ថ្នាក់លើ ខំ​កែទម្រង់ បង្រួម​ការិយាល័យ​ចំណុះ​ក្រុង​ស្រុក​ខណ្ឌ រីឯ​ថ្នាក់ក្រោម​ជាតិ សូម​ខិតខំ​ផ្តល់​សេវា​!

​គម្រោង​បង្រួម​ការិយាល័យ​ចំណុះ​ក្រុង​ស្រុក​ខណ្ឌ ដែលជា​ការកែសម្រួលរ​ច​នា​សម្ព័ន្ធ​រដ្ឋបាល ក្រុង​ស្រុក​ខណ្ឌ​នៅ​ទូទាំងប្រទេស ត្រូវបាន​ក្រសួងមហាផ្ទៃ​ប្រកាសថា នឹងត្រូវ​អនុវត្ត​ជា​ផ្លូវការ នៅ​អំឡុង​ខែកុម្ភៈ ឆ្នាំ​២០២០​នេះហើយ​។

​ក្រសួងមហាផ្ទៃ​បានចេញ​លិខិត ណែនាំ​ទៅកាន់​អភិបាល​រាជធានី​-​ខេត្ត អំពី​យន្តការ នេះ ដែលជា​ផ្នែក​មួយ​នៃ​ការធ្វើកំណែទម្រង់​រដ្ឋបាល​នៅ​ថ្នាក់មូលដ្ឋាន​ពង្រឹង​ប្រសិទ្ធិ ភាព​នៃ ការផ្ដល់សេវា​សាធារណៈ​ជូន​ប្រជាពលរដ្ឋ​។

​ពីមុន រដ្ឋបាល​ក្រង​ស្រុក​ខណ្ឌ​ទូទាំងប្រទេស មាន​ការិយាល័យ​ចំណុះ​ច្រើន ស្កេ​ក​ស្កះ​ទៅតាម វិស័យ​នីមួយៗ​។ ប៉ុន្តែ​នៅពេលនេះ ការិយាល័យ​ទាំងនោះ ត្រូវបាន​កែសម្រួល ដោយ​ប្រ​មួល​ផ្ដុំ មក​បង្កើតជា​ការិយាល័យ​រួម ទៅតាម​ប្រភេទ​វិស័យ ដែលមាន​ទំនាក់ទំនង​ជាមួយគ្នា​។

​សេចក្ដីណែនាំ​របស់​ក្រសួងមហាផ្ទៃ​ចុះហត្ថលេខា​ដោយ​លោក សក់ សេដ្ឋា រដ្ឋលេខា ធិការ ប្រចាំការ​បានលើកឡើង​ថា ថ្នាក់ដឹកនាំ​រាជធានី​ខេត្ត​ទាំងអស់ ត្រូវ​រៀបចំ​កម្មវិធី និង​បែងចែក ថ្នាក់ដឹកនាំ ធ្វើជា​អធិបតី​នៃ​ពិធី​ប្រកាស ដាក់​ឲ្យ​ដំណើរការ​រចនាសម្ព័ន្ធ​ក្រុង​ស្រុក​ខណ្ឌ នៅក្នុង​ដែន​សមត្ថកិច្ច​របស់ខ្លួន ដោយ​ពិធី​នេះ ត្រូវ​រៀបចំឡើង​ឱ្យបាន នៅ​ចន្លោះ​ពីថ្ងៃ​ទី​១០ ដល់​ថ្ងៃទី​១៤ ខែកុម្ភៈ ឆ្នាំ​២០២០​នេះ​។

