តើ​អាច​បំបាត់​ករណី​គ្រូ យកលុយ​សិស្ស​បាន​ដោយ​វិធី​ណា​?

556
ចែករម្លែក

​ក្នុង​សន្និសីទកាសែត រៀបចំ​ដោយ​អង្គភាព​អ្នកនាំពាក្យ​រាជរដ្ឋាភិបាល​កម្ពុជា កាលពី​ព្រឹក ថ្ងៃទី​១០ ខែកុម្ភៈ ឆ្នាំ​២០២០ ស្តីពី វឌ្ឍនភាព និង​ទិសដៅ​ការងារ​បន្ត​របស់​ក្រសួង​អប់រំ យុវជន និង​កីឡា លោក ឌី ខាំ​បូ​លី អ្នកនាំពាក្យ​ក្រសួង​អប់រំ យុវជន និង​កីឡា​បានប្រកាស​ពី​ការខិតខំ របស់​ក្រសួង ក្នុងការ​លុបបំបាត់​ភាព​អសកម្ម​មួយចំនួន ដែល​បាន កើតមាន​ក្នុង​វិស័យ​អប់រំ ដូចជា សកម្មភាព​គ្រូបង្រៀន ប្រមូល​យកលុយ​ពី​សិស្ស ឬ​បង្ខំ​ឲ្យ​សិស្ស រៀន​គួរ​បន្ថែម​ម៉ោង ជាដើម​។​

​លោក ឌី ខាំ​បូ​លី បាន​បញ្ជាក់ថា ជាគោលការណ៍ ក្រសួង​អប់រំ មិន​ឲ្យ​គ្រូបង្រៀន​តាម​សាលានានា យកលុយ​ពី​សិស្ស​នោះទេ​។ ប៉ុន្តែ​ទោះជា​យ៉ាងណាក៏ដោយ លោក​ទទួលស្គាល់ថា សកម្មភាព​បែបនេះ ពិតជា​បានកើត​មាន​ទៅហើយ នៅតាម​សាលា រៀន​ពិសេស​នៅ​ថ្នាក់​បឋមសិក្សា​។​

​បើតាម​អ្នកនាំពាក្យ​ក្នុងករណី​រកឃើញ ឬ​បានទទួល​ព័ត៌មាន​ណាមួយ ពី​សកម្មភាព​អសកម្ម​នេះ អ្នកសារព័ត៌មាន​ឬ​សារ​ធារ​ណៈ​ជន​ទូទៅ អាច​ជូន​ព័ត៌មាន ឬ​រាយការណ៍​មក​ក្រសួង​នោះ​ក្រុម ការងារ​ក្រសួង​អប់រំ យុវជន និង​កីឡា នឹងមាន​វិធានការ​ជាបន្ទាន់ ចំពោះ​បុគ្គល​មួយចំនួន​តូច ដែល​ធ្វើ​សកម្មភាព​អសកម្ម​ទាំងនេះ​។​

​លោក ឌី ខាំ​បូ​លី បាន​បញ្ជាក់ថា «​បើសិន​មាន​ព័ត៌មាន​បែប​ហ្នឹង សូម​សហ​ការជួយ​ផ្តល់ព័ត៌មាន តាមរយៈ​ខ្ញុំ​ផ្ទាល់​ក៏បាន តាមរយៈ​ក្រុម​អ្នកនាំពាក្យ​ក្រសួង​ក៏បាន ដែល​យើង​មាន​លេខ​ទូរស័ព្ទ ប្រកាស​ជា​សាធារណៈ​រួចហើយ អង្គភាព​អ្នកនាំពាក្យ​រាជ រដ្ឋាភិបាល បានប្រកាស​គ្រប់​លេខ ទូរស័ព្ទ​អ្នកនាំពាក្យ​ទាំងអស់ នៅ​គ្រប់​ក្រសួង​ស្ថាប័ន​។ អញ្ចឹង​អាច​ផ្តល់ព័ត៌មាន​នេះ​មក ពេលណា​ក៏បាន ប្រសិនបើ​កើតឡើង​មែន​នឹងមាន​វិធានការ​ជាបន្ទាន់​ចំពោះ​បុគ្គល​មួយចំនួន​តូច ដែល​ធ្វើ​សកម្មភាព​យកលុយ​កាក់​ពី​សិស្ស​អី​ជាដើម​»​។​

​ទោះបីជា​យ៉ាងណាក៏ដោយ​សម្រាប់​លោក ឌី ខាំ​បូ​លី គ្រូបង្រៀន​សព្វថ្ងៃ​មាន​ចំនួន​ច្រើន ណាស់ ហើយ​ចំពោះ​ការរាយការណ៍​ពី​សកម្មភាព​យកលុយ​ពី​សិស្ស បើសិន​មានការ​សហការ ពី​គ្រប់​មជ្ឈដ្ឋាន​នានា​នោះ គឺជា​រឿង ដែល​ក្រសួង​ចង់បាន​បំផុត​។​

