ម៉ាឡេស៊ី បង្កើន​បំរាម​លើ​អ្នកដំណើរ​ចិន នៅពេល​ហ្វីលីពីន​ជម្លៀស​ពលរដ្ឋ​ខ្លួន​

288
ចែករម្លែក

​ម៉ាឡេស៊ី​បាន​ពង្រីក​បំរាម​លើ​ភ្ញៀវ​មក​ពី​ចិន​ដោយ​ឥឡូវ​រួមបញ្ចូល​ខេត្ត​ហ្សេ​ជាំង​និងជាំង​ស៊ូ​ផងដែរ បន្ទាប់​ពី​ចិន​សំរេច​រាំងខ្ទប់​ទីក្រុង​ជាច្រើន​នៅក្នុង​ខេត្ត​​ទាំងពីរ ដើម្បី​ទប់ស្កាត់​ការឆ្លង​រាលដាល​នៃ​កូរ៉ូណា​វីរុស​។​

​ប្រទេស​នៅ​អាស៊ីអាគ្នេយ៍​មួយ​នេះ​កាលពី​ថ្ងៃ​២៧​មករា​បាន​ដាក់​បំរាម​បណ្តោះអាសន្ន​លើ​អ្នកដំណើរ​មកពី​ទីក្រុង​វូ​ហាន និង​មក​ពី​ខេត្ត​ហ៊ូ​ប៉ី ដែល​ជា​ស្នូល​នៃ​ការ​​ផ្ទុះ​វីរុស​ឆ្លង​។​

​ឧបនាយក​រដ្ឋមន្ត្រី​ម៉ាឡេស៊ី បាន​និយាយថា ការ​សំ​រេ​ចិត្ត​ពង្រីក​បំរាម​លើ​អ្នកដំណើរ​ចិន​នេះ កើត​ឡើង​បន្ទាប់ពី​ចិន​ពង្រីក​ការ​រាំងខ្ទប់​ចលនា​មនុស្ស​នៅ​៥​ទី​​ក្រុង​ក្នុង​ខេត្ត​ហ្សេ​ជាំង​និង​ទីក្រុង​២​នៅក្នុង​ខេត្ត​ជាំ​ង​ស៊ូ​។​លោកស្រី​ឧបនាយករដ្ឋមន្ត្រី​បានបញ្ជាក់​ថា «​ការ​រឹតត្បិត​ការ​ធ្វើ​ដំណើរ​នេះ​នឹង​អនុវត្ត​លើ​អ្នកដំណើរ​​ទាំងអស់​មិន​ថា​ជនជាតិ​ណា​ទេ អោយ​តែ​បាន​ទៅ​ខេត្ត​ហ៊ូ​ប៉ី ហ្សេ​ជាំង​និងជាំង​ស៊ូ​។​

​សូមបញ្ជាក់​ថា គិត​មក​ត្រឹម​ថ្ងៃ​សៅរ៍ ម៉ាឡេស៊ី​បាន​រកឃើញ​អ្នក​ផ្ទុក​កូរ៉ូណា​វី​រុសចំនួន​១៦​ករណី តែ​២​នាក់​បាន​ចេញ​ពី​មន្ទីរពេទ្យ​បន្ទាប់​ពី​ជា​ពី​ជម្ងឺ​។​

​ជុំវិញ​កូរ៉ូណា​វីរុស​នេះ​ដែរ កាលពី​ថ្ងៃអាទិត្យ​ហ្វីលីពីន​បាន​នាំ​ពលរដ្ឋ​ខ្លួន​៣០​នាក់​ពី​ទីក្រុង​វូ​ហាន​មកកាន់​ប្រទេស​វិញ​។​

​ក្រសួងការបរទេស​ហ្វីលីពីន​បាន​និយាយថា ជន​ដែល​ត្រូវ​នាំមក​ប្រទេស​វិញ​មាន មនុស្ស​ធំ​២៩​នាក់ និង​ក្មេង​ម្នាក់​។​ពួកគេ​ជិះ​តាម​យន្តហោះ​ឈ្នួល​ដែល​ក្រសួង​ការ​​បរទេស​និង​ក្រសួង​សុខាភិបាល​បាន​រៀបចំ​ឡើង​។​

​ក្រោយពី​បាន​ទៅ​ដល់​មូលដ្ឋាន​ទ័ពអាកាស​ក្លា​ក ចម្ងាយ​៨០​គីឡូម៉ែត្រ​ពី​រដ្ឋធានី​ម៉ានីល ពួកគេ​រួម​ជាមួយ​ក្រុម​មន្ត្រី​រដ្ឋ​១០​នាក់​ត្រូវបាន​ដឹក​ទៅកាន់​ភូមិ​ក្បែរ​នោះ​​ដើម្បី​ដាក់​នៅ​ដាច់​ពី​គេ​១៤​ថ្ងៃ​។​

​មាន​ជនជាតិ​ហ្វីលីពីន​ប្រមាណ​៣០០​នាក់​នៅក្នុង​ខេត្ត​ហ៊ូ​ប៉ី តែ​ពួកគេ​ខ្លះ​មិន​មាន​បំណង​វិល​មក​ស្រុក​វិញ​ទេ​ខណៈ​ខេត្ត​ចិន​មួយ​នេះ​រង​ការវាយប្រហារ​ពី​ជម្ងឺឆ្លង​៕

ជន​ហ្វីលីពីន​ដែល​ស្ម័គ្រចិត្ត​វិល​មក​ស្រុក បាន​ចេញដំណើរ​ពី​ក្រុង​វូ​ហាន កាលពី​ថ្ងៃ​០៩​កុម្ភៈ​

ទីតាំងផ្សាយពាណិជ្ជកម្ម