត្ថុ​នៃ​ការផាកពិន័យ​ប្រាក់ ទៅតាម​ច្បាប់​។​

​ចំពោះ​តម្លៃ​សេវា​ប្រមូល​សំរាម និង​សំណល់​រឹង ដែល​ប្រជាពលរដ្ឋ ត្រូវ​បង់​នៅពេលនេះ​ផ្អែក តាម​ថ្លៃ​សេវា ដែល​ប​បាន​បង់​កាលពី​ខែតុលា ឆ្នាំ​២០១៩ ដោយ​គ្រាន់តែ​វាយ​បញ្ចូល​លេខ សំគាល់​អតិថិជន ( ID ) ដែលមាន​នៅក្នុង​វិក្កយបត្រ​អគ្គិសនី​។ ពោលគឺ​អាជ្ញាធរ​រាជធានី​ភ្នំពេញ មិនមាន​ចេញ​វិក្កយបត្រ​ថ្មី ថ្លៃ​សំរាម ជូន​ដល់​ប្រជាពលរដ្ឋ​តាម​ផ្ទះ​នោះទេ​។​

​គួរ​បញ្ជាក់ថា ក្នុងអំឡុងពេល​អន្តរ​កាល គិត​ចាប់ពី​ថ្ងៃទី​១ ខែមករា ឆ្នាំ​២០២០ រហូត​ដល់ពេល បង្កើតបាន និង​ដាក់ឱ្យ​ដំណើរការ​ពេញលេញ​នូវ​ប្រព័ន្ធគ្រប់គ្រង​សំរាម និង​សំណល់​រឹង​ថ្មី ក្នុងពេល​ឆាប់ៗ​ខាងមុខ រាជរដ្ឋាភិបាល អនុញ្ញាតឱ្យ​ក្រុមហ៊ុន​ស៊ីន​ទ្រី​មាន​សិទ្ធិ​បន្ត​ប្រតិបត្តិការ សម្អាត ប្រមូល និង​ដឹកជញ្ជូន​សំរាម និង​សំណល់​រឹង ជា​បណ្តោះអាសន្ន នៅក្នុង​រាជធានី ភ្នំពេញ​។ ប៉ុន្តែ​ស៊ីន​ទ្រី មិនមាន​សិទ្ធិ​ក្នុងការ​ប្រមូល​ថ្លៃ​សេវា សម្អាត ប្រមូល និង​ដឹកជញ្ជូន​សំរាម និង​សំណល់​រឹង​តទៅទៀត​ទេ​។ ក្នុងនោះ វិក្កយបត្រ​ថ្លៃ​សេវា​សំរាម​ក៏ត្រូវ​បាន​ដក​ចេញពី​វិក្ក​យ ប​ត្រ​ភ្លើងអគ្គិសនី ចាប់តាំងពី​ថ្ងៃទី​០១ ខែមករា ឆ្នាំ​២០២០ ផងដែរ​។​
​ ​
​យ៉ាងណា​ក៏ដោយចុះ នៅពេលនេះ អ្នករស់នៅ​ភ្នំពេញ បានដឹង​កាន់តែច្បាស់​ហើយពី​វិធី​នៃ ការបង់​លុយ​ថ្លៃ​សំរាម ដែល​កាន់​ប្រើប្រាស់​តាម​ប្រព័ន្ធ​អេឡិចត្រូនិក ឬក៏​ទៅ​បង់លុយ​តាម​វី​ង អ៊ី​ម៉ាន់​នី លី​ហួរ និង​ជា​ទ្រូ​ម៉ា​នី ដែលមាន​បើក​យ៉ាងច្រើន តាម​គ្រប់​ផ្លូវ​តូច ផ្លូវធំ នៅ​ជិត​ផ្ទះ​។​

​ទន្ទឹមនឹង​ការបង្កើត​មធ្យោបាយ​បង់លុយ កាន់តែ​ងាយស្រួល​នេះ ប្រជាពលរដ្ឋ​រស់នៅ​ភ្នំពេញ ក៏បាន​សំណូមពរ​ដ៏​ទទូច​ជូន​អាជ្ញាធរ​រាជធានី​ភ្នំពេញ សូមមេត្តា​គិតគូរ និង​ដាក់ចេញ​នូវ​យន្តការ ប្រមូល​សំរាម តាម​មុខផ្ទះ​ប្រជាពលរដ្ឋ ឲ្យ​បាន​ឆាប់រហ័ស ដូច​វិធី​ប្រមូល​លុយ​នេះ​ផង​។​