​លោក ឌី ខាំ​ប៉ូ​លី បាន​បន្តថា មកដល់​ពេលបច្ចុប្បន្ន កម្ពុ​ជាមាន​សាលារៀន​នៅ​ទូទាំងប្រទេស សរុប ១៤.៥២២ សាលា រាប់​ចាប់ពី​ម​ត្តេ​យ្យ​សិក្សា ដល់​ថ្នាក់​វិទ្យាល័យ​។ ក្នុងនោះសាលា​រដ្ឋ មាន​ចំនួន ១៣.៣០០​សាលា​។ ដោយឡែក គ្រឹះស្ថាន​បណ្តុះ បណ្តាល​ថ្នាក់​ឧ​ត្ត​មសិ​ក្សា និង ក្រោយ​ឧ​ត្ត​មសិ​ក្សា ដែល​រួមមាន សាកល វិទ្យាល័យ និង​វិទ្យាស្ថាន​នោះ មាន​ចំនួន ១២៥ សាលា ក្នុងនោះ រដ្ឋ​មាន​ចំនួន ៤៨​។​

​លោក ខាំ​ប៉ូ​លី បាន​បន្ថែមថា សិស្ស ដែល​កំពុង​សិក្សា​ពី​ថ្នាក់​ម​ត្តេ​យ្យ ដល់​ឧ​ត្ត​មសិ​ក្សា​មាន​ជាង បី​លាន​នាក់ សិស្ស​ជានា​រី​មាន​ជាង ៤៩​ភាគរយ​។ ក្នុងនោះ សិស្ស​កំពុង​សិក្សា​ថ្នាក់​ឧ​ត្ត​មសិ​ក្សា និង​ក្រោយ​ឧ​ត្ត​មសិ​ក្សា មាន​ជាង ២១​ម៉ឺន​នាក់​។ បច្ចុប្បន្ន មាន​បុគ្គលិក​អប់រំ​ទាំង​អ្នក​បង្រៀន និង​អ្នកបម្រើ​ការងារ​លើ​វិស័យ​អប់រំ មាន​ចំនួន​សរុប​ជាង ១២​ម៉ឺន​នាក់ ក្នុងនោះ​អ្នក​បង្រៀន មាន​ជាង ៩​ម៉ឺន​នាក់​។​

​យើង​ងាក​មក​និយាយ​ពី​រឿង​គ្រូ​យក​ប្រមូល​លុយ​សិស្ស បាន​កើតឡើង​ស្ទើរតែ​គ្រប់​ថ្នាក់​នៅ កម្រិត​បឋមសិក្សា​ហើយ​ភាគច្រើន​កើតឡើង​នៅ​ភ្នំពេញ និង​តាម​ទីប្រជុំជន តាម​ខេត្ត ក្រុង ស្រុក​។ សម្រាប់​នៅ​សាលាបឋមសិក្សា នៅ​ភ្នំពេញ សិស្ស​ត្រូវ​បង់​មួយថ្ងៃៗ​ដល់​គ្រូ​មួយចំនួន ។ មាន​ឪពុកម្តាយ​ខ្លះ ក៏បាន​បង់​ខែ​តែម្តង​ជូន​លោកគ្រូ​អ្នកគ្រូ​។

​មានការ​អះអាង​ខ្លះ​ថា​តាម​សាលា​ខ្លះ លុយ​ប្រមូលបាន​ពី​សិស្ស​ប្រចាំ​ថ្ងៃនេះ​មិនមែន​បាន​ទាំង អស់​លើ​គ្រូ​បន្ទុក​ថ្នាក់​នីមួយៗ​ទេ គឺ​ត្រូវ​ចែក​ភាគរយ​ដល់​ថ្នាក់ដឹកនាំ​សាលា​។ ការធ្វើ​ដូច្នេះ បាន​ក្លាយជា​ទម្លាប់ ហើយក៏​មិនមែន​ទើបតែ​កើតឡើង ក្នុងសង្គម​កម្ពុជា​យើង​នោះទេ​។ មូលហេតុ​មកពី​គ្រូ​អះអាងថា ប្រាក់ខែ​តិច​ចាយ​មិន​គ្រប់​។ ប្រមូល​យកលុយ​សិស្ស​រៀងរាល់ថ្ងៃ ដូច្នេះ ធ្វើ​ឲ្យ​គ្រួសារ​គ្រូបង្រៀន បាន​រួច​ថ្លៃ​ម្ហូប​ខ្លះ​ដែរ​។

​ដោយឡែក​នៅ​ថ្នាក់​អនុវិទ្យាល័យ និង​ថ្នាក់​វិទ្យាល័យ​វិញ​គឺ​គ្រូបង្រៀន​មុខវិជ្ជា​នីមួយៗ​មួយចំនួន ណា​នោះ បើក​បង្រៀន​គួរ​។ បើ​សិស្ស​ណា មិន​ទៅ​រៀន​គួរ នោះ​ពេល​ប្រឡង​នឹង​ចេញ​វិ​ញ្ញា សារ ដែល​មិនមែន​រៀន​នៅក្នុង​ថ្នាក់ ជាដើម ទៅតាម​បច្ចេកទេស​គ្រូ​មាន​គំ​និ​រ​មួយចំនួន​។​

