ក្រសួង​ព័ត៌មាន បន្ត​ចេញដំណើរ ដើម្បី​តម្រង់ទិស​អ្នកកាសែត​!

​រដ្ឋមន្ត្រីក្រសួង​ព័ត៌មាន​លោក ខៀវ កាញារីទ្ធ កាលពី​ថ្ងៃទី​៥ ខែកុម្ភៈ ឆ្នាំ​២០២០ បានសម្រេចបង្កើត​គណៈកម្មការ​សម្របសម្រួល​ដោះស្រាយ​វិវាទ​របស់​អ្នកសារព័ត៌មាន ដែលមាន​សមា សភាព ២៣​រូប ដឹកនាំ​ដោយ​លោក​រដ្ឋមន្ត្រី​ផ្ទាល់​។

​ក្នុង​សមាសភាព​ទាំង​២៣​រូប​ក្រៅពី​តែ​ពី​អនុប្រធាន​និង​សមាជិក​ដែលជា​រដ្ឋលេខាធិការ​អនុ​រដ្ឋ លេខាធិការ អគ្គនាយក ទីប្រឹក្សា ប្រធាន​នាយកដ្ឋាន អគ្គនាយករង អនុប្រធាន នាយកដ្ឋាន ប្រធានការិយាល័យ និង​អនុប្រធាន​ការិយាល័យ ក្នុង​ក្របខណ្ឌ​ក្រសួង​ព័ត៌មាន​ក៏មាន​សមាជិក គណៈកម្មការ​បួនរូប ជា​ប្រធាន​សមាគម និង​ក្លិប​អ្នកកាសែត ផងដែរ​។​

​ក្នុងចំណោម​សមាសភាព​គណៈកម្មការ​ទាំង ២៣​រូប គឺមាន​សមាជិក​បួនរូប ជា​ប្រធាន​សមាគម និង​ក្លិប​អ្នកកាសែត រួមមាន មួយ​.​លោក ហ៊ុយ វណ្ណៈ​ប្រធាន​សហភាព​សហព័ន្ធ​អ្នកសារព័ត៌មាន កម្ពុជា ស​.​ស​.​ស​.​ក ,​ពីរ​.​លោក ប៉ែន បូ​ណា ប្រធាន​ក្លិប​អ្នកកាសែត​កម្ពុជា​, បី​.​លោក ថា​ន វុត្ថា ប្រធាន​សមាគម​អ្នកសារព័ត៌មាន​កម្ពុជា ដើម្បី​សេរីភាព និង​បួន​.​លោក អ៊ុំ សារិន ប្រធាន សមាគម​កម្ពុជា​ការពា​រ​អ្នកកាសែត​។​

​សេចក្តីសម្រេច លើកឡើងថា គណៈកម្មការ​នេះ មាន​ភារកិច្ច​ប្រាំពីរ​ចំណុច រួមមានៈ ១.​សម្រប សម្រួល​វិវាទ​របស់​អ្នកសារព័ត៌មាន​បាន​ចុះបញ្ជី​នៅ​ក្រសួង​ព័ត៌មាន​ដែល​ត្រូវ​ទទួលរង​ការប្តឹងតវ៉ា​ពី​ភាគី​ពាក់ព័ន្ធ​ក្នុងពេល​បំពេញ​វិជ្ជាជីវៈ​, ២-.​ទទួល​ពាក្យបណ្តឹង​របស់​អ្នកសារព័ត៌មាន​ដែល មាន​វិវាទ​ក្នុងពេល​បំពេញ​វិជ្ជាជីវៈ​, ៣-.​ពិនិត្យ សិក្សា​អំពី​អង្គហេតុ​និង​អង្គច្បាប់​លើ​បណ្តឹង នីមួយៗ ជូន​ថ្នាក់ដឹកនាំ​សម្រេច​, ៤.​ពិគ្រោះ​យោបល់​ដើម្បី​ពិភាក្សា​អំពី​ព្យសនកម្ម​ដែល​អាច កើតមាន​ជាយថាហេតុ​មុននឹង​ចេញផ្សាយ​អត្ថបទ​ព័ត៌មាន​ទាក់ទង​នឹង​បញ្ហា​រសើប​, ៥.​សម្រប សម្រួល​ក្នុងការ​បញ្ជូន​ពាក្យបណ្តឹង​របស់​អ្នកសារព័ត៌មាន​មាន​វិជ្ជាជីវៈ​ទៅ​ក្រុម​មេធាវី​ស្ម័គ្រចិត្ត សម្តេច​តេ​ជោ សែន​, ៦.​តាមដាន​ការអនុវត្ត​នីតិវិធី​ប​ណ្តឹ​ង​នីមួយៗ តាំងពីដើម រហូត​បញ្ចប់ និង​៧.​ធ្វើ​របាយការណ៍​ជា​ទៀងទាត់​ជូន​ថ្នាក់ដឹកនាំ​។​