​អនុក្រឹត្យ​ស្ដីពី​ការកែសម្រួល​មុខងារ និង​រចនាសម្ព័ន្ធ​ក្រុង​ស្រុក​ខណ្ឌ បង្ហាញថា ចាប់ពី​ពេលប្រកាស​ឱ្យ​ដំណើរការ​តទៅ ការិយាល័យ​មួយចំនួន ដែល​ពីមុន ថ្វីដ្បិតតែ​ស្ថិត ក្រោម​ចំណុះ រដ្ឋបាល​ក្រុង​ស្រុក​ខណ្ឌ ប៉ុន្តែ​ការសម្រេចចិត្ត​នានា ត្រូវ​ឆ្លង​ក្រសួងសាមី​នោះ​ពេលនេះ​នឹងត្រូវ ផ្ទេរ​ឱ្យមក​ស្ថិតក្រោម​រដ្ឋបាល​ក្រុង​ស្រុក​ខណ្ឌ​និង​ស្ថិតក្រោម​ការសម្រេច​រប​ស់​ថ្នាក់ដឹកនាំ ក្រុង​ស្រុក​ខណ្ឌ ដើម្បីឱ្យ​ការសម្រេចចិត្ត​នានា ក្នុង​ការផ្ដល់សេវា​ជូន​ប្រជាពលរដ្ឋ​មាន​ភាព​ឆាប់ រហ័ស ប្រសិទ្ធភាព និង​តម្លាភាព​។​
​ ​
​គេ​នៅ​ចាំបាន​ថា ក្នុង​ពិធី​ប្រកាស​ឱ្យ​អនុវត្ត​អនុក្រឹត្យ​ស្ដីពី​ការកែសម្រួល​រចនាសម្ព័ន្ធ​ក្រុង​ស្រុក ខណ្ឌ កាលពី​ចុងឆ្នាំ​២០១៩ សម្ដេច​ក្រឡាហោម ស ខេង ឧបនាយក រដ្ឋមន្ត្រីរ​ដ្ឋ​មន្ត្រី​ក្រសួង មហាផ្ទៃ បាន​ចាត់ទុកជា​ប្រវត្តិសាស្ត្រ​ថ្មី​ទៀត​នៃ​កំណែទម្រង់​វិមជ្ឈការ និង​វិសហមជ្ឈការ​។ នោះ​គឺ​សិទ្ធិអំណាច​សម្រេចចិត្ត និង​ធនធាន ត្រូវបាន​ផ្ទេរ​ពី​ថ្នាក់ជាតិ មកឱ្យ​ថ្នាក់មូលដ្ឋាន ដើម្បី​ធានាថា រាល់​ការសម្រេចចិត្ត និង​ការផ្ដល់ សេវា​នានា ជូន​ប្រជាពលរដ្ឋ នឹងត្រូវ​តាម សេចក្ដីត្រូវការ​របស់​ពលរដ្ឋ​។​

​នៅ​ឆ្នាំ​២០២០​នេះ ក្រសួងមហាផ្ទៃ ក៏បាន​ប្រកាសថា​តំណាលគ្នា​នឹង​ការកែសម្រួល​រចនាសម្ព័ន្ធ ក្រុង​ស្រុក​ខណ្ឌ​ដើម្បី​បង្កើន​ការផ្ដល់​សិទ្ធិអំណាច​មកឱ្យ​រដ្ឋបាល​ថ្នាក់ក្រោម​ជាតិ​នោះ​រាជ​រដ្ឋា ភិ​បាល ក៏​បានចេញ​អនុក្រឹត្យ​ផ្ទេរ​សមត្ថកិច្ច​គ្រប់គ្រង​ចាត់ចែង​ប្រចាំថ្ងៃ​នៃ​មន្ទីរ​សុខាភិបាល និង​មន្ទីរពេទ្យ​ខេត្ត មន្ទីរពេទ្យបង្អែក​ស្រុក មណ្ឌល​សុខភាព និង​ប៉ុស្តិ៍​សុខភាព​ពី​ក្រសួង​សុខា ភិ​បាល មកឱ្យ​រដ្ឋបាល​រាជធានី​ខេត្ត​វិញ លើកលែងតែ​ធនធាន​ពេទ្យ និង​ឱសថ​ប៉ុណ្ណោះ​។​

​យ៉ាងណា​ក៏ដោយចុះ ការកែសម្រួល​រចនាសម្ព័ន្ធ​រដ្ឋបាល​ក្រុង​ស្រុក​ខណ្ឌ នៅ​ទូទាំង ប្រទេស តាមរយៈ​ការ​បង្រួម​ការិយាល័យ​ចំណុះ​ក្រុង​ស្រុក​ខណ្ឌ​នេះ​នឹង​កាន់តែ​ធ្វើ​ឲ្យ​ប្រជាពលរដ្ឋ ងាយស្រួល ក្នុងការ​ទទួលបាន​សេវា​របស់ខ្លួន ដូច​អ្វីដែល​សាលាក្រុង ស្រុក ខណ្ឌ​បាន​អនុវត្ត រួចមកហើយ តាមរយៈ​ការិយាល័យ​ច្រកចេញចូល​តែមួយ​។ ការិយាល័យ​ច្រកចេញចូល តែមួយ ដែល​នៅ​រាជធានី​ភ្នំពេញ ទាំង​ខណ្ឌ​ទាំង ១៤ បាន​បើក​ដំណើរការ​រួចហើយ​។ ចំណែក ស្រុក​ក្រុង​ខ្លះទៀត បាន​ដំណើរការ​ហើយ​ដែរ តែ​មិនទាន់បាន​ទូទាំងប្រទេស​នៅឡើយ​ទេ​។​

