ព្រឹកនេះសម្តេចហ៊ុន សែនបាន​អញ្ជើ​ញទៅចូលរួមកិច្ចប្រជុំ​កំពូល​ពិភពលោកឆ្នាំ២០២០ នៃអង្គការ​សហព័ន្ធសន្តិភាព​សកល (UPF) ​ស្តីពីសន្តិភាព សន្តិសុខ និងការ​អភិវឌ្ឍមនុស្ស នៅសាធារណរដ្ឋកូរ៉េ​

ដោយ:តារារិទ្ធ/ភ្នំពេញ ៖ នៅវេលាម៉ោង ៨:៣០នាទីព្រឹកថ្ងៃទី ៣ ខែ កុម្ភៈ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជាបានអញ្ជើញដឹកនាំគណៈប្រតិភូកម្ពុជាទៅចូលរួមកិច្ចប្រជុំ​កំពូលពិភពលោកឆ្នាំ២០២០ នៃអង្គការសហព័ន្ធសន្តិភាពសកល (UPF) ស្តីពីសន្តិភាព សន្តិសុខ និងការអភិវឌ្ឍមនុស្ស ដែលរៀបចំឡើងនៅ​សាធារណរដ្ឋកូរ៉េ (កូរ៉េខាងត្បូង) រយៈពេល៣ថ្ងៃ ចាប់ពីថ្ងៃទី០៣ ដល់ថ្ងៃទី០៥ ខែកុម្ភៈ ឆ្នាំ២០២០។

តាមរយៈ Facebook ផ្លូវការរបស់នាយករដ្ឋមន្រ្ តីសម្តេចបានថ្លែងចាត់ទុក​ដំណើរ​ទស្សនកិច្ចនេះថាជាទស្សនកិច្ចដើម្បីពង្រឹង និងពង្រីកកិច្ច​សហប្រតិបត្តិការទ្វេភាគីកម្ពុជា-កូរ៉េ ឲ្យកាន់តែល្អប្រសើរឡើង។

សម្តេចតេជោ ហ៊ុន សែន បានសរសេរក្នុង Facebookថា «សុខសប្បាយ​ជាទេបងប្អូនជនរួមជាតិ? នៅព្រឹកថ្ងៃទី ៣ កុម្ភៈ នេះ ខ្ញុំនឹងដឹកនាំគណៈប្រតិភូ​ជាន់ខ្ពស់កម្ពុជា ទៅចូលរួមកិច្ចប្រជុំកំពូលនៃអង្គការសហព័ន្ធសន្តិភាពសកល (UPF) ស្តីពីសន្តិភាព សន្តិសុខ និងការអភិវឌ្ឍមនុស្ស ដែលរៀបចំឡើងនៅ​សាធារណរដ្ឋកូរ៉េ (កូរ៉េខាងត្បូង) ចាប់ពីថ្ងៃទី៣ – ៥ កុម្ភៈ ២០២០។

នៅក្នុងឱកាសនេះដែរ ខ្ញុំនឹងជួបពិភាក្សាការងារជាមួយ លោក មូន ចេអ៊ីន (Moon Jae-in) ប្រធានាធិបតីកូរ៉េខាងត្បូង និងនាយករដ្ឋមន្រ្តី ព្រមទាំងមន្រ្តីសំខាន់ៗ​ជាច្រើនរូបទៀត ដើម្បីពង្រឹងនិងពង្រីកកិច្ចសហប្រតិបត្តិការទ្វេភាគីកម្ពុជាកូរ៉េ​ឲ្យកាន់តែល្អប្រសើរឡើង។ កិច្ចប្រជុំនេះ ក៏នឹងជួយសម្រួលដល់ការរស់នៅ និងលក្ខខណ្ឌការងាររបស់កូនក្មួយនៅកូរ៉េឲ្យបានល្អប្រសើរឡើងថែមទៀត។