​ជាមួយនឹង​សេចក្តីសម្រេច​បង្កើត​គណៈ​កម្ម​ការ​ខាងលើនេះ កាលពី​ថ្ងៃទី​៦ ខែកុម្ភៈ ឆ្នាំ​២០២០ ក្រសួង​ព័ត៌មាន​ក៏បាន​ប្រកាស​ពី​ការរៀបចំ​សិក្ខាសាលា​ស្តីពី​ការផ្សាយ​ព័ត៌មាន​ប្រកបដោយ​វិជ្ជាជីវៈ និង​ក្រមសីលធម៌ នៅ​ថ្ងៃទី​១២​កុម្ភៈ ដើម្បី​បញ្ជ្រាប​ការយល់ដឹង​ដល់​អ្នកសារព័ត៌មាន សំដៅ​ដល់​ការធានា​ការផ្សព្វផ្សាយ​ព័ត៌មាន​ប្រកបដោយ​វិជ្ជាជីវៈ​ចៀសវាង​ការផ្សព្វផ្សាយ ព័ត៌មាន​មិន​ពិត ដែលមាន​លក្ខណៈ​ញុះញង់ បង្កាច់បង្ខូច បំប៉ោង​ស្ថានការណ៍ ឬ​ព្រឹត្តិការណ៍ ណាមួយ នាំឱ្យ​សាធារណជន មានការ​ភាន់ច្រឡំ​។ សិក្ខាសាលា​នេះ នឹងធ្វើ​ឡើង​នៅ​សាល សត្យា ក្នុង​ទីស្តីការក្រសួង​ព័ត៌មាន​។​

​ក្នុង​សេចក្តីប្រកាស ក្រសួង​ព័ត៌មាន ក៏បាន​គូសបញ្ជាក់ថា ដោយសារ​មានការ​កំណត់​ចំនួន អ្នកចូលរួម ដូច្នេះ​ក្រសួង តម្រូវ​ឲ្យ​អ្នកសារព័ត៌មាន ចុះឈ្មោះ នៅ​អគ្គនាយកដ្ឋាន​ព័ត៌មាន និង​សោតទស្សន៍ ឲ្យ​បាន​មុន​ថ្ងៃទី​១០ ខែកុម្ភៈ ឆ្នាំ​២០២០​។

​ការបង្កើត​គណៈកម្មកា​រ រួមទាំង​ការរៀបចំ​សិក្ខាសាលា​ខាងលើនេះ បានធ្វើ​ឡើង​ក្រោយ​ពិធីជួបជុំ​រវាង​សម្តេច​តេ​ជោ នាយករដ្ឋមន្ត្រី ហ៊ុន សែន ជាមួយ​អ្នកសារព័ត៌មាន លើក​ទី​៤ កាលពី​ថ្ងៃទី​១៤ ខែមករា ឆ្នាំ​២០២០​។ ក្នុង​ពិធី​ជួបជុំ សម្តេច​តេ​ជោ បានផ្តល់​នូវ​យន្តការ​ពារ ដែលជា​គាថា សម្រាប់​អ្នកសារព័ត៌មាន នោះ​គឺ «​អ្នកសារព័ត៌មាន កុំ​បំពាន​សិទ្ធិ​អ្នកដទៃ និង​កុំ​បំភ្លៃ​ការពិត​»​។​