​គេ​នៅ​ចាំបាន​ថា កាលពី​ថ្ងៃទី​២២ ខែតុលា ឆ្នាំ​២០១៩ សម្តេច​តេ​ជោ នាយករដ្ឋមន្ត្រី ហ៊ុន សែន បានប្រកាស​ដកសិទ្ធិ​ប្រមូល និង​គ្រប់គ្រង​សំរាម​នៅ​រាជធានី​ភ្នំពេញ ពី​ក្រុមហ៊ុន​ស៊ីន​ទ្រី​ដោយ សារ​តែ​ក្រុម​ហ៊ុ​នេះ មិនមាន​លទ្ធភាព​គ្រប់គ្រាន់ ក្នុងការ​ប្រមូល ដឹកជញ្ជូន​សំរាម នៅ​ភ្នំពេញ ព្រោះតែ​ភ្នំពេញ កាន់តែ​ធំ ហើយ​សំរាម​ក៏​កាន់តែច្រើន នាពេលនេះ​។​

​សម្តេច​តេ​ជោ ហ៊ុន សែន ក៏បាន​ប្រកាស​ឲ្យ​រដ្ឋមន្ត្រីក្រសួង​សេដ្ឋកិច្ច ហិរញ្ញវត្ថុ​សហការ​ជាមួយ អាជ្ញាធរ​រាជធានី​ភ្នំពេញ រៀប​ចំបែង​ចែកជា ៤​តំបន់ នៅក្នុង​រាជធានី​ភ្នំពេញ ហើយ​ស្វែងរក ក្រុមហ៊ុន​ឯកជន​យ៉ាងតិច​បួន ឲ្យ​ចូលរួម​ដេញថ្លៃ ក្នុងការ​ប្រមូល ដឹកជញ្ជូន​សំរាម​ដោយ​ក្នុង ក្រុមហ៊ុន​មួយ មាន​សិទ្ធិ ទទួល​យកតែ ១​តំបន់​ប៉ុណ្ណោះ ក្នុងការ​សំអាត​សំរាម នៅ​ភ្នំពេញ​។​

​ក៏ប៉ុន្តែ​ចាប់តាំងពី​ខែតុលា ឆ្នាំ​២០១៩ មកដល់​ខែកុម្ភៈ ឆ្នាំ​២០២០ ពោលគឺ ៣​ខែ​មកនេះ វិធានការ​ក្នុងការ​ដោះស្រាយ​បញ្ហា​សំរាម បានត្រឹមតែ​ការដក​ចេញថ្លៃ​សំរាម​ចេញពី​វិក្កយបត្រ ភ្លើងអគ្គិសនី ដែល​បាន​អនុវត្ត ចាប់ពី​ថ្ងៃទី​០១ ខែមករា ឆ្នាំ​២០២០ ហើយ​នៅ​ថ្ងៃទី​០១ ខែកុម្ភៈ ឆ្នាំ​២០២០ គឺ​អាជ្ញាធរ​រាជធានី​ភ្នំពេញ បានប្រកាស​ចេញពី​វិធី​បង់លុយ​ថ្លៃ​សំរាម​។​

​ដូច្នេះ​ដើម្បី​ឲ្យ​ប្រជាពលរដ្ឋ​អ្នករស់នៅ​ភ្នំពេញ បាន​ស្ងប់ចិត្ត សូម​ឲ្យ​អាជ្ញាធរ​រាជធានី​ភ្នំពេញ និង​ក្រសួង​សេដ្ឋកិច្ច ហិរញ្ញវត្ថុ រៀបចំ​ឲ្យ​បាន​ឆាប់រហ័ស​នូវ​យន្តការ​ដឹកជញ្ជូន​សំរាម​ឲ្យ​បាន ទៀងទាត់ ព្រោះថា សព្វថ្ងៃ វិបត្តិ​សំរាម នៅ​បន្ត​កើតមាន ដោយ​សំរាម នៅ​គរ​មុខផ្ទះ និង​នៅ តាមផ្លូវ​នានា បង្កើត​ក្លិនស្អុយ​ដូច​សម័យកាល​ស៊ីន​ទ្រី​ដដែល​។ ជា​សំណូមពរ សូម​អាជ្ញាធរ សមត្ថកិច្ច ចាត់វិធានការ ឲ្យ​បាន​ឆាប់ៗ ស្របតាម​អនុសាសន៍​របស់​សម្តេច​តេ​ជោ ព្រោះថា ៣​ហើយ សំរាម​នៅតែ​ចោទ​ជា​បញ្ហា ខណៈដែល​បុគ្គលិក​ស៊ីន​ទ្រី​មួយចំនួន ក៏ត្រូវ​បាន​កាត់ រំសាយ បង្ក​ជាការ​តវ៉ា​ថែមទៀត​នោះ​៕ ដោយៈ ម៉េង​ឆៃ​