ដោយ:សុខុម/ស្ទឹងត្រែង:នគរបាលប្រឆាំងគ្រឿងញៀននៃស្នងការដ្ឋាននគរបាលខេត្តស្ទឹងត្រែងបានបញ្ជូនជនសង្ស័យចំនួន៣នាក់ក្នុងនោះមានស្ត្រីម្នាក់ករណីសេពគ្រឿងញៀនទៅសាលាដំបូងខេត្តស្ទឹងត្រែងកាលពីរសៀលថ្ងៃទី៦ខែកុម្ភៈឆ្នាំ២០២០។
សូមបញ្ជាក់ថាសមត្ថកិច្ចនគរបាលបានឃាត់ខ្លួនជនសង្ស័យចំនួន៣នាក់កាលពីរសៀលថ្ងៃទី៥ខែកុម្ភៈ ឆ្នាំ២០២០នៅចំណុចគីឡូម៉ែត្រលេខ៤ក្នុងភូមិរាជានុកូលសង្កាត់ក្រុងស្ទឹងត្រែង។ក្រោយពេលឃាត់ខ្លួន ជនសង្ស័យប្រុសស្រី៣នាក់នេះរួចមក សមត្ថកិច្ចរកឃើញ វត្ថុតាងសារធាតុញៀនចំនួន១០កញ្ចប់ និងធ្វើការដកហូត។
សមត្ថកិច្ចនគរបាលនៃការិយាល័យប្រឆាំងគ្រឿងញៀនខេត្តស្ទឹងត្រែងបានឲ្យដឹងថា:ជនសង្ស័យទាំង
៣នាក់ដែលពាក់ព័ន្ធ និងគ្រឿងញៀនខាងលើនេះ មានឈ្មោះ សេង សុផាន ភេទប្រុស អាយុ៣៥ឆ្នាំ មុខរបរមិនពិតប្រាកដ រស់នៅភូមិព្រែក សង្កាត់ក្រុងស្ទឹងត្រែង និងឈ្មោះ ហឿង ស្រីម៉ី(ហៅរ៉ូយ៉ាល់) ភេទស្រីអាយុ២២ឆ្នាំមុខរបរនារីបម្រើខារ៉ាអូខេរស់នៅភូមិស្ពានថ្មសង្កាត់ក្រុងស្ទឹងត្រែង។ជនសង្ស័យទាំង២នាក់នេះ ឃាត់ខ្លួនចំនុចភូមិរាជានុកូល។
ក្រោយមកក៏បានឃាត់ខ្លួនជនសង្ស័យឈ្មោះអ៊ុងសៅវី(ហៅញ៉ាញ់)ភេទប្រុសអាយុ២៥ឆ្នាំមុខរបរកម្មករ រស់នៅភូមិរាជានុកូល សង្កាត់ក្រុងស្ទឹងត្រែង ដោយសមត្ថកិច្ចប្រើវិធានញុះញុង ។នៅមុខសមត្ថកិច្ច ជនសង្ស័យប្រុសស្រីទាំង៣នាក់បានឆ្លើយសារភាពថាពួកគេពិតជាបានប្រើប្រាស់រក្សាទុកនិងចែកចាយនូវសារធាតុញៀនពិតប្រាកដមែន។
កាលពីរសៀលថ្ងៃទី៦ខែកុម្ភៈសមត្ថកិច្ចជំនាញនៃស្នងការដ្ឋាននគរបាលខេត្ត បានកសាងសំណុំរឿង និងបញ្ជូនខ្លួនជនសង្ស័យទាំង៣នាក់រួមនិងវត្ថុតាងគ្រឿងញៀនទៅកាន់តុលាការចាត់ការទៅតាមនិតិវិធីច្បាប់ ៕S/
