អត្តបទៈសុផានីតា/កោះកុង៖ មន្ត្រីច្រកទ្វារព្រំដែនចាំយាម និងមមន្ទីរពេទ្យបង្អែកនៅខេត្តកោះកុង បានអះអាងរួមគ្នាថាពួកគេនៅមិនទាន់រកឃើញមេរោគសញ្ញាជំងឺកូរ៉ូណាលើអ្នកឆ្លងដែនណាមួយនោះទេ។ស្រពពេលបន្តបង្កើនការតាមដានពិនិត្យនិងអប់រំអនាម័យគ្រប់ពេលវេលាដើម្បីជៀសការឆ្លងជំងឺរលាកផ្លូវដង្ហើមខាងលើ។
នៅថ្ងៃទី៤ខែកុម្ភៈឆ្នាំ២០២០លោកសុវណ្ណប៊ុនធឿនប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិចាំយាមនិងលោកវេជ្ជបណ្ឌិតហៃឡៃសុនប្រធានមន្ទីរពេទ្យបង្អែកខេត្តកោះកុងបានថ្លែងប្រាប់រស្មីកម្ពុជាថាជាង២សប្តាហ៍មកនេះពុំមានការរកឃើញនូវជំងឺកូរ៉ូណាឡើយសម្រាប់ពលរដ្ឋដែលអាជីវករមាត់ច្រកទ្វារព្រំដែន និងអ្នកដំណើរឆ្លងដែនចូលកាន់កម្ពុជា។
លោកសុវណ្ណប៊ុនធឿនលើកឡើងថាមន្ត្រីរបស់លោក,មន្ត្រីសុខាភិបាលនិងនគរបាលអន្តោយប្រវេន៍យ៉ាងជិតស្និទលើវិធានការតាមដានពិនិត្យរកមេរោគជំងឺផ្សេងៗជាពិសេសជំងឺកូរ៉ូណាតែម្តងចំពោះអ្នកដំណើរឆ្លងដែន។រីឯប្រជាពលរដ្ឋដែលអាចប្រកបអាជីវកម្មនៅមាត់ច្រកទ្វារព្រំដែនក៏មានការប្រុងប្រយ័ត្នយល់ដឹងពីវិធានការបង្ការខ្លួនបញ្ចៀសការឆ្លងជំងឺរលាកផ្លូវដង្ហើមនេះដែរ។
លោក សុវណ្ណ ប៊ុនធឿន បានបន្ថែមថា ការធ្វើដំណើររបស់អ្នកទេសចរ និងការចរាចរណ៍ទំនិញធំតូច ប្រព្រឹត្តទៅដោយភាពប្រក្រតីគឺពុំមានការរកឃើញសញ្ញាណាម្នាក់ដែលផ្ទុកនូវជំងឺកូរ៉ូណាធ្វើដំណើរឆ្លងកាត់ច្រកទ្វារព្រំដែនចាំយាមឡើយ។ដោយឡែកលោកវេជ្ជបណ្ឌិតហៃឡៃសុនប្រធានមន្ទីរពេទ្យបង្អែកខេត្តកោះកុងវិញមានប្រសាសន៍ដែរថារាល់ពេលមានអ្នកដំណើរឆ្លងកាត់ទៅមកពួកគេបានសហការជាមួយក្រុមមន្ត្រីរបស់លោក។ ក្នុងនោះជាមួយមន្ត្រីសុខាភិបាល តាមដានពិនិត្យការបាញ់កម្តៅ របស់អ្នកដំណើរលាងដៃនឹងសាប៊ូនិងផ្តល់ម៉ាស់ដោយឥតគិតថ្លៃដើម្បីទប់ស្កាត់ការពារជំងឺរលាកផ្លូវដង្ហើម។ករណីបើសង្ស័យអ្វីនោះទេ នឹងឃាត់ខ្លួនរួចបញ្ចូនទៅកាន់មន្ទីរពេទ្យខេត្តបន្តពិនិត្យទៀត។
ទោះយ៉ាងណាលោកវេជ្ជបណ្ឌិតក៏បានកត់សម្គាល់ដែរថា២ទៅ៣ថ្ងៃកន្លងទៅសង្កេតឃើញមានស្ត្រីជាជនជាតិកូរ៉េបារាំងនិងអាមេរិកប្រមាណជា៥នាក់បានស្ម័គ្រចិត្តចូលពិគ្រោះជំងឺនៅមន្ទីរពេទ្យរបស់លោកដោយសារតែពួកគេបារម្ភពីសុខភាពខ្លួនអំឡុងពេលឡើងកំដៅក្នុងរាងកាយ។ភ្លាមៗនោះក្រុមគ្រូពេទ្យរបស់លោកក៏តាមដានពិនិត្យនិងផ្តល់ថ្នាំមួយចំនួនប៉ុន្តែគ្មានសញ្ញាណាមួយពីជំងឺកូរ៉ូណាអ្វីឡើយ។
លោកវេជ្ជបណ្ឌិតប្រធានមន្ទីរពេទ្យខេត្តកោះកុង ពន្យល់ទៀតថា ក្រុមគ្រូពេទ្យរបស់លោក នៅតែមាន វេនប្រចាំរង់ចាំជួយពិនិត្យសង្គ្រោះអ្នកជំងឺប្រសិនមានពលរដ្ឋឬជនបរទេសណាមួយមានបញ្ហាសុខភាព។ក្រៅពីរង់ចាំទទួលអ្នកជំងឺ ក៏មានការអប់រំធ្វើអនាម័យខ្លួនប្រាណ និងការហូបចុកស្អាត រស់នៅស្អាតជូនដល់ពលរដ្ឋដែលពិនិត្យព្យាបាលជំងឺទូទៅនៅមន្ទីរពេទ្យ។ចំពោះបន្ទប់នៅដាច់ដោយឡែកសម្រាប់អ្នកជំងឺរលាកផ្លូវដង្ហើមក៏មន្ទីរពេទ្យបានត្រៀមរៀបចំតាមលក្ខណៈបច្ចេកទេសវេជ្ជសាស្ត្ររួចរាល់ហើយដែរ។
ដើម្បីត្រៀមលក្ខណ:ប្រយុទ្ធទប់ស្កាត់នឹងជំងឺដ៏កាចសាហាវនេះកាលពីថ្ងៃទី២៩ខែមករាឆ្នាំ២០២០កន្លងទៅនេះក្រុមគ្រូពេទ្យមន្ទីរពេទ្យខេត្តកោះកុងបើកវគ្គបណ្តុះបណ្តាលរំលឹកអំពីរបៀបពាក់និងដោះសម្ភារបង្ការការឆ្លងរោគ(PPE=PersonalProtectiveEquipment)ដល់មន្ត្រីគ្រូពេទ្យនៅមន្ទីរពេទ្យត្រៀមលក្ខណ:ឱ្យបានគ្រប់ជ្រុងជ្រោយទុកជាមុន ។
ទន្ទឹមនោះមន្ទីរពេទ្យក៏ជំរុញដល់ប្រជាពលរដ្ឋទាំងអស់ចូលរួមអនុវត្តការបង្ការការឆ្លងវីរុសតាមការណែនាំរបស់ក្រសួងសុខាភិបាល ក៏ដូចជាមន្ត្រីសុខាភិបាលជំនាញទាំងអស់គ្នាដើម្បីចូលរួមទប់ស្កាត់ និងកាត់បន្ថយការឆ្លងជំងឺកូរ៉ូណា ខណៈពិភពលោកនៅតែព្រួយបារម្ភសុវត្ថិភាពសុខភាពរស់នៅ៕S/
