ដោយ៖វណ្ណៈ/ព្រះសីហនុ៖បុរសជនជាតិចិនឈ្មោះចាងជិនហូដែលឆ្លងជំងឺរលាកសួតកូរ៉ូណាបានចេញពីមន្ទីរពេទ្យបង្អែកខេត្តព្រះសីហនុហើយនៅព្រឹកថ្ងៃទី១០ខែកុម្ភៈឆ្នាំ២០២០ក្រោយព្យាបាលជាពីជំងឺនេះ ក្នុងមន្ទីរពេទ្យបង្អែកខេត្តព្រះសីហនុរយៈពេល២សប្តាហ៍កន្លងមក។
ក្នុងពេលអ្នកជំងឺរូបនេះចេញពីមន្ទីរពេទ្យក៏មានវត្តមានលោកម៉មប៊ុនហេងរដ្ឋមន្ត្រីក្រសួងសុខាភិបាល លោកសាយសំអាល់ប្រធានក្រុមការងារថ្នាក់ជាតិចុះជួយខេត្តព្រះសីហនុលោកឯកអគ្គរដ្ឋទូតប្រទេសចិនប្រចាំកម្ពុជានិងលោកឈិនសេងងួនអភិបាលរងខេត្តក្នុងនាមរដ្ឋបាលខេត្តព្រះសីហនុអញ្ជើញជួបសំណេះសំណាលនិងជូនដំណើរបុរសជនជាតិចិនរូបនេះត្រឡប់ទៅប្រទេសកំណើតវិញផងដែរ។
លោកម៉ម ប៊ុនហេង រដ្ឋមន្ត្រីក្រសួងសុខាភិបាលមានប្រសាសន៍ប្រាប់ក្រុមអ្នករាយការណ៍ព័ត៌មានថា បើទោះជាបុរសជនជាតិឈ្មោះចាងជិនហូបានជាសះស្បើយហើយក្រសួងសុខាភិបាលបានរៀបចំឱ្យចេញពីមន្ទីរពេទ្យត្រឡប់ទៅប្រទេសកំណើតវិញនៅថ្ងៃនេះក្តី។ប៉ុន្តែការប្រុងប្រយ័ត្នការពារនៅតែធ្វើបន្ត។
លោករដ្ឋមន្ត្រីបញ្ជាក់ថាគិតត្រឹមថ្ងៃទី១០ខែកុម្ភៈឆ្នាំ២០២០នេះនៅកម្ពុជាមិនឃើញមានអ្នកឆ្លងថ្មីណាម្នាក់ឡើយនិងថាក្រសួងនឹងចាត់វិធានការប្តឹងចំពោះអ្នកផ្សាយព័ត៌មានប្រឌិតពីរោគកូរ៉ូណាបង្កចលាចលក្នុងប្រទេសកម្ពុជានិងសុំឱ្យពលរដ្ឋស្តាប់ឬមើលព័ត៌មានផ្លូវការដែលចេញផ្សាយដោយក្រសួងសុខាភិបាល។
មុនត្រឡប់ចេញពីមន្ទីរពេទ្យខេត្តព្រះសីហនុលោកចាងជិនហូវយ័៦០ឆ្នាំបានលើកដៃសំពះថ្លែងអំណរគុណជាសាធារណៈតាមរយៈអ្នកបកប្រែភាសាថា៖-សូមអរគុណរាជរដ្ឋាភិបាលកម្ពុជា-សូមអរគុណក្រសួងសុខាភិបាលកម្ពុជា-សូមអរគុណរដ្ឋបាលខេត្តព្រះសីហនុ-សូមអរគុណវេជ្ជបណ្ឌិត គ្រូពេទ្យទាំងអស់
-សូមអរគុណប្រជាជនកម្ពុជាទាំងអស់-សូមអរគុណសណ្ឋាគារឃ្វីនកូក្រុងព្រះសីហនុ។
ចំពោះអ្វីដែលលោកបានទទួលការយកចិត្តទុកដាក់ជួយទំនុកបម្រុងទាំងរូបលោកផ្ទាល់និងក្រុមគ្រួសាររបស់លោកអំឡុងពេលរូបលោកសម្រាកព្យាបាលក្នុងមន្ទីរពេទ្យខេត្តព្រះសីហនុ២សប្តាហ៍កន្លងមកនេះ៕S/
