ដោយ៖ រ៉ូហ្សា
ភ្នំពេញ៖ ក្លិបកីឡាគុនដាវ HYSA គ្រងតំណែងជើងឯក នៃការប្រកួតកីឡាគុនដាវ ជ្រើសរើសជើងឯកថ្នាក់ជាតិ ប្រចាំឆ្នាំ២០១៩ លើកទី៦ បន្ទាប់ពីដណ្តើមមេដាយ ច្រើនជាងគេ ដែលប្រារព្ធ នៅវិទ្យាល័យឥន្ទ្ររទេវី រៀបចំដោយសហព័ន្ធកីឡាគុនដាវកម្ពុជា ក្រោមគោលការណ៍របស់ ក្រសួងអប់រំ យុវជន និង កីឡា។
លោក សុខ អាង អគ្គលេខាធិការសហព័ន្ធ បានប្រាប់ឲ្យដឹងថា ការប្រកួតជើងឯក ឆ្នាំនេះ សហព័ន្ធ បានដាក់ ៤ វិញ្ញាសា រួមមាន វិញ្ញាសា ឯកត្តជនបុរសដាវធំ វិញ្ញាសាឯកត្តជននារីដាវកាប់ វិញ្ញាសាឯកត្តជនបុរសដាវកាប់ និងវិញ្ញាសាចម្រុះឯកត្តជនដាវតូច ដោយមានការចូលរួម ពីបណ្តាក្លិបកីឡាគុនដាវ ចំនួន ៧ ដូចជា ក្លិបកីឡាគុនដាវ HYSA ក្លិបកីឡាគុនដាវ PFC ក្លិបកីឡាគុនដាវ Western ក្លិបកីឡាគុនដាវ សន្ធរមុខ ក្លិបកីឡាគុនដាវហូសាណា ក្លិបកីឡាគុនដាវឥន្ទ្ររទេវី និងក្លិបកីឡាគុនដាវសាមគ្គី។
លោកបានបន្តថា ឆ្លងកាត់ការប្រកួត មួយថ្ងៃពេញ នាថ្ងៃទី១ ខែកុម្ភៈ ឆ្នាំ២០២០ ក្លិបកីឡាគុនដាវ HYSA បានគ្រងតំណែងជើងឯក ដោយដណ្តើមមេដាយមាស ២គ្រឿង និងសំរិទ្ធ ១គ្រឿង។ រីឯក្លិបកីឡាគុនដាវសាមគ្គី ទទួលជើងឯករង ដណ្តើមមេដាយ មាស ១គ្រឿង និងប្រាក់ ២គ្រឿង ។ ចំណែកក្លិបកីឡាគុនដាវ PFC ឈ្នះមេដាយមាស ១គ្រឿង និងសំរិទ្ធ ១គ្រឿង។
ចំពោះក្លិបកីឡាគុនដាវឥន្ទ្ររទេវី ទទួលបានមេដាយប្រាក់ ២ គ្រឿង និងសំរិទ្ធ ១គ្រឿង និងក្លិបកីឡាគុនដាវសាលារៀនហូសាណ ដណ្តើមមេដាយសំរិទ្ធ ៣គ្រឿង៕v
