ដោយ:អង្គរតូច/ខេត្តសៀមរាប៖សមត្ថកិច្ចរដ្ឋបាលព្រៃឈើស្វាយលើកាលពីរំលងអាធ្រាត្រចូលថ្ងៃទី១០ ខែកុម្ភ:បានស្ទាក់ចាប់គោយន្តដឹកឈើល្មើសច្បាប់បីគ្រឿងត្រង់ចំណុចភូមិបឹងមាលាឃុំបឹងមាលាស្រុកស្វាយលើ។
លោកម៉ុងប៊ុនលីមនាយខណ្ឌរដ្ឋបាលព្រៃឈើខេត្តបានឱ្យដឹងថាពិតជាមានការបង្ក្រាបគោយន្ដកន្ត្រៃដឹកឈើល្មើសច្បាប់ ជាប្រភេទឈើអារចំនួន៣គ្រឿងមែន។ ឈើអារដែលបានបង្ក្រាបនេះមានចំនួន ១២៩ សន្លឹកស្មើនិង៦,១៣៥ម៉ែត្រគូប។ពួកគេបានដឹកជញ្ជូនផលអនុផលព្រៃឈើដោយគ្មានលិខិតអនុញ្ញាតពីរដ្ឋបាលព្រៃឈើ។
ក្នុងពេលដែលបទល្មើសមកដល់ត្រង់ចំណុចភូមិបឹងមាលាឃុំបឹងមាលាស្រុកស្វាយលើស្របនិងពេលសមត្ថកិច្ចចុះទៅដល់នោះពួកគេបានរត់គេចខ្លួនបាត់អស់បន្សល់តែឈើនិងគោយន្ត។ លោកបន្តថាឈើទាំងនេះដឹកចេញពីព្រំប្រទល់ខេត្តព្រះវិហារដោយឆ្លងកាត់ស្រុកស្វាយលើហើយក៏ត្រូវកម្លាំងជំនាញឆ្មក់បង្ក្រាបជាក់ស្តែងតែម្តង។វត្ថុតាងរក្សាទុកនៅទីស្នាក់ការសង្កាត់រដ្ឋបាលព្រៃឈើស្វាយលើ ដើម្បីចាត់ការតាមផ្លូវច្បាប់៕S/
