សម្តេច​តេ​ជោ ហ៊ុន សែន ចេញពី​សេ​អ៊ូ​ល​ទៅ​ជួប​ប្រធានាធិបតី​-​នាយករដ្ឋមន្ត្រី​ចិន​ពិភាក្សា​លើ​ការរីក​រាលដាល​ជំងឺឆ្លង​ផ្លូវដង្ហើម​កូ​រ៉ូ​ណា​

182
ចែករម្លែក

ដោយៈមុនីរ័ត្ន,តារារិទ្ធ/​ភ្នំពេញៈ តប​តាម​ការអញ្ជើញ​របស់លោក លី ខឺ​ឈាង នាយករដ្ឋមន្ត្រី​នៃ​ក្រុមប្រឹក្សារដ្ឋ​នៃ​សាធារណរដ្ឋ​ប្រជាមានិត​ចិន សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា នឹង​ដឹកនាំ​គណៈប្រតិភូ​ជាន់ខ្ពស់​ពី​រដ្ឋធានី សេ​អ៊ូ​ល សាធារណរដ្ឋ​កូរ៉េ ដើម្បី​បំពេញ​ទស្សនកិច្ច​ការងារ នៅ​រដ្ឋធានី​ប៉េកាំង សាធារណរដ្ឋ​ប្រជាមានិត​ចិន នៅ​ថ្ងៃទី​៥ ខែកុម្ភៈ ឆ្នាំ ២០២០ ។ នេះ​បើ​យោងតាម​សេចក្តីប្រកាស​ព័​ត៌​មាន​របស់​ក្រសួងការបរទេស និង​សហប្រតិបត្តិការ​អន្តរជាតិ នៅ​ព្រឹក​ថ្ងៃទី​៥ ខែកុម្ភៈនេះ។​

​អញ្ជើញ​អមដំណើរ​សម្តេច​តេ​ជោ​នាយករដ្ឋមន្ត្រី រួមមានៈ លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និង​សហប្រតិបត្តិការ​អន្តរជាតិ មន្ត្រីជាន់ខ្ពស់​មួយចំនួន​នៃ​រាជរដ្ឋាភិបាល និង​ថ្នាក់ដឹកនាំ​ធុរកិច្ច​នៃ​សភាពាណិជ្ជកម្ម​កម្ពុជា​។​

​ក្រសួងការបរទេស និង​សហប្រតិបត្តិការ​អន្តរជាតិ បាន​បញ្ជាក់ថា ក្នុង​ដំណើរ​ទស្សនកិច្ច​នេះ សម្តេច​តេ​ជោ​នាយករដ្ឋមន្ត្រី នឹងមាន​ជំនួប​ជាមួយ​លោក លី ខឺ​ឈាង ដើម្បី​ពិភាក្សា​អំពី​កិច្ចសហប្រតិបត្តិការ​ទ្វេភាគី​លើ​វិស័យ​ផ្សេងៗ និង​ផ្លាស់ប្តូរ​ទស្សនៈ​គ្នា​លើ​ការរីក​រាលដាល​ជំងឺឆ្លង​ផ្លូវដង្ហើម​កូ​រ៉ូ​ណា​ដែល​កំពុង​កើតមានឡើង រួមទាំង​បញ្ហា​មួយចំនួន​ដែលជា​ផលប្រយោជន៍​រួម និង​ជួប​សំដែង​ការគួរសម​ជាមួយ​លោក ស៊ី ជីន​ភីង ប្រធានាធិបតី​នៃ​សាធារណរដ្ឋ​ប្រជាមានិត​ចិន​ផងដែរ​៕សរន