អង្គការ​សុខភាព​ពិភពលោក​អំពាវនាវរ​ក​ជំនួយ ​នៅពេល​ចំនួន​មនុស្ស​ស្លាប់​ដោយ​កូរ៉ូណា​វីរុស​ឡើងដល់​៥៦៣​នាក់​

​ចិន​កាលពី​ថ្ងៃ​ព្រហស្បតិ៍​ទី​៦​កុម្ភៈ បាន​រាយការណ៍​អំពី​ការស្លាប់​មនុស្ស​បន្ថែម​ពី​ការផ្ទុះ​វីរុស​ឆ្លង​ ដោយ​ក្នុង​រយៈពេល​២៤​ម៉ោង​កន្លងមក​មាន​អ្នកស្លាប់​ថ្មី​៧៣​នាក់​​បន្ថែម ជាហេតុ​នាំ​ឲ្យចំនួន​អ្នកស្លាប់​សរុប​ដោយ​កូរ៉ូណា​វីរុស​នេះ​ឡើងដ​ល់​៥៦៣​នាក់​។​

​ចំនួន​អ្នក​ឆ្លង​ក៏​កើន​ថេរ​ ដោយ​កាលពី​ថ្ងៃ​ពុធ មាន​អ្នក​ឆ្លង​៣.៦៩៤​នាក់ និង​សរុប​មនុស្ស​២៨.០១៨​នាក់​បាន​ឆ្លង​វីរុស​ថ្មី​នេះ​ក្នុងប្រទេស​ចិន​។​

​អាជ្ញាធរ​ក្នុង​ខេត្ត​ហ៊ូ​ប៉ី នៅ​ថ្ងៃនេះ​បាន​រាយការណ៍​អំពី​ការស្លាប់​ថ្មី​៧០​នាក់​បន្ថែម និង​អ្នក​ឆ្លង​ថ្មី​៣.១៥៦​ករណី​នៅ​ក្នុង​ខេត្ត​។​

​ក្នុងពេល​ជាមួយគ្នា អ្នក​ជំងឺបង្កឡើង​ដោយ​កូរ៉ូណា​វីរុស​១.១៥៣​នាក់​បាន​ជា​និង​ចេញ​ពី​មន្ទីរពេទ្យ​កាលពី​ថ្ងៃ​ពុធ​។​

​ក្នុង​កិច្ចប្រជុំ​គណៈរដ្ឋមន្ត្រី​កាលពី​ថ្ងៃ​ពុធ នាយករដ្ឋមន្ត្រី​ចិន​លី ឃឹ​ឈាំ​ង ​បាន​និយាយថា អាទិភាព​របស់​រដ្ឋាភិបាល​គឺ​ធានា​ថា ខេត្ត​ហ៊ូ​ប៉ី​និង​ក្រុង​វូ​ហាន​ទទួលបាន​​គ្រឿង​ផ្គត់ផ្គង់​ចាំបាច់​និង​បុគ្គលិក​ពេទ្យ​សម្រាប់​ដោះស្រាយ​នឹង​វីរុស​នេះ​។​

ចិនយកកីឡដ្ឋាននិងសាលប្រជុំដាក់គ្រែទទួលអ្នកជំងឺសិន ដោយសារល្បឿននិងទំហំនៃការឆ្លងនៅហ៊ូប៉ីធំធេង

អាជ្ញាធរ​ចិន​កាលពី​ថ្ងៃ​ពុធ​បាន​ព្រមាន​អំពី​ការខ្វះខាត​គ្រែ​អ្នក​ជំងឺ​និង​គ្រឿង​បរិក្ខា​រ​ពេទ្យ​យ៉ាងច្រើន​ដើម្បី​ដោះស្រាយ​ជាមួយនឹង​អ្នក​ជំងឺហូរ​ចូល​កាន់តែច្រើន​។​​ខេត្ត​ហ៊ូ​ប៉ី គ្រាន់​តែ​មួយ​ថ្ងៃ​ពុធ​ម្សិលមិញ មាន​អ្នក​ឆ្លង​ថ្មី​៣.១៥៦​នាក់ ។​

​ប្រឈម​នឹង​ស្ថានភាព​ធ្ងន់ធ្ងរ​បែបនេះ​​អង្គការ​សុខភាព​ពិភពលោក​​កាលពី​ថ្ងៃ​ពុធ​ទី​៥​កុម្ភៈ​​ បាន​អំពាវនាវ​រក​ជំនួយ​៦៧៥​លាន​ដុល្លារ​សម្រាប់​ផែនការ​ប្រយុទ្ធប្រឆាំង​​នឹង​កូរ៉ូណា​វីរុស​។​

​ប្រធាន​អង្គការ​បាន​និយាយ​នៅក្នុង​សន្និសីទកាសែត​មួយ​នៅ​ក្រុង​ហ្ស៊ឺ​ណែវ​ថា​«​ថ្ងៃនេះ យើង​ចាប់ផ្តើម​ការត្រៀមខ្លួន​យុទ្ធសាស្ត្រ​និង​ផែនការ​ឆ្លើយតប​…​យើង​ស្នើ​​សុំ​ប្រាក់​៦៧៥​លាន​ដុល្លារ​ដើម្បី​ទ្រទ្រង់​ផែនការ​នេះ​នៅ​រយៈពេល​៣​ខែ​ទៅ​មុខ​។​សារ​របស់​យើង​ទៅកាន់​សហគមន៍​អន្តរជាតិ​គឺ​ត្រូវ​វិនិយោគ​នៅថ្ងៃនេះ បើ​មិន​ដូច្នេះ​​ទេ​នឹង​ត្រូវ​ចំណាយ​ខ្ពស់​ជាង​នេះ​នៅ​ថ្ងៃក្រោយ​»៕​ប្រែ​សម្រួល​៖​វាសនា​/Ha

ទីតាំងផ្សាយពាណិជ្ជកម្ម

- Advertisment -

Most Popular