​យ៉ាងណាក៏ដោយ ប្រាក់ខែ​មន្ត្រីរាជការ ពិសេស​ប្រាក់ខែ​គ្រូបង្រៀន​ក្នុង​រយៈពេល​ប៉ុន្មាន​ឆ្នាំ​ចុង ក្រោយនេះ ត្រូវបាន​រាជរដ្ឋាភិបាល ដំ​ឡើងជា​បន្តបន្ទាប់ ដែល​ក្នុង​មួយឆ្នាំ​ឡើង ពីរដង គឺ​នៅ ខែមករា និង​នៅ​ខែមេសា​។ ក្នុងនោះ ប្រាក់ខែ​គ្រូបង្រៀន ក៏​ទទួលបាន​ច្រើនជាង​មន្ត្រីរាជការ និង​កងកម្លាំងប្រដាប់អាវុធ​ផ្សេងទៀត​។​

​បើ​លុបបំបាត់​រឿង​គ្រូ ប្រមូល​យកលុយ​សិស្ស ទាល់តែ​ក្រសួង​អប់រំ ប្រើ​វិធានការ​ក្តៅ ហើយ គ្រូបង្រៀន​ខ្លួនឯង​គួរតែ​ចាប់ផ្តើម​មុនគេ​។ ម្យ៉ាងទៀត ការងារ​គ្រូបង្រៀន​បើ​គ្រូបង្រៀន​ពេលព្រឹក គឺ​នៅពេល​ល្ងាច ត្រូវ​ឈប់សម្រាក​។ ដូច្នេះ​គ្រូ អាច​យក​ពេលវេលា​កន្លះ​ថ្ងៃ ទៅធ្វើ​អ្វី​ផ្សេង ឬក៏​អាច​ទៅ​បង្រៀន​នៅ​សាលា​ឯកជន ក៏​អាច​ទទួលបាន​ប្រាក់កម្រៃ​បន្ថែម​។ បើ​មិន​ដូច្នេះ​ទេ ក្នុង​គ្រួសារ​គ្រូបង្រៀន ក៏មាន​ប្តី ឬ​ប្រពន្ធ ប្រកប​របរ​ផ្សេង ដែល​ជួយ​ផ្គត់ផ្គង់​ចំណូល​ទ្រទ្រង់ ជីវភាព​គ្រួសារ សមល្មម​នឹង​រស់នៅ​សមរម្យ​ដែរ​។​

​មនុស្ស​យើង បើ​និយាយថា ឲ្យ​គ្រប់ គឺ​មិនចេះ​គ្រប់​ទេ​។ យ៉ាងណាមិញ សូម្បីតែ​បុគ្គលិក ក្រុមហ៊ុន​ឯកជន ដែល​ទទួលបាន​ប្រាក់ខែ​ច្រើនជាង​មន្ត្រីរាជការ ក៏​នៅតែ​មិន​គ្រប់​រហូត​។ នេះ​ជា​ចរិត​របស់​មនុស្សលោក ដែលជា​ប្រ​ថុ​ជ្ជ​ជន មិនចេះ​ឆ្អែតឆ្អន់​។

​ជារួម ដើម្បី​កាត់បន្ថយ និង​ឈានទៅ​លុបបំបាត់ ករណី​គ្រូ​យកលុយ​សិស្ស​មានតែ​វិធានការ តឹងរ៉ឹង​ពី​ក្រសួង​អប់រំ​ដោយ​ត្រូវ​ដាក់វិន័យ​ជាក់ស្តែង​លើ​គ្រូបង្រៀន​ដែល​យកលុយ​សិស្ស​ប្រចាំ ថ្ងៃ ប្រចាំខែ ។​ករណីនេះ​មានការ​ចូលរួម​ពី​ថ្នាក់ដឹកនាំ​សាលា ក៏ត្រូវ​ដាក់វិន័យ​ដូចគ្នា​។ រីឯ​គ្រូបង្រៀន​ខ​ក៏​គួរតែ​ចាប់ផ្តើម​មុនគេ គឺ​ធ្វើជា​គ្រូ​ស្អាតស្អំ មិន​ទារលុយ​និង​មិន​ទទួល​លុយ​ពី សិស្ស ព្រោះថា ករណី​គ្រូ​យកលុយ​សិស្ស​នេះ ក៏​បង្កើតជា​គំនិត សូកលុយ ពុករលួយ ដល់​ក្មេងៗ តាំងពី​ចាប់ផ្តើម​ចូលរៀន​ទៅហើយ​៕ ដោយ​: ម៉េង​ឆៃ​