​ក៏ប៉ុន្តែ​កាលពីពេល​ថ្មី នៅពេល​ជំងឺ​កូ​រ៉ូ​ណា កំពុង​ផ្ទុះឡើង ស្រាប់​តែមាន​អ្នកលេង​ហ្វេ​ស​ប៊ុ​ក ដែល​តាំងខ្លួន​ជា​អ្នកសារព័ត៌មាន​មួយចំនួន បែរជា​ផ្សព្វផ្សាយ រាយការណ៍​ព័ត៌មាន​មិន​ពិត បង្ក​ជាការ​យល់ច្រឡំ​ដល់​មហាជន ពាក់ព័ន្ធ​នឹង​ជំងឺ​ដ៏​កាច​សាហាវ​នេះ បង្ក​ជា​ប្រតិកម្ម​មិនតិច​ទេ ពី​មហាជន ប្រតិកម្ម​ពី​អ្នកសារព័ត៌មាន​ប្រកប​វិជ្ជាជីវៈ​ត្រឹមត្រូវ​រហូត ដល់​មានប្រតិកម្ម​ពីស​ម្តេច តេ​ជោ នាយករដ្ឋមន្ត្រី ហ៊ុន សែន ទៅទៀត​។​

​ក្រោយ​ហេតុការណ៍​ផ្សព្វផ្សាយ​ព័ត៌មាន​បំផ្លើស ខុស​ការពិត​តាម​ហ្វេ​ស​ប៊ុ​ក​នោះ​រួចមក អ្នក​ផ្សាយ​នោះ ក៏បាន​ទទួលស្គាល់​កំហុស និង​បាន​សូមទោស​មហាជន​ហើយក៏​ត្រូវ​ក្រសួង ព័ត៌មាន ហៅ​ទៅ​អប់រំ ណែនាំ​ផងដែរ​។​

​ក្នុងដំណាក់កាល​នេះ សម្តេច​តេ​ជោ ហ៊ុន សែន ក្នុងនាម​ជា​ប្រមុខ​រាជរដ្ឋាភិបាល​បានប្រកាស យក​វិធាន​ការអប់រំ ណែនាំ​ដល់​អ្នក​ផ្សាយ​ព័ត៌មាន​ខុស​ការពិត ជាជាង​ការប្រើ​វិធានការ​ច្បាប់ រហូតដល់​ប្រើ​គុក​ច្រវាក់ លើ​អ្នក​ផ្សាយ​ព័ត៌មាន​មិន​ពិត​។​

