Home ព័ត៌មានជាតិ សង្គម ដល់​វេន​ទេសចរ...

ដល់​វេន​ទេសចរ​ក្នុងស្រុក​ជួយ​ស្តារ​ទេសចរ​អន្តរជាតិ លើ​វិស័យ​ទេសចរណ៍​កម្ពុជា​

ដោយ​: មូល​សម្បត្តិ / ភ្នំពេញ​: លោក ទិ​ត ចន្ថា រដ្ឋមន្ត្រី​ស្តីទី​ក្រសួងទេសចរណ៍ បានប្រកាស​ក្តែ​ងៗ​លើកទឹកចិត្ត​ដល់​ភាគី​ពាក់ព័ន្ធ ទាំង​វិស័យ​រដ្ឋ និង​ឯកជន​រួមគ្នា​បង្កើត​ព្រឹត្តិការណ៍កម្សាន្ត​ឱ្យបាន​ច្រើននៅតាម​គោលដៅ​ទេសចរណ៍​នានា ដើម្បី​ជំរុញ​ចលនា​ទេសចរ​ផ្ទៃក្នុង​ឱ្យ​កាន់តែ​ផុសផុល សំដៅ​លើកកម្ពស់​វិស័យ​ទេសចរណ៍​ជាតិ ក្នុងដំណាក់កាលផ្ទុះ​ការរីក​រាលដាល​វីរុស​កូ​រ៉ូ​ណា​។​

​ការប្រកាស​បែបនេះ​រប​ស់លោក ទិ​ត ចន្ថា ធ្វើឡើង​ក្នុង​កិច្ចប្រជុំ​ការងារ​ទេសចរណ៍​ជាមួយ​ផ្នែក​ឯកជន​ក្នុង​វិស័យ​ទេសចរណ៍ ជាមួយ​លោក​ទៀ សីហា អភិបាលខេត្ត​សៀមរាប ព្រមទាំង​ប្រតិបត្តិ​ករ​ទេសចរ វិស័យ​ឯកជន តំណាង​មន្ទីរ ស្ថាប័ន អង្គភាព​ពាក់ព័ន្ធ​ប្រមាណ ១៥០​នាក់ នៅ​សាលា​ខេត្តសៀមរាប នា​ថ្ងៃទី​១០ ខែកុម្ភៈ ឆ្នាំ​២០២០​។​

​លោក​បាន​បញ្ជាក់ថា កម្ពុជា​នៅតែមាន​ភ្ញៀវទេសចរ​អន្តរជាតិ​មក​ទស្សនា ប៉ុន្តែ​មានការ​ថមថយ​ខ្លះ ពិសេស​គឺ​ភ្ញៀវទេសចរ​ចិន ដោយសារ​បញ្ហា​ផ្ទុះ​ការរីក​រាលដាល​វីរុស​កូ​រ៉ូ​ណា​។​

​លោក​ថ្លែង​យ៉ាង​ដូច្នេះ​ថា «​កម្ពុជា​គ្មាន​ករណី​ឆ្លង​វីរុស​កូ​រ៉ូ​ណា​ទៀត​នោះទេ​។ នៅ​សៀមរាប​-​អង្គរ សកម្មភាព​ទេសចរណ៍​នៅតែមាន​សកម្ម​ភាពរស់រវើក ជាពិសេស​ភ្ញៀវទេសចរ​អឺរ៉ុប​នៅតែ​មានមក តែមាន​ការ​ថមថយ​ខ្លះ ពិសេស​ភ្ញៀវ​ចិន​មានការ​ថមថយ ដោយសារ​ប្រភព​កំណើត​របស់គាត់​មាន​បញ្ហា (​វីរុស​កូ​រ៉ូ​ណា​)»​។​