តាមពិត​ ខ្ញុំត្រូវទៅកូរ៉េកាលពីថ្ងៃ២៥ ខែវិច្ឆិកា ឆ្នាំ២០១៩ ដើម្បីចូលរួម​កិច្ចប្រជុំអាស៊ាន-កូរ៉េ និងកិច្ចប្រជុំមេគង្គ-កូរ៉េ នៅទីក្រុងប៊ូសាន ក៏ប៉ុន្តែពេលនោះត្រូវអាក់ខានដោយសារតែម្តាយក្មេកខ្ញុំ ស្ថិតក្នុងសភាព​សង្រ្គោះបន្ទាន់ ។ ប៉ុន្តែលើកនេះសង្ឃឹមថានឹង បានជួបបងប្អូនកូនក្មួយដែលកំពុងរស់នៅ និងធ្វើការនៅក្នុងប្រទេសកូរ៉េមិនខាន។

សូមជូនពរបងប្អូនជនរួមជាតិ ជួបតែសេចក្តីសុខ និងសំណាងល្អគ្រប់ៗគ្នា​កុំបីខាន។ អរគុណសន្តិភាព»។

មន្ត្រីជាន់ខ្ពស់នៃរាជរដ្ឋាភិបាលកម្ពុជាមួយចំនួន អញ្ជើញអមដំណើរសម្តេចតេជោ ចេញទៅប្រទេសកូរ៉េខាងត្បូងនៅថ្ងៃនេះ។ មន្ត្រីដែលអមដំណើរសម្តេចតេជោ រួមមាន ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការ​អន្តរជាតិ ព្រមទាំងឥស្សរជនជាន់ខ្ពស់មួយចំនួននៃរាជរដ្ឋាភិបាល និងថ្នាក់ដឹកនាំ​ធុរកិច្ចនៃសភាពាណិជ្ជកម្មកម្ពុជា។

តាមសេចក្តីប្រកាសព័ត៌មានរបស់ក្រសួងការបរទេស បានឱ្យដឹងថា ក្នុងពំឡុងពេលស្នាក់នៅកូរ៉េខាងត្បូងនេះ សម្តេចតេជោនាយករដ្ឋមន្ត្រី នឹងអញ្ជើញជួបប្រជុំជាមួយលោក មូន ចេអ៊ីន (Moon Jae-in) ប្រធានាធិបតីកូរ៉េខាងត្បូង ដើម្បីពិភាក្សាលើ​កិច្ចសហប្រតិបត្តិការទ្វេភាគី ក៏ដូចជាបញ្ហាតំបន់ និងអន្តរជាតិ ដែលជាការយកចិត្តទុកដាក់រួម។ សម្តេចតេជោ ក៏នឹងអញ្ជើញចូលរួមពិធីពិសាអាហារថ្ងៃត្រង់រៀបចំដោយ លោក ជុង សៃឃ្យូន (Chung Sye-kyun) នាយករដ្ឋមន្ត្រីកូរ៉េខាងត្បូងផងដែរ។

កិច្ចប្រជុំកំពូលពិភពលោក សម្តេចតេជោនាយករដ្ឋមន្រ្តី នឹងអញ្ជើញថ្លែង​សុន្ទរកថាគន្លឹះ លើមូលបទរបស់កិច្ចប្រជុំកំពូលស្តីពី «សន្តិភាព សន្តិសុខ និងការអភិវឌ្ឍមនុស្ស» រួមជាមួយនឹងឥស្សរជនបរទេសមួយចំនួនទៀត ដែលចូលរួមកិច្ចប្រជុំកំពូលពិភព​លោក​២០២០ នៃអង្គការសហព័ន្ធសន្តិភាព​សកល។

សូមបញ្ជាក់ថា អង្គការ UPF ជាបណ្តាញអន្តរជាតិ-អន្តរសាសនានៃក្រុម​បុគ្គលក៏ដូចជាស្ថាប័ន រួមមានអ្នកតំណាងមកពីសាសនាផ្សេងៗ មកពីរដ្ឋាភិបាល សង្គមស៊ីវិល និងវិស័យឯកជនទាំងឡាយ ដែលមានគោលដៅខិតខំប្រឹងប្រែង​កសាង​សន្តិភាពសម្រាប់ពិភពលោក។ អង្គការ UPF ត្រូវបានបង្កើតឡើងដោយលោក Sun Myung Moon និងភរិយារបស់គាត់ គឺលោកស្រី Dr. Hak Ja Han Moon នៅឆ្នាំ២០០៥ មានតួនាទីផ្តល់​យោបល់ពិសេស ជូនក្រុមប្រឹក្សាសេដ្ឋកិច្ចនិងសង្គម នៃអង្គការសហប្រជាជាតិ។