​ក្រសួងមហាផ្ទៃ បានប្រកាសថា កម្ពុជា បានរៀបចំ​ឲ្យ​មាន​យន្តការ​ការិយាល័យ​ច្រកចេញចូល​តែមួយ នៅតាម​ក្រុង​ស្រុក​ខណ្ឌ សម្រាប់​ការផ្តល់សេវា និង​ការិយាល័យ​ប្រជាពលរដ្ឋ សម្រាប់​ទទួល និង​សម្របសម្រួល​ដោះស្រាយ​ពាក្យបណ្តឹង នៅ​រដ្ឋបាល​ថ្នាក់ក្រោម​ជាតិ កាលពី​ឆ្នាំ​២០០៣ ស្របតាម​ការធ្វើកំណែទម្រង់​រដ្ឋបាល​សាធារណៈ​ដោយ​ដាក់​ឲ្យ​ដំណើរការ សាកល្បង ដំបូង​គេ នៅ​ក្រុង​បាត់ដំបង ខេត្តបាត់ដំបង និង​នៅ​ក្រុង​សៀមរាប ខេត្តសៀមរាប​។​
​ ​
​គិត​ត្រឹម​ដំណាច់ឆ្នាំ​២០១៩ ការិយាល័យ​ច្រកចេញចូល​តែមួយ និង​ការិយាល័យ​ប្រជាពលរដ្ឋ ត្រូវបាន​បង្កើតឡើង នៅ​ក្រុង​ស្រុក​ខណ្ឌ ចំនួន ១១៥ ក្នុងចំណោម​ក្រុង​ស្រុក​ខណ្ឌ ២០៣ ទូទាំងប្រទេស ដោយបាន​ផ្តល់​សេវា​លើ ១៤​វិស័យ និង​ប្រភេទ​សេវា​ចំនួន ២១១ រួមមាន ការងារ​នីត្យានុកូលកម្ម ការងាររដ្ឋបាល វិស័យ​សុខាភិបាល វិស័យ​ទេសចរណ៍ វិស័យ សាធារណការ និង​ដឹកជញ្ជូន វិស័យ​វប្បធម៌ និង​វិចិត្រ​សិ​ល្បះ វិស័យ​ព័ត៌មាន វិស័យ​បរិស្ថាន វិស័យ​ឧស្សាហកម្ម និង​សិប្បកម្ម វិស័យ​រ៉ែ និង​ថាមពល វិស័យ​ពាណិជ្ជកម្ម វិស័យ​កសិកម្ម រុក្ខាប្រមាញ់ និង​នេសាទ វិស័យ​ការងារ និង​បណ្តុះ បណ្តាល​វិជ្ជាជីវៈ និង​វិស័យ​រៀបចំ​ដែនដី នគរូបនីយកម្ម និង​សំណង់ ជាដើម​។​

​ក្រសួងមហាផ្ទៃ​ក៏បាន​បញ្ជាក់ថា ចាប់តាំងពី​ដាក់​ឲ្យ​ដំណើរការ​នូវ​អង្គភាព​ច្រកចេញ ចូល​តែមួយ និង​ការិយាល័យ​ប្រជាពលរដ្ឋ នៅ​រាជធានី​ខេត្ត ទាំង ២៥ នៅ​ទូទាំង ប្រទេស​ចាប់តាំងពី​ឆមាស ទី​២ ឆ្នាំ​២០១៨ មកដល់​បច្ចុប្បន្ននេះ អង្គភាព​ច្រកចេញចូល​តែមួយ និង​ការិយាល័យ​ប្រជា ពលរដ្ឋ នៅ​រាជធានី​ខេត្ត បានផ្តល់​សេវា​សរុប​ចំនួន ៥៥៩ ប្រភេទ​សេវា នៃ​វិស័យ​ជំនាញ​ចំនួន ១៥ ដែល​ក្នុងនោះ មាន​សេវា​ផ្ទាល់​របស់​រាជធានី​ខេត្ត លើ​ការងារ​នីត្យានុកូលកម្ម ការងារ​រដ្ឋ បាល ព្រមទាំង​ប្រភេទ​សេវា ដែល​ទទួលបាន​ប្រតិកម្ម​អំណាច​ពី​ក្រសួង​ស្ថាប័ន​ចំនួន ១២ រួមមាន វិស័យ​ទេសចរណ៍ វិស័យ​សុខាភិបាល វិស័យ​សាធារណការ និង​ដឹកជញ្ជូន ជាដើម​។ ក្នុងនោះ ចាប់តាំងពី​ដាក់​ឲ្យ​ដំណើរការ កាលពី​ឆមាស​ទី​២ ក្នុង​ឆ្នាំ​២០១៨ រហូតដល់​ដំណាច់ ឆ្នាំ​២០១៩ អង្គភាព​ច្រកចេញចូល​តែមួយ និង​ការិយាល័យ​ប្រជាពលរដ្ឋ នៅ​រាជធានី​ខេត្ត ទាំង ២៥ ទូទាំងប្រទេស បានផ្តល់​សេវា​សរុប ចំនួន ៦៩៤ ៩៦៧ សេវា និង​ទទួលបាន​ចំណូល​ជាង ៥៦​ពាន់​លាន​រៀល ស្មើ​ប្រហែល ១៤​លាន​ដុល្លារ​អាម៉េរិក​។​