​លោក​បន្តថា មកដល់ពេលនេះ មិនទាន់មាន​ដំណោះស្រាយ​ជាក់លាក់​ណាមួយ​សម្រាប់​ប​ញ្ហា​ធ្លាក់ចុះ​ភ្ញៀវទេសចរ ក្នុងដំណាក់កាល​ផ្ទុះ​ការរីក រាលដាល​វីរុស កូ​រ៉ូ​ណា នេះ​នៅឡើយ​ទេ ដោយ​លោក​អះអាងថា បញ្ហា​នេះ​ក្រសួងទេសចរណ៍​មិនអាច​ធ្វើ​តែឯង​បានទេ គឺមាន​ការពាក់ព័ន្ធ​នឹង​ក្រសួង​-​ស្ថាប័ន​ពាក់ព័ន្ធនឹង​វិស័យ​ឯកជន​ក្នុង​វិស័យទេសចរណ៍​នេះ​ទៀត​ដែរ​។​

​តែ​ទោះជា​យ៉ាងណា ក្រសួង​-​ស្ថាប័ន​ពាក់ព័ន្ធ ដែលជា​សេនាធិការ​របស់​រាជរ​ដ្ឋា​ភិ​បាល នឹង​ស្នើសុំ​ទៅកាន់​រាជរដ្ឋាភិបាល ដើម្បី​ទទួលបាន​ដំណោះស្រាយ​ជាក់លាក់ ណាមួយក្នុងដំណាក់កាល​លំបាក​នេះ​។​

​លោក​ថា មាន​បញ្ហា​មួយចំនួន​ដែល​តម្រូវឱ្យ​ភាគី​ពាក់ព័ន្ធ​រួមគ្នា​ដោះស្រាយ ដូចជា​បញ្ហា​ពន្ធដារ អគ្គិសនី ការប្រាក់​នៅ​ធនាគារ​ជាដើម សំដៅ​សម្រួល​មធ្យោបាយ​ជូន​ក្រុមហ៊ុន​ទីភ្នាក់ងារ​ទេសចរណ៍ មូលដ្ឋាន​អាជីវកម្ម​សេវាកម្ម​ទេសចរណ៍ ប្រតិបត្តិ​ករ​ទេសចរ​ជាដើម ដែល​ពួកគេ​កំពុង​ជួប​បញ្ហា​ក្នុងការ​ចំណាយ​ច្រើន ខណៈ​ចំណូល​ដែល​ផ្អែកលើ​ការ​មក​ទស្សនា ការ​មក​ស្នាក់នៅ ឬ​ការប្រើប្រាស់​សេវាកម្ម​របស់​ភ្ញៀវទេសចរ​មានការ​ធ្លាក់ចុះ​។​ល​។​

​ក្រសួងទេសចរណ៍ បាន​អំពាវនាវ​ដល់​ភាគី​ពាក់ព័ន្ធ​ទាំង​រដ្ឋ និង​ឯកជន ត្រូវ​រួមគ្នា​បង្កើត​ព្រឹត្តិការណ៍​ទេសចរណ៍​នៅតាម​គោលដៅ​ទេសចរណ៍​ឱ្យបាន​ច្រើន ជំរុញ​ចលនា​ទេសចរ​ផ្ទៃក្នុង ទាំង​ប្រជាពលរដ្ឋ និង​ភ្ញៀវ​អន្តរជាតិ​ដែល​កំពុង​ស្ថិតនៅ​កម្ពុជា គឺ​ត្រូវ​ដើរចេញ​ទស្សនា​ឱ្យបាន​ច្រើន​។​

​ជាមួយគ្នា​នោះ ផ្នែក​ឯកជន​ក៏ត្រូវ​សម្រួល ឬ​បញ្ចុះតម្លៃ​លក់​កញ្ចប់​ទស្សនកិច្ច​ដ​ល់​ភ្ញៀវ ក៏ដូចជា​ការបញ្ចុះ​តម្លៃ​ស្នាក់នៅ​សណ្ឋាគារ អាហារ​ហូបចុក ការដឹកជញ្ជូន សេវាកម្ម​នានា​ជាដើម ដើម្បី​លើកទឹកចិត្ត​ឱ្យមាន​ការធ្វើដំណើរ​ទេស​ចរណ៍​ផ្ទៃក្នុង ព្