ដោយ៖ រ៉ូហ្សា
ភ្នំពេញ៖ ព្រឹត្តិការណ៍ TV5 Boxing Knock-Out Serie by K-Cement បានរកឃើញអ្នកឈ្នះចុងក្រោយ នៃវគ្គជម្រុះជុំទី១ហើយ ដោយអ្នកប្រដាល់ ២ រូប មកពីក្លិបបូរីរាជសីហ៍មានរិទ្ធ ចាញ់ដូចគ្នា ។
អ្នកប្រដាល់ លីន សុខឈុន ក្លិបបូរីរាជសីហ៍មានរិទ្ធ ត្រូវអ្នកប្រដាល់ ពុយ វណ្ណៈ ក្លិបឃ្លាំងមឿងកីឡា ប្រើជង្គង់វាយឲ្យសន្លប់ មុនស្នូរជួងបញ្ចប់ទឹកទី២។ សុខឈុន ជាអ្នកប្រដាល់ជើងថ្មី ដែលមិនទាន់មានកេរ្តិ៍ឈ្មោះ នៅឡើយទេ ។ ចំពោះ វណ្ណៈ គេជាអ្នកប្រដាល់ ដែលមានឈ្មោះបោះសម្លេង ព្រមទាំងធ្លាប់ឆ្លងកាត់ ការប្រកួតជាលក្ខណៈអន្តរជាតិ ទៀតផង។
ការប្រកួតនេះ វណ្ណៈ ពិតជាដឹងខ្លួនឯងថា ឈ្នះមុនរួចទៅហើយ ក្នុងខណៈដែល សុខឈុន ក៏ទទួលស្គាល់ថា ជាការប្រកួតមួយ ដែលគេពិតជាលំបាក។ នៅទឹកទី១ វណ្ណៈ មិនទាន់វ៉ៃ ក៏ពិតមែន តែមកដល់ទឹកទី២ វណ្ណៈ ចាប់ផ្ដើមវាយប្រហារ ដោយជង្គង់ ធ្វើឲ្យសុខឈុន ដួលទៅលើក្ដារសង្វៀន ហើយត្រូវអាជ្ញាកណ្ដាល រាប់៨ និងបន្តដល់ ១០ ហើយសុំបោះបង់ចោល ការប្រកួតតែម្ដង។ សុខឈុន ខ្ទាតចេញពីការប្រកួតតែត្រឹមនេះ ។ ចំពោះ វណ្ណៈ ត្រៀមខ្លួនឡើងប្រកួតបន្ត វគ្គជម្រុះជុំទី២ ។
ប្រកួតក្នុងព្រឹត្តិការណ៍នេះដែរ អ្នកប្រដាល់ លីន វីរៈក្លិបបូរីរាជសីហ៍មានរិទ្ធ ដែរនោះ ប្រកួតចាញ់អ្នកប្រដាល់ សូត្រ ខេវិន ក្លិបបក្សីស្លាបដែក ដោយពិន្ទុដាច់ ។ វីរៈ ជាអ្នកប្រដាល់ ដែលមានអំណួតខ្លាំងណាស់ តែពេលជួបជាមួយ ខេវិន គេទៅមិនរួចជាមួយ ជង្គង់របស់ខេវិនឡើយ ។ វីរៈ ចេញជង្គង់ បានមួយ ហើយវ៉ៃមិនបានល្អ ដូចខេវិនឡើយ មិនតែប៉ុណ្ណោះ គេតែងតែដួលទៅលើសង្វៀន ជាញឹកញាប់ទៀតផង ។ ជង្គង់របស់ខេវិន វ៉ៃចំគោលដៅ បានយ៉ាងល្អ ។
អ្នកប្រដាល់ទាំង ២ រូបនេះ ប្រកួតគ្នាពេញទាំង ៣ ទឹក ដោយ សូត្រ ខេវិន បានទទួលជ័យជំនះ ដោយពិន្ទុ ។ ខេវិន ត្រៀមខ្លួនឡើងប្រកួតបន្ត នៅជុំទី២ ក្នុងខណៈដែល លីន វីរៈ ខ្ទាតចេញពីការប្រកួតទៅហើយ។ ពេលនេះ អ្នកប្រដាល់ចំនួន ៣២ រូប គឺមាន ១៦ រូប ខ្ទាតចេញពីការប្រកួត និង ១៦ រូប ត្រៀមខ្លួនឡើងប្រកួតបន្ត ទៅវគ្គជម្រុះជុំទី២ ទៀត។
ចំពោះការប្រកួតជាមិត្តភាព រវាងអ្នកប្រដាល់ កម្ពុជា ថៃ វិញនោះ អ្នកប្រដាល់កម្ពុជា សូត្រ ប៊ុនធី ក្លិបបក្សីស្លាបដែក សងសឹកយកឈ្នះ អ្នកប្រដាល់ជើងខ្លាំថៃ ចេក សាយ៉ាម (Chek Sayam) បានវិញ ដោយពិន្ទុ ទាំងត្រដាបត្រដួស បន្ទាប់ពីប្រកួតគ្នា ៥ ទឹកពេញមកនោះ។
ចំពោះការប្រកួតរវាង អ្នកប្រដាល់រួមជាតិ ក្រៅព្រឹត្តិការណ៍ ពានរង្វាន់វិញនោះ អ្នកប្រដាល់អ្នកប្រដាល់ ឡុង ខេត្ត ក្លិបខ្លារខិនមានរិទ្ធ ប្រកួតឈ្នះ អ្នកប្រដាល់ សឺន ថៃសាន់ ក្លិបតាព្រហ្មមានជ័យដោយពិន្ទុ ៕v