​យ៉ាងណាក៏ដោយ អ្នកលេង​ហ្វេ​ស​ប៊ុ​ក ដែល​ចង់​តាំងខ្លួន​ជា​អ្នកសារព័ត៌មាន​គួរតែ​ស្វែងរក ពី​មូលដ្ឋានគ្រឹះ ក្រមសីលធម៌ វិជ្ជាជីវៈ​អ្នកសារព័ត៌មាន​ឲ្យ​បាន​ត្រឹមត្រូវ​មុននឹង​ចេញផ្សាយ ផ្ទាល់​តាម​ហ្វេ​ស​ប៊ុ​ក​ឬក៏​ផ្សាយ​ព័ត៌មាន​អ្វីមួយ​។​ការស្វែងរក​ទ្រឹស្តី​មេរៀន ក្រមសីលធម៌ វិជ្ជាជីវៈ​សារព័ត៌មាន ក៏​អាច​ធ្វើបាន​យ៉ាង​ស្រួល តាម​ប្រព័ន្ធ​អន​ឡាញ​ហើយ​បើ​ចង់​ចូលរៀន សូត្រ ក៏​មិន​ពិបាក ហើយក៏​មិន​អស់​លុយ​ឡើយ ដោយមាន​ក្រសួង​ព័ត៌មាន សមាគម ក្លិប​អ្នកកាសែត បើ​បង្ហាត់បង្ហាញ​។ ក្នុងនោះ ក្រសួង​ព័ត៌មាន ក៏បាន​ប្រកាស​រួចហើយ​ថា បើសិនជា​អង្គភាព​សារព័ត៌មាន ឬក៏​សមាគម ក្លិប​អ្នកកា សែត ចង់​បើក​បង្រៀន​អ្នកសារព័ត៌មាន ក៏​គួរ​សហការ និង​ផ្តល់​វាគ្មិន​ចំណានៗ ដែលជា​អ្នកកាសែត​ជើងចាស់ ចូលរួម​សហការ បង្រៀន​ដោយ​មិន​គិត​ប្រាក់​ថែមទៀត​ផង​។​

​សរុបមក ឱ្យតែ​អនុវត្តតាម​តួនាទី ក្រមសីលធម៌ វិជ្ជាជីវៈ​អ្នកសារព័ត៌មាន ពិសេស​ចាំ​កុំ​ភ្លេច​នូវ ពាក្យ​មួយ​ឃ្លា​ខ្លី​របស់​សម្តេច​តេ​ជោ គឺ «​អ្នកសារព័ត៌មាន កុំ​បំពាន​សិទ្ធិ​អ្នកដទៃ និង​កុំ​បំភ្លៃ ការពិត​» ដរាប​នោះ​អ្នកសារព័ត៌មាន​យើង មិនមាន​រឿង ត្រូវគេ​ប្តឹង ឬក៏​គេ​ប្រតិកម្ម​អ្វី​នោះទេ​។ ម្យ៉ាងទៀត សូមអ្នក​ចង់​ធ្វើជា​អ្នកសារព័ត៌មាន ចងចាំ​ថា សារព័ត៌មាន មិនមែនជា​មុខរបរ ដែល​រកលុយ​បាន​ច្រើន ក្លាយជា​អ្នកមាន​ទ្រព្យធន​នោះទេ បើសិនជា​អ្នក​ប្រកប​តាម​ក្រម សីលធម៌ វិជ្ជាជីវៈ​ត្រឹមត្រូវ​។ ប៉ុន្តែ​មុខរបរ​អ្នកសារព័ត៌មាន​នេះ ជា​អាជីព​សេរី ដែលជា​អ្នក​នាំសារ និង​ជា​កញ្ចក់​ឆ្លុះ​សង្គម ដើម្បី​ចូលរួម​ជា​ដៃគូ ក្នុង​ការកសាង អភិវឌ្ឍន៍ និង​រក្សាសុខ​សន្តិភាព ជូន​សង្គមជាតិ​យើង​៕ ដោយ​:​ម៉េង​ឆៃ​

ទីតាំងផ្សាយពាណិជ្ជកម្ម

- Advertisment -

Most Popular

ក្មេងស្រី​អាយុ​មួយឆ្នាំ ប...

​ដោយៈ ស​រិ​ទ្ធ / កណ្ដាលៈ ...

លើក​ពេល​សវនាការ សំណុំរឿង​...

​ដោយៈ ស​រិ​ទ្ធ / ភ្នំពេញៈ...

រដ្ឋបាល​រាជធានី បាន​នឹង​ក...

ដោយៈ រ៉ា​ម៉ន / ភ្នំពេញៈ ល...

សម្តេច​តេ​ជោ​ស្នើឱ្យ​មេធា...

ដោយៈ​តារា​រិ​ទ្ធ​/​ភ្នំពេ...