ដោយ៖តារារិទ្ធ(ភ្នំពេញ)សម្តេចតេជោ ហ៊ុន សែននាយករដ្ឋមន្ត្រីនៃកម្ពុជានឹងជួបពិភា ក្សាការងារជាមួយលោកប្រធានាធិបតីចិន ស៊ី ជីនពីង និងលោកនាយករដ្ឋមន្ត្រីចិន លី ខឺឈាង នៅល្ងាចថ្ងៃទី ៥ ខែកុម្ភៈ នេះក្នុងដំណើរវិលត្រឡប់ពីសាធារណរដ្ឋកូរ៉េមកកាន់ព្រះរាជាណាចក្រ កម្ពុជា ។ នេះបើយោងតាមសេចក្តីជូនដំណឹងរបស់ក្រសួងការបរទេសនិងសហប្រតបត្តិការអន្តរជាតិកម្ពុជា ។
ទស្សនកិច្ចការងាររយៈពេល ១ ថ្ងៃ នៅថ្ងៃទី០៥ ខែកុម្ភៈ ឆ្នាំ ២០២០នេះរបស់សម្តេចតេជោ ហ៊ុន សែន បានធ្វើឡើងតបតាមការអញ្ជើញរបស់លោកលី ខឺឈាង នាយករដ្ឋមន្ត្រីចិន ។អញ្ជើញអមដំណើរសម្តេចតេជោនាយករដ្ឋមន្ត្រីរួមមានឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសនិងសហប្រតិបត្តិការអន្តរជាតិមន្ត្រីជាន់ខ្ពស់មួយចំនួននៃរាជរដ្ឋាភិបាល។
ក្នុងដំណើរទស្សនកិច្ចនេះសម្តេចតេជោនាយករដ្ឋមន្ត្រីនឹងមានជំនួបជាមួយ លោក លី ខឺឈាង ដើម្បីពិភាក្សាអំពីកិច្ចសហប្រតិបត្តិការទ្វេភាគីលើវិស័យផ្សេងៗ និង ផ្លាស់ប្តូរទស្សនៈគ្នាលើការរីករាលដាលជំងឺឆ្លងផ្លូវដង្ហើមកូរ៉ូណាវីរុសដែលកំពុងកើតមានឡើងរួមទាំងបញ្ហាមួយចំនួនដែលជាផលប្រយោជន៍រួមនិងជួបសំដែងការគួរសម ជាមួយ លោក ស៊ី ជិនពីង ប្រធានាធិបតីនៃសាធារណរដ្ឋប្រជាមានិតចិនផងដែរ ៕
