ដោយគូលែន/សៀមរាប:អាជ្ញាធរជាតិអប្សរាបានបញ្ជាក់ថាដំណើរការស្ថាបនាផ្លូវវាងមុខព្រះលានជល់ដំរីនិងចាប់ផ្តើមនៅដើមខែកុម្ភៈឆ្នាំ២០២០នេះដោយប្រើរយៈពេល៥ខែ។នេះគឺជាការបញ្ជាក់ឱ្យដឹងពីលោកយិតចាន់ដារដ្ឋអគ្គនាយករងអាជ្ញាធរជាតិអប្សរាកាលពីរសៀលថ្ងៃទី៦ខែកុម្ភៈឆ្នាំ២០២០។
លោកយិតចាន់ដារដ្ឋអគ្គនាយករងអាជ្ញាធរជាតិអប្សរាបាននិយាយថាគម្រោងស្ថាបនាផ្លូវកៅស៊ូថ្មីនៅលើគន្លងផ្លូវដីក្រហមចាស់ដែលមានអាយុកាលតាំងពីឆ្នាំ១៩១២ដែលមានទីតាំងនៅមុខបរិវេណប្រាសាទសួរព្រ័ត្រជំនួសការប្រើប្រាស់ផ្លូវកៅស៊ូបច្ចុប្បន្នមុខព្រះលានជល់ដំរីនឹងចាប់ផ្តើមដំណើរការសាងសង់នៅដើមខែកុម្ភៈ ឆ្នាំ២០២០ នេះ ដោយប្រើរយៈពេល៥ខែ។
លោកបានលើកឡើងថាការធ្វើផ្លូវវាងនេះគឺដើម្បីកាត់បន្ថយផលប៉ះពាល់ទៅលើរចនាសម្ព័ន្ធនៃព្រះលានជល់ដំរីដោយសាររំញ័រពីការបើកបររថយន្តនិងផ្សែងពុលពីយានយន្តគ្រប់ប្រភេទ។ពិសេសដើម្បីរក្សាសុវត្ថិភាពរបស់ភ្ញៀវទេសចរណ៍ពេលដើរឆ្លងកាត់ទៅទស្សនាប្រាសាទជៀសវាងមានគ្រោះថ្នាក់ផ្សេងៗ ព្រោះផ្លូវកៅស៊ូចាស់នេះនៅជាប់នឹងព្រះលានជល់ដំរីខ្លាំងពេក។
លោកបានបន្ថែមថាការស្ថាបនាផ្លូវថ្មីនេះមានប្រវែងសរុប១.៤២៧ម៉ែត្រទទឹង៦ម៉ែត្រជាប្រភេទផ្លូវកៅស៊ូពណ៌ក្រហមចាស់ដែលផ្តើមចេញពីផ្លូវកែងជ្រុងខាងកើតឈៀងខាងជើងនៃប្រាសាទបាយ័ន្តឆ្ពោះទៅខ្លោងទ្វារដីឆ្នាំងដោយបត់ឆ្វេងមុនទៅដល់ប្រាសាទព្រះពិធូរភ្ជាប់ទៅនឹងផ្លូវកៅស៊ូចាស់មុខវត្តទេពប្រណម្យ។
លោកបានបន្តទៀតថាក្រោយពេលសាងសង់ផ្លូវនេះរួចរាល់អាជ្ញាធរជាតិអប្សរានឹងផ្អាកការប្រើប្រាស់ផ្លូវកៅស៊ូបច្ចុប្បន្នទាំងស្រុង ហើយកែលម្អផ្លូវនោះជាសួនដាំស្មៅ ដើមឈើដើម្បីឱ្យមានទេសភាព និងបរិស្ថានល្អស្អាតនៅមុខព្រះលានជល់ដំរី ក៏ដូចជានៅក្នុងបរិវេណក្រុងអង្គរធំទាំងមូល៕S/
រូបភាព: អាជ្ញាធរជាតិអប្សរាចាប់ផ្តើមដំណើរការស្ថាបនាផ្លូវវាងមុខព្រះលានជល់ដំរី៕អប្សរា