​នៅតាម​អង្គភាព និង​ការិយាល័យ​ច្រកចេញចូល​តែមួយ នៅ​រាជធានី​ខេត្ត និង​នៅតាម​ក្រុង ស្រុក​ខណ្ឌ គឺមាន​តារាង​តម្លៃ ព្រមទាំង​រយៈពេល​ផ្តល់​សេវា ដែល​ផ្តល់​ភាពងាយស្រួល​ដល់ ប្រជាពលរដ្ឋ អ្នកទទួល​សេវា ដោយ​មិន​ត្រូវគេ​ទារលុយ​ច្រើន ដូច​ពេលកន្លងមក​ទេ​។​

​យ៉ាងណាក៏ដោយ នៅតាម​សាលាខណ្ឌ ស្រុក ក្រុង ដែលមាន​ការិយាល័យ​ច្រកចេញ ចូល តែមួយ​ហើយ ក៏​នៅមាន​មន្ត្រី​ខិលខូច​មួយចំនួន ឆ្លៀត​រត់ការ ដោយ​ទារលុយ​ច្រើន​ពី​ប្រជា ពលរដ្ឋ ដូចជា ការស្នើសុំ​ឯកសារ ឬក៏​ច្បាប់​សាងសង់​ផ្ទះ ជាដើម​។ ដូច្នេះ​សូម​អភិបាលក្រុង ស្រុក ខណ្ឌ រួមទាំង​អភិបាល​រាជធានី​ខេត្ត មេត្តា​ទប់ស្កាត់ និង​លុបបំបាត់​ក្រុមមន្ត្រី​រាប់​ចាប់ពី អនុប្រធាន​ភូមិ រហូតដល់​មន្ត្រី​នៅ​ថ្នាក់ឃុំ​សង្កាត់ ក្រុង​ស្រុក​ខណ្ឌ រាជធានី​ខេត្ត ដែល​ពូកែ​ខាង រត់ការ ហើយ​ទារលុយ​យ៉ាងច្រើន​ពី​ប្រជាពលរដ្ឋ ដើម្បី​កុំ​ឲ្យ​ការ​ប្រឹង​ប្រឹង​របស់​រដ្ឋបាល ថ្នាក់ជាតិ ក្រសួងមហាផ្ទៃ ក៏ដូចជា​ថ្នាក់ក្រោម​ជាតិ ខំ​បើក​ការិយាល័យ​ច្រកចេញចូល​តែមួយ ហើយ បែរជា​ប្រជាពលរដ្ឋ នៅ​មូលដ្ឋាន នៅតែ​ត្រូវ​ចំណាយលុយ​ច្រើន សម្រាប់​ស្នើសុំ​ឯកសារ ឬ​ច្បាប់​នានា​ដដែល​។​

​បើ​នៅតែ​បន្ត​ទុក​ក្រុម​អ្នក​រត់ការ​ដូច្នេះ នឹង​ក្លាយជា​ការយក​ជើង​ទៅ​រាទឹក ខណៈដែល​ក្រសួងមហាផ្ទៃ ថ្នាក់​ខេត្ត​រាជធានី ក្រុង​ស្រុក​ខណ្ឌ ខិតខំ​បង្ខិត​សេវា​កាន់តែ​ជិត​ប្រជាពលរដ្ឋ​តាមរយៈ ច្រកចេញចូល​តែមួយ តែ​បែរជា​មន្ត្រី​មួយក្រុម​តូច ធ្វើ​ព្យុះ​ធ្វើ​ភ្លៀង ក្នុង​អ្វីដែល​គេ​ហៅថា សេវា​រត់ការ ដែល​ទារលុយ​តាម​ហាងឆេង​មាត់​របស់​ពួកគេ នាំ​ឲ្យ​ប្រជាពលរដ្ឋ​ថ្នាំង​ថ្នាក់លើ ថ្នាក់ដឹកនាំ​ទៅវិញ​នោះ​៕ ដោយ​: ម៉េង​ឆៃ​

ទីតាំងផ្សាយពាណិជ្ជកម្ម

- Advertisment -

Most Popular

សមាគមគ្រូពេទ្យស្ម័គ្រចិត្...

   ដោយ:មុនីរ័ត្ន/ភ្នំពេញ:...

មេបញ្ជាការកងទ័ពជើងគោកឧបត្...

ដោយ: មុនីរ័ត្ន,សុខុម/ភ្...

រកឃើញអ្នកប៉ះពាល់ផ្ទាល់និង...

ដោយ:មុនីរ៍ត្ន/ភ្នំពេញៈ ...

មេ​តំ​ហ្វេ​តា​មីន ៣០ កញ្ច...

​ដោយៈ ទេព មង្គល​- គ្រញូង ...