ក្លិបជូវេនទុស( Juventus) សង្ឃឹមថា ពួកគេអាចនឹងដាក់សំណើផ្ទេរខ្សែការពារ វើហ្គីល វ៉ាន ឌិក (Virgil van Dijk) ក្នុងតម្លៃ១៥០លានផោននៅរដូវក្តៅនេះ។
ក្លិបនៅក្របខ័ណ្ឌ Serie A នេះជឿជាក់ថា កីឡាករសញ្ជាតិហូឡង់រូបនេះនឹងបើកចិត្តទទួល យកការប្រជែងថ្មី ប្រសិនបើក្រុមលីវឺភូល( Liverpool) បន្តលើកពានជើងឯកនៅក្របខណ្ឌ ព្រីមីញ៉េលីកនៅរដូវកាលនេះ ហើយត្រៀមនឹងធ្វើឲ្យកីឡាកររូបនេះ ក្លាយជាខ្សែការពារ ថ្លៃបំផុតក្នុងពិភពលោក។
ចាប់តាំងពីផ្ទេរមកពហុកីឡដ្ឋាន Anfield កីឡាករ វ៉ាន ឌិក បានជួយក្លិប Liverpool លើកពាន ឆេមពានលីក ពានក្លិបជើងឯកបាល់ទាត់ពិភពលោក Club World Cup និង Super Cup ស្របពេល Liverpool នឹងលើកពានជើងឯកលីកលើកដំបូងក្នុងរយៈពេល៣០ឆ្នាំ។
ប្រភពដែលស្ថិតនឹងក្លិប Juventus បាននិយាយថា “បន្ទាប់ពីលើកពានជាមួយក្លិប Liverpool ក្លិប Juventus គិតថា វ៉ាន ឌិក ប្រហែលជាត្រៀមខ្លួនសម្រាប់ការប្រជែងថ្មីនៅដំណាច់រដូវកាល។ ពួកគេត្រៀមដាក់សំណើជាមួយទឹកប្រាក់ច្រើនសន្ធឹកសន្ធាប់នៅរដូវក្តៅនេះ”។
ខ្សែការពាររូបនេះបានដឹកនាំក្រុមជម្រើសជាតិរបស់ខ្លួនទទួលបានលេខ២នៅក្នុងការប្រកួតដណ្តើមពាន Nations League ហើយធ្លាប់ជាប់ជាបេក្ខភាពរងបាល់មាស Ballon d`Or បន្ទាប់ពី កីឡាករ លីអូណេល ម៉េសស៊ី (Lionel Messi) ។
វ៉ាន ឌិក ធ្លាប់បាននិយាយថា “នៅពេលនេះ ខ្ញុំមានវ័យ២៨ឆ្នាំហើយខ្ញុំចង់សម្រេចក្តីសុបិនដែល ខ្ញុំធ្លាប់មាន”៕ ប្រែសម្រួល: ពិសិដ្ឋ