ក្នុងនាមជាអង្គការក្រៅរដ្ឋាភិបាល ដែលមានឋានៈពិសេសក្នុងការ​ប្រឹក្សាយោបល់ជាមួយក្រុមប្រឹក្សាសេដ្ឋកិច្ចនិងសង្គមនៃអង្គការសហប្រជាជាតិនោះ UPF គាំទ្រដល់កិច្ចការងារនានារបស់អង្គការសហប្រជាជាតិ ពិសេសក្នុងផ្នែកកសាងសន្តិភាពបែបចម្រុះសាសនា ការអប់រំអំពីសន្តិភាព ព្រមទាំងការពង្រឹងចំណងអាពាហ៍ពិពាហ៍និងគ្រួសារជាដើម។
នៅក្នុងដំណើរអញ្ជើញទៅកូរ៉េខាងត្បូងនេះ សម្តេចតេជោនាយករដ្ឋមន្ត្រី ក៏នឹងជួបសំណេះសំណាលជាមួយសហគមន៍កម្ពុជា សិស្ស-និស្សិត និងពលករកម្ពុជា ដែលកំពុងរស់នៅ និងធ្វើការនៅកូរ៉េខាងត្បូងផងដែរ។

តាមរយៈដំណើរបំពេញទស្សនកិច្ចទៅកាន់កូរ៉េខាងត្បូងរបស់សម្តេចតេជោ ហ៊ុន សែន នាពេលនេះ ត្រូវបានគេមើលឃើញថា នឹងក្លាយទៅជាការរួមចំណែកថ្មីមួយ ដល់ការលើកកម្ពស់ទំនាក់ទំនង និងកិច្ចសហប្រតិបត្តិការរវាងកម្ពុជា និងកូរ៉េខាងត្បូង។កម្ពុជា និងកូរ៉េខាងត្បូង បានភ្ជាប់ទំនាក់ទំនងគ្នានៅថ្ងៃទី៣០ ខែតុលា ឆ្នាំ១៩៩៧ ក្រោមការផ្តួចផ្តើមដោយផ្ទាល់ពីសំណាក់សម្តេចតេជោ ហ៊ុន សែន ជាមួយលោក គឹម យ៉ុងសាន ដែលជាប្រធានាធិបតីកូរ៉េខាងត្បូង​នាពេលនោះ។ ទំនាក់ទំនងរវាងប្រទេសទាំងពីរត្រូវបានរីកចម្រើនល្អប្រសើរ​ជាបន្តបន្ទាប់លើគ្រប់វិស័យ ទាំងផ្នែកនយោបាយ សេដ្ឋកិច្ច វប្បធម៌ និងសង្គម។

ទំហំពាណិជ្ជកម្មរវាងកម្ពុជា និងកូរ៉េខាងត្បូង ត្រូវបានគេមើលឃើញថា រីកធំធាត់​ជាបន្តបន្ទាប់។ ទំហំពាណិជ្ជកម្មនៅឆ្នាំ២០១៩ មានជិត ១ពាន់លានដុល្លារ​អាម៉េរិក។ ក្នុងនោះការនាំចេញរបស់កម្ពុជា ទៅកាន់ប្រទេសកូរ៉េខាងត្បូងមាន​ប្រមាណ ៣០ភាគរយ ហើយកូរ៉េខាងត្បូងនាំចូលកម្ពុជាមានប្រមាណ ៧០ភាគរយ។

