ដោយៈ មេសា
ភ្នំពេញៈ លោក ង៉ោ ប៉េងប៊ី មន្ត្រីគ្រប់គ្រង់ប្រព័ន្ធព័ត៌មាន នៃ មជ្ឍមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និង បាណកសាស្ត្រ បានឱ្យដឹងអំពីលទ្ធផល នៃ ការបណ្តុះបណ្តាលអ្នកស្ម័គ្រភូមិព្យាបាលជំងឺគ្រុនចាញ់ ថា គិតមកពេលនេះ មជ្ឍមណ្ឌលជាតិប្រយុទ្ធនឹងជំងឺគ្រុនចាញ់ បានបណ្តុះបណ្តាលអ្នកស្ម័គ្រភូមិព្យាបាលជំងឺគ្រុនចាញ់ សរុប ៤.៦៤៦ នាក់ ឬ ប្រមាណជា ៨០ ភាគរយ នៃ ផែនការ និង បានប្រគល់ទូរស័ព្ទស្មាតហ្វូនជាង ២ ពាន់គ្រឿង និង ផ្តល់ Tablet ដល់មន្ត្រីតាមមណ្ឌលសុខភាពដែលឋិតក្នុងតំបន់ប្រឈមនឹងជំងឺគ្រុនចាញ់ប្រមាណជា ៨ រយ គ្រឿងផ្សេងទៀត ។ ម្យ៉ាងទៀត ព័ត៌មានដែលទទួលបានពីអ្នកស្ម័គ្រភូមិព្យាបាលជំងឺគ្រុនចាញ់ គឺជាព័ត៌មានដែលមានប្រសិទ្ធភាពខ្ពស់ ! មានប្រសិទ្ធភាពខ្ពស់ ព្រោះរាល់ករណីរកឃើញជំងឺគ្រុនចាញ់ នៅតំបាន់ណាមួយ រមែងត្រូវបានផ្តល់មកទីតាំងកណ្តាល និង អ្នកពាក់ព័ន្ធ លឿនរហ័សទាន់ពេលវេលា ដែលទើបរាល់តម្រូវការផ្សេងៗ ត្រូវបានអន្តរាគមន៍ និង ឆ្លើយតបទាន់ពេលវេលា និង ចំគោលដៅ ។
លោក ង៉ោ ប៉េងប៊ី អះអាងបែបនេះ នៅក្នុងវគ្គបណ្តុះបណ្តាលអ្នកស្ម័គ្រភូមិព្យាបាលជំងឺគ្រុនចាញ់ មកពីខេត្តក្រចេះប្រមាណជា ១៤០ នាក់ អំពីការបញ្ជូនទិន្នន័យជំងឺគ្រុនចាញ់តាមប្រព័ន្ធទូរស័ព្ទ រៀបចំនៅឯសណ្ឋាគារភ្នំពេញ នាថ្ងៃទី ៦ និង ទី ៧ ខែ កុម្ភៈ ឆ្នាំ ២០២០ នេះ ។
ជាផ្នែកមួយ ដើម្បី សម្រេចបានគោលដៅលុបបំបាត់ជំងឺគ្រុនចាញ់ទាំងស្រុងនៅត្រឹមឆ្នាំ ២០២៥ មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ បានរៀបចំឱ្យមានអ្នកស្ម័គ្រចិត្តភូមិព្យាបាលជំងឺគ្រុនចាញ់ ជិត ៣ ពាន់ ភូមិ នៅក្នុង ២១ ខេត្ត ។ ពីត្រឹមឆ្នាំ ២០១៧ មជ្ឈមណ្ឌលជាតិ បានរៀបចំឱ្យមានប្រព័ន្ធបញ្ជូនទិន្នន័យជំងឺគ្រុនចាញ់ តាមទូរស័ព្ទ ហើយ ដើម្បី អាចធ្វើការនោះបាន មជ្ឈមណ្ឌលបានប្រគល់ទូរស័ព្ទស្មាតហ្វូន និងបង្ហាត់បង្រៀន ដល់អ្នកស្ម័គ្រចិត្តទាំងនោះ សម្រាប់បញ្ជូនព័ត៌មាននូវរាល់ការរកឃើញករណីជំងឺគ្រុញចាញ់នៅក្នុងគោលដៅរបស់ពួកគាត់ ហើយព័ត៌មានទាំងនោះ បានទៅដល់អ្នកពាក់ព័ន្ធទាំងឡាយ តាំងពីថ្នាក់ជាតិរហូតដល់ថ្នាក់ក្រោមជាតិ ដើម្បី ឆ្លើយតបទាន់ពេលវេលា ដែលប្រការនេះខុសឆ្ងាយពីការកាលមុនដែលត្រូវរង់ចាំររហូត ១ ខែ ឬ ខែ ឯណោះ ។
គប្បីរំឭកថា មុនឆ្នាំ ២០១១ គិតជាមធ្យមក្នុង ១ ឆ្នាំ មាន អ្នកកើតជំងឺគ្រុនចាញ់ជាង ១៧ ម៉ឺនករណី ស្លាប់ពីជាង ៥០០ នាក់ ទៅជិត ៩០០រយនាក់ ។ លុះដល់ឆ្នាំ ២០១៨ ជំងឺគ្រុនចាញ់ បានថយចុះ ៨៥ ភាគរយ កាត់បន្ថយ ករណីស្លាប់បាន ៩៩ ភាគរយ ដែលលោកវេជ្ជបណ្ឌិត ហ៊ុយ រ៉េកុល ប្រធានមជ្ឍមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និង បាណកសាស្ត្រ មានប្រសាសន៍ថា ការថយចុះនេះគឺបន្ទាប់ពីបានអនុវត្តផែនការយុទ្ធសាស្ត្រជាតិ លុបបំបាត់ជំងឺគ្រុនចាញ់២០១១-២០២៥ របស់រាជរដ្ឋាភិបាល ។
ជំងឺគ្រុនចាញ់ គឺជាជំងឺដែលគេអាចព្យាបាលយ៉ាងមានប្រសិទ្ធភាព ។ ប៉ុន្តែវានឹងក្លាយជាជំងឺដ៏កាចសហាវ អាចផ្តាច់ផ្តិលអាយុជីវិតមនុស្សបានភ្លាម ប្រសិនបើគេយឺតយ៉ាវក្នុងការព្យាបាល ឬ ព្យាបាលមិនបានត្រឹមត្រូវ ។ ហេតុនេះលោកវេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាលជាដើម តែងតែបញ្ជូនសារថា ប្រសិនបើសង្ស័យថា មានជំងឺគ្រុនចាញ់ ដូចជាក្តៅខ្លួនលើសពី ៣៨ អង្សាលើសពី ២ ថ្ងៃ គេត្រូវប្រញាប់ទៅមណ្ឌលសុខភាព ឬ អ្នកស្ម័គ្រចិត្តភូមិព្យាបាលជំងឺគ្រុនចាញ់ ចៀសវាងដាច់ខាត កុំទៅរកការផ្សំថ្នាំដោយខ្លួនឯង ឬ នៅតាមគ្លីនិកឯកជន ពុំនោះទេ គេអាចនឹងគ្រោះថ្នាក់ដល់អាយុជីវិត ៕ Kh
