ដោយៈមុនីរ័ត្ន/ភ្នំពេញ៖មួយយប់អគ្គិភ័យកើតឡើងចំនួនពីករណីផ្សេងគ្នានៅក្នុងរាជធានីភ្នំពេញបណ្តាលឱ្យមនុស្សបីនាក់របួសធ្ងន់ស្រាលខណៈដែលមានអគ្គិភ័យឆាបឆេះស្ថានីយលក់ហ្គាសមួយកន្លែងនៅខណ្ឌច្បារអំពៅនិងឆេះផ្ទះមួយខ្នងនៅខណ្ឌមានជ័យ។អគ្កិភ័យទាំងពីរលើកនោះត្រូវបានរថយន្តពន្លត់អគ្គិភ័យរបស់ក្រុមហ៊ុនឯកជនសហការជាមួយរថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញជួយអន្តរាគមន៍ប្រើប្រាស់ទឹកជាច្រើនរថយន្តបាញ់ទឹកពន្លត់មិនបង្ករាលដាលឆាបឆេះផ្ទះផ្សេងទៀត។
តាមរបាយការណ៍របស់ការិយាល័យបង្ការពន្លត់អគ្គិភ័យនិងសង្គ្រោះនៃស្នងការដ្ឋាននគរបាលរាជធានីភ្នំពេញឱ្យដឹងថាកាលពីវេលាម៉ោង៧យប់ថ្ងៃទី៤ខែកុម្ភៈ ស្ថានីយលក់ហ្គាសយីហោតេលាសម្បត្តិ នៅចំណុចបណ្តោយផ្លូវលេខ១ ក្រុម០៦ ភូមិបឹងឈូក សង្កាត់និរោធន ខណ្ឌច្បារអំពៅ បានរងការឆាបឆេះឧស្ម័នហ្គាសរាលដាលឆេះរងរបួសកម្មករបីនាក់នៅក្បែរទីតាំងកើតហេតុ។ជនរងគ្រោះភ្លាមៗនោះត្រូវបានគេដឹកបញ្ជូនយកទៅសង្គ្រោះនៅមន្ទីរពេទ្យ។ មូលហេតុនៃការឆេះស្ថានីយនេះបណ្តាលមកពីការធ្វេសប្រហែសនិងបញ្ហាបច្ចេកទេស។ម្ចាស់ស្ថានីយលក់ហ្គាសមានឈ្មោះ ព្រំ សុផាន់ណា ភេទស្រី អាយុ៣៥ឆ្នាំ។
ដោយឡែកករណីអគ្គិភ័យមួយកន្លែងទៀតកើតឡើងឆេះផ្ទះមួយខ្នងធ្វើអំពីឈើក្រោមខាងលើថ្មទំហំ៦ម៉ែត្រគុណ៣០,៣០ម៉ែត្រអស់ទាំងស្រុងស្ថិតនៅចំណុចបណ្តោយផ្លូវលេខ២៤BT ផ្ទះលេខ៤២៣ ក្រុមទី២ ភូមិត្នោតជ្រុំ៦ សង្កាត់បឹងទំពន់២ ខណ្ឌមានជ័យ។អគ្កិភ័យមិនបង្កឱ្យប៉ះពាល់រងរបួសនិងគ្រោះថ្នាក់អាយុជីវិតប្រជាពលរដ្ឋនោះឡើយ ទ្រព្យសម្បត្តិនិងសម្ភារៈជាច្រើនបានរងការខូចខាតបាត់បង់។មូលហេតុនៃការឆេះនោះសមត្ថកិច្ចកំពុងតែស្រាវជ្រាវ។ម្ចាស់ផ្ទះមានឈ្មោះ សៀង សុខលៀង ភេទប្រុសអាយុ៥៧ឆ្នាំ ដែលបានជួលផ្ទះទៅឱ្យឈ្មោះ ជា សុភាវី ភេទស្រី អាយុ៣៥ឆ្នាំ បើកហាងលក់ម្ហូបអាហារ។
ជុំវិញបញ្ហាអគ្គិភ័យនៅក្នុងរាជធានីភ្នំពេញនេះបើយោងតាមរបាយការណ៍របស់ការិយាល័យបង្ការពន្លត់អគ្គិភ័យនិងសង្គ្រោះនៃស្នងការដ្ឋាននគរបាលរាជធានីភ្នំពេញបង្ហាញឱ្យដឹងថារយៈពេលមួយខែមករា កន្លងទៅនេះអគ្គិភ័យកើតឡើងចំនួន១០លើកបណ្តាលឱ្យឆេះផ្ទះ១៩ខ្នង, ស្មើនិង២០បន្ទប់ និងឆេះឃ្លាំង១ខ្នង អគ្គិភ័យទាំង១០លើកនោះមិនបង្កឱ្យគ្រោះថ្នាក់ដល់អាយុជីវិតពលរដ្ឋនោះទេ។ប៉ុន្តែបានបំផ្លាញទ្រព្យសម្បត្តិរបស់ប្រជាពលរដ្ឋជាច្រើន៕សរន
