Home ព័ត៌មានអន្តរជាតិ ២៧​នាក់​ស្លាប...

២៧​នាក់​ស្លាប់​និង​៥២​នាក់​រងរបួស​ក្នុង​ការបាញ់ប្រហារ​នៅ​ផ្សារ​ថៃ​

​នាយករដ្ឋមន្ត្រី​ថៃ លោក​ប្រា​យុទ្ធ ចាន​អូ​ចា បាន​និយាយ​កាលពី​ថ្ងៃអាទិត្យ​ទី​០៩​កុម្ភៈ​ថា​ទាហាន​ថៃ​ម្នាក់​ដែល​បាន​ប្រព្រឹត្ត​ដូច​កម្រោលចូល​នៅក្នុង​ផ្សារ​នៅ​ទីក្រុង​​ភាគ​ឦសាន្ត​មួយ​បាន​សម្លាប់​មនុស្ស​២៦​នាក់​និង​បង្ក​របួស​៥២​នាក់​ផ្សេង​ទៀត​។​

​បើ​តាម​លោក​ប្រា​យុទ្ធ ដែល​បាន​ធ្វើដំណើរ​ទៅ​កាន់​ទីក្រុង​នគរ រ៉ា​ចា​ស៊ី​ម៉ា ដើម្បី​សួរ​សុខទុក្ខ​អ្នករងរបួស ទាហាន​ជា​ឃាតករ​នេះ​បាន​ជំរុញ​ទឹកចិត្ត​អោយ​ធ្វើការ​​បាញ់បោះ​មិន​រើសមុខ​នេះ​ដោយសារតែ​ការប្រណែន ពាក់ព័ន្ធ​នឹង​កិច្ចព្រមព្រៀង​ដីធ្លី​មួយ​ដែល​រូប​គេ​យល់​ថា​ត្រូវ​គេ​បោកប្រាស់​។​

​លោក​ប្រយុទ្ធ​បាន​និយាយ​នៅក្រៅ​មន្ទីរពេទ្យ​ថា​«​វា​ជា​ហេតុការណ៍​ដែល​មិន​ធ្លាប់​មាន​នៅ​ថៃ និង​ខ្ញុំ​ចង់​អោយ​រឿង​បែប​នេះ​កើតមាន​ជា​ចុងក្រោយ​»​។​

​ទាហាន​ដៃដល់​នេះ​ក៏​ត្រូវ​បាន​កងកម្លាំង​ប្រដាប់អាវុធ​បាញ់សម្លាប់​បន្ទាប់ពី​ការឡោមព័ទ្ធ​ផ្សារ​និង​បាញ់​គ្នា​ពេញ​មួយ​យប់​បន្ត​ដល់​ដើម​ថ្ងៃអាទិត្យ នៅ​ផ្សារ​Terminal 21 ។​

​ខ្មាន់កាំភ្លើង​ក៏បាន​បាញ់សម្លាប់​កុម្មង់ដូ​ថៃ​ម្នាក់​ក្នុង​កងកម្លាំង​ពិសេស​។​

​បើ​តាមរយ​ការណ៍ ទាហាន​អាយុ​៣២​ឆ្នាំ​ឈ្មោះ ចាក់​ក្រា​ផាន ថូ​ម​ម៉ា​នេះ​បាន​បាញ់​លើ​ផ្ទះ​មួយ បន្ទាប់​មក​រត់​ទៅ​កាន់​បន្ទាយ​ទាហាន​និង​បាញ់​សម្លាប់​ទាហាន​ជា​​គូកន​ខ្លួន រួមទាំង​មេ​បញ្ជាការ​របស់​ខ្លួន​ម្នាក់ ព្រម​ទាំង​ស្ត្រី​ម្នាក់​នៅ​ក្នុង​បន្ទាយ​នៅ​ក្រៅ​ក្រុង​នគរ រ៉ា​ចា​ស៊ី​ម៉ា​។​ក្រោយមក​ជនល្មើស ប្រដាប់​ដោយ​កាំភ្លើង​វែង បាន​​ពង្រត់​រថយន្តយោធា​Humvee​និង​បើក​ទៅកាន់​ផ្សារ​លក់ដូរ​ដែលមាន​មនុស្ស​ច្រើន​មួយ មុន​ធ្វើ​ការបាញ់សម្លាប់​និង​បាន​ចាប់​មនុស្ស​១៦​នាក់​ធ្វើ​ជា​ចំណាប់ខ្មាំង​។​

​កងកម្លាំង​ប៉ូលិស​និង​កង​កុម្ម៉ង់ដូ​ទៅ​ពី​កងកម្លាំង​ពិសេស​ត្រូវ​បាន​បញ្ជូន​ចូល​ផ្សារ​នៅ​ក្នុង​ខេត្ត​កូរ៉ា​ត​ដើម្បី​បង្ក្រាប​ឃាតករ​និង​ជួយ​ជម្លៀស​មនុស្ស​នៅក្នុង​ផ្សារ​​រាប់រយ​នាក់​។​មេទ័ព​ថៃ លោក អា​ពី​រ៉ា​ត កុង​សំពង់ ក៏​មាន​វត្តមាន​នៅ​ទីនោះ​។​

​ម្តាយ​ជនល្មើស​ក៏​ត្រូវបាន​សមត្ថកិច្ច​នាំ​ទៅកាន់​កន្លែង​ប្រទាញប្រទង់​គ្នា​ដើម្បី​បញ្ចុះបញ្ចូល​អោយ​កូន​គាត់​ប្រគល់​ខ្លួន​។​ជនល្មើស​បាន​ព្យាយាម​រត់​គេ​ចេញពី​ផ្សារ​តែ​​ពើបប្រទះ​កងកម្លាំងប្រដាប់អាវុធ​ហើយ​ក៏​ផ្ទុះ​អាវុធ​មួយ​ប្រាវ​បណ្តាលអោយ​ស្លាប់​ទាហាន​ម្នាក់​និង​របួស​២​នាក់​ទៀត​។​បន្ទាប់ពី​បាញ់​ជាមួយ​កងកម្លាំង​ប្រដាប់អាវុធ​ ជននេះ​បាន​ដកថយ​ទៅសម្ងំ​លាក់ខ្លួន​នៅ​ជាន់ក្រោយ​នៃ​ផ្សារ​និង​ត្រូវបាន​បាញ់សម្លាប់​នៅ​ជិត​ភ្លឺ​ថ្ងៃ​៩​កុម្ភៈ​៕​ប្រែ​សម្រួល​៖​វាសនា​

​ចាក់​ក្រា​ផាន ថូ​ម​ម៉ា ជា​នាយទោ​ក្នុង​កងទ័ព​ថៃ ។​ជន​នេះ​ធ្លាប់​ហ្វឹកហាត់​ស៊ី​ប​និង​ជា​គ្រូ​បាញ់​ស៊ី​ប​

​រាប់រយ​នាក់​ត្រូវបាន​ជម្លៀស​និង​ជាង​៥០​នាក់​រងរបួស​ក្នុងការ​បាញ់​ត​គ្នា​នៅ​ផ្សារ​មួយ​នៅ​ថៃ​ភាគ​ឦសាន្ត​កាលពី​យប់​ថ្ងៃសៅរ៍​

ទីតាំងផ្សាយពាណិជ្ជកម្ម

- Advertisment -

Most Popular