ចិនកាលពីថ្ងៃចន្ទទី០៣កុម្ភៈបានចោទប្រកាន់អាម៉េរិកថាបង្កការភិតភ័យស្លន់ស្លោរ ដោយសារតែការឆ្លើយតបរបស់ខ្លួនចំពោះកូរ៉ូណាវីរុសរួមមានការដាក់បំរាមលើអ្នកដំណើរចិនផង។
អ្នកនាំពាក្យក្រសួងការបរទេសចិនលោកស្រី ហួរ ជុនយីង បាននិយាយថាអាម៉េរិកមិនបានផ្តល់ជំនួយធំដុំណាមួយទេនិងគ្រាន់តែបានបង្ក«ការភិតភ័យតកមា»ប៉ុណ្ណោះ។
រដ្ឋាភិបាលក្រុងវ៉ាស៊ីនតោនកាលពីថ្ងៃសុក្រសប្តាហ៍មុនបានប្រកាសគ្រាអាសន្នសុខភាពសាធារណៈមួយ និងបានហាមមិនអោយចូលអាម៉េរិកជាបណ្តោះអាសន្នចំពោះជនបរទេសណាដែលបានធ្វើដំណើរទៅចិនឬនៅប្រទេសចិនក្នុងរយៈពេល១៤ថ្ងៃកន្លងមក ដើម្បីទប់ស្កាត់ការឆ្លងរាលដាលវីរុសពិឃាត។
ឥឡូវអាម៉េរិកបានប្រកាសរកឃើញអ្នកផ្ទុកកូរ៉ូណាវីរុស៨ករណី ដែលមានប្រភពចេញពីក្រុងវូហាន ប្រទេសចិន។កូរ៉ូណាវីរុសក៏បានបង្ហាញវត្តមាននៅ២៤ប្រទេសផ្សេងទៀត តាមរយៈអ្នកដំណើរទៅពីចិន និងការឆ្លងក្នុងស្រុកផ្ទាល់ក្នុងប្រទេសទាំងនោះ។
អង្គការសុខភាពពិភពលោកបានប្រកាសរួចហើយថា ការផ្ទុះជម្ងឺបង្កឡើងដោយកូរ៉ូណាវីរុសថ្មីបច្ចុប្បន្នដែលបានសម្លាប់មនុស្ស៣៦២នាក់ និងឆ្លងជា១៧.០០០នាក់ជាគ្រោះអាសន្នសុខភាពសាធារណៈសកលមួយ និងបានប្រាប់ទៅរដ្ឋាភិបាលនានាអោយត្រៀមទប់ទល់។
ប្រទេសមួយចំនួន បានធ្វើការរឹតត្បិតការធ្វើដំណើរទៅនិងចូលមកពីចិន ហើយក្រុមហ៊ុនអាកាសចរណ៍មួយចំនួនក៏ផ្អាកឬកាត់បន្ថយការហោះហើររបស់ខ្លួនទៅចិនផងដែរ។
ប្រឈមការការផ្អើលនិងភិតភ័យនេះ កាលពីថ្ងៃចន្ទទី៣កុម្ភៈ ពួកវិនិយោគិនបានដកប្រាក់ជាង៤០០ពាន់លានដុល្លារចេញពីតំលៃភាគហ៊ុនចិនក្នុងការជួញដូរភាគហ៊ុនថ្ងៃដំបូងបន្ទាប់ពីការឈប់សម្រាលចូលឆ្នាំថ្មី នៅពេលតំលៃហ៊ុននៅទីផ្សារភាគហ៊ុនចិនធ្លាក់ចុះជិត១០ភាគរយ។
សូមរំលឹកថា កាលពីផ្សារហ៊ុនចិនបិទកាលពីថ្ងៃ២៣មករាដើម្បីឈប់ចូលឆ្នាំ ចំនួនមនុស្សស្លាប់ដោយកូរ៉ូណាវីរុសមានត្រឹមតែ១៧នាក់ តែនៅពេលវាបើកឡើងវិញកាលពីថ្ងៃ០៣កុម្ភៈ ចំនួនមនុស្សស្លាប់កើនដល់៣៦១នាក់នៅចិន បូកបន្ថែមម្នាក់នៅហ្វីលីពីន។ពួកអ្នកវិនិយោគដែលមានការភិតភ័យ បានបំផ្លាញតំលៃហ៊ុន៤២០ពាន់លានដុល្លារភ្លាមកាលពីព្រឹកថ្ងៃចន្ទដោយនាំគ្នាលក់ចេញថោកៗ រីឯប្រាក់យ័ន ប្រេង ដែក ទង់ដែងសុទ្ធតែធ្លាក់ថ្លៃ។
តែធនាគារកណ្តាលចិនក៏បានបញ្ចេញប្រាក់១,២លានលានយ័ន(១៧៥ពាន់លានដុល្លារ)ជាបន្ទាន់ផងដែរដើម្បីទប់សភាពការណ៍និងធានាទិញប័ណ្ណបំណុល(មូលបត្រ)មកពីឈ្មួញណាដែលចង់លក់ចេញ៕ប្រែសម្រួល៖វាសនា
តារាងភាគហ៊ុននៅផ្សារក្រុងប៉េកាំងនិងសិនចិនបង្ហាញការធ្លាក់ចុះជិត៩ភាគរយ