តុលាការ​ម៉ាឡាវី​លុបចោល​លទ្ធផល​នៃ​ការបោះឆ្នោត​ប្រធានាធិបតី​និង​បញ្ជា​ឱ្យ​មាន​ការបោះឆ្នោត​ជាថ្មី​

291
ចែករម្លែក

​តុលាការ​ធម្មនុញ្ញ​របស់​ប្រទេស​ម៉ាឡាវី​កាលពី​ថ្ងៃ​ចន្ទ​ទី​៣​កុម្ភៈ​បាន​បញ្ជា​ឱ្យមាន​ការបោះឆ្នោត​ជ្រើសរើស​ប្រធានាធិបតី​ជា​ថ្មី​បន្ទាប់​ពី​ទុកជាមោឃៈ​លទ្ធផល​​នៃ​ការបោះឆ្នោត​ដែល​ប្រធានាធិបតី លោក​ផេ​ធឺ មុត​ថា​រី​កា បាន​ជាប់ឆ្នោត​ជា​ថ្មី​កាលពី​ខែ​ឧសភា ដោយ​លើកឡើង​អំពី​ភាពមិនប្រក្រតី​នៃ​ការបោះឆ្នោត​​ដោយ​រួមទាំង​មានការ​កោស​លុប​ដោយ​ប្រើប្រាស​ទឹកលុប​លើ​សន្លឹកឆ្នោត​។​

​សាលក្រម​នេះ អាច​ត្រូវបាន​ប្តឹង​ឧទ្ធរណ៍​ដោយ​លោក​ផេ​ធឺ មុត​ថា​រី​កា ដែល​នឹង​នៅតែ​ជា​ប្រធានាធិបតី រហូតដល់​ការបោះឆ្នោត​ជាថ្មី​។​

​ចៅក្រម​បាន​និយាយថា “​យើង​ប្រកាន់​ជំហរ​ថា​លោក​ផេ​ធឺ មុត​ថា​រី​កា មិន​ត្រូវ​បាន​ជាប់ឆ្នោត​ជា​ប្រធានាធិបតី នៃ​ប្រទេស​ម៉ាឡាវី យ៉ាង​ត្រឹមត្រូវ​និង​ពេញលេញ​​កាលពី​ថ្ងៃទី ២១ ខែ​ឧសភា​ឆ្នាំ ២០១៩ នោះទេ ។​”​យើង​ទុក​ជា​មោឃៈ​នូវ​លទ្ធផល​នៃ​ការបោះឆ្នោត​ប្រធានាធិបតី​នេះ ហើយ​យើង​បញ្ជា​ឱ្យ​មាន​ការបោះឆ្នោត​ជាថ្មី​”​។​

​តុលាការ​នេះ​បាន​និយាយថា​ការបោះឆ្នោត​ជា​ថ្មី​គួរតែ​ត្រូវបាន​រៀបចំឡើង​ក្នុង​រយៈពេល​១៥០​ថ្ងៃ​ទៀត​នេះ​។​

​ក្នុង​ពេលនេះ តំណែង​ជា​ប្រធានាធិបតី​ដោយ​រួម​ទាំង​អនុប្រធាន​ធ្លាក់​លើ​អ្នក​កាន់កាប់​វា​នៅ​មុន​ការបោះឆ្នោត​ជ្រើសរើស​ប្រធានាធិបតី​កាលពី​ឆ្នាំមុន​។​

​ការតវ៉ា​ខ្លះៗ​និង​ម្តងម្កាល​បាន​កើត​ឡើង​នៅ​ទូទាំង​ប្រទេស​នេះ ចាប់តាំងពី​លោក​ផេ​ធឺ មុត​ថា​រី​កា ត្រូវបាន​ប្រកាសថា​ជា​អ្នកឈ្នះ​នៃ​ការបោះឆ្នោត​ខែ​ឧសភា ​ដោយ​ទទួលបាន​សំឡេងឆ្នោត​គាំទ្រ​៣៨,៥ ភាគរយ​នៃ​ចំនួន​សន្លឹកឆ្នោត​នេះ ខណៈ​ដែល​បេក្ខជន​ជាប់ឆ្នោត​ក្នុង​លំដាប់​ទី​២​នៃ​ការបោះឆ្នោត​នេះ បាន​និយាយ​​ថា លោក​ត្រូវបាន​គេ​ប្លន់​យក​ជ័យជម្នះ​ហើយ​បាន​ធ្វើ​ការតវ៉ា​ទៅ​តុលាការ​៕​ដោយ​៖​សុខា​/sn

ប្រធានាធិបតី លោក​ផេ​ធឺ មុត​ថា​រី​កា បន្ត​កាន់តំណែង​ប្រធានាធិបតី​ក្រោយ​ការសម្រេច​របស់​តុលាការ​