ទំនិញកម្ពុជានាំទៅកាន់ប្រទេសកូរ៉េខាងត្បូងមានច្រើនបំផុតជាសម្លៀកបំពាក់ គ្រឿងអេឡិចត្រូនិក ស្បែកជើង ភេសជ្ជៈ កាបូប កៅស៊ូ ឱសថ ក្រដាសកាតុង និងផលិតផលកសិកម្មមួយចំនួនទៀត។ ទំនិញកម្ពុជា នាំចូលពីប្រទេសកូរ៉េខាង​ត្បូង​វិញ មានដូចជា ក្រណាត់ត្បាញ រថយន្ត ភេសជ្ជៈ គ្រឿងអេឡិចត្រូនិក គ្រឿងម៉ាស៊ីន វត្ថុតុបតែងលម្អផ្ទះ ឱសថ សាប៊ូ និងផលិតផលប្លាស្ទិកជាដើម។

ដោយឡែកការវិនិយោគវិញ កម្ពុជាទទួលបានការវិនិយោគពីប្រទេស​កូរ៉េខាងត្បូងជាង ៤ពាន់លានដុល្លារ លើវិស័យវាយណភណ្ឌ កសិកម្ម អចលនទ្រព្យ និងសំណង់ជាដើម។ ក្នុងចំណោមគម្រោងវិនិយោគប្រមាណ ២១៤គម្រោង មាន ១២៣គម្រោងវិនិយោគលើរោងចក្រ ជាមួយទុនវិនិយោគ ៤៨៦លានដុល្លារ បង្កើតការងារប្រមាណ ៨ម៉ឺនកន្លែង។

តាមរយៈទំនាក់ទំនងដ៏ល្អប្រសើរនេះ ប្រទេសកូរ៉េខាងត្បូង បានរួមចំណែក​ផ្តល់ការងារជូនប្រជាពលរដ្ឋកម្ពុជាជាច្រើនកន្លែងផងដែរ។ គិតចាប់ពីឆ្នាំ២០០៧ រហូតមកត្រឹមឆ្នាំ២០១៩កន្លងទៅនេះ មានពលករខ្មែរសរុបចំនួន ៦៦៥៦៥នាក់ បានធ្វើការនៅប្រទេសកូរ៉េខាងត្បូង ជាមួយប្រាក់ឈ្នួលចន្លោះពី ១៥០០ដុល្លារ រហូតដល់ ៣០០០ដុល្លារ។ ថវិកាប្រមាណ ៦០០លានដុល្លារអាម៉េរិក ត្រូវបានបញ្ជូនពីកូរ៉េខាងត្បូងមកប្រទេសកម្ពុជាតាមរយៈប្រាក់ឈ្នួលរបស់ ពលករទាំងនេះ ដែលជាការរួមចំណែកមួយដល់ការអភិវឌ្ឍសេដ្ឋកិច្ចកម្ពុជា។

បច្ចុប្បន្នមានស្រ្តីខ្មែរទទួលបានសញ្ជាតិកូរ៉េ តាមរយៈការរៀបអាពាហ៍​ពិពាហ៍ប្រមាណ ១០០០០នាក់ ហើយមាននិស្សិតកំពុងសិក្សានៅកូរ៉េប្រមាណ ៣០០នាក់។


សូមរំលឹកផងដែរថា ដំណើរទៅកាន់ប្រទេសកូរ៉េខាងត្បូងនៅថ្ងៃនេះ គឺជាដំណើរលើកទី៧ហើយ សម្រាប់សម្តេចតេជោ ហ៊ុន សែន គិតចាប់ពី​ឆ្នាំ២០១៦មក។ ទស្សនកិច្ចលើក១ នៅឆ្នាំ១៩៩៦, លើកទី២ នៅឆ្នាំ ២០០១, លើកទី៣ នៅឆ្នាំ២០០៦, លើកទី៤ នៅឆ្នាំ២០០៨, លើកទី៥ នៅឆ្នាំ២០០៩ និងលើកទី៦ នៅឆ្នាំ២០១៤៕B/Ha

ទីតាំងផ្សាយពាណិជ្ជកម្ម

- Advertisment -

Most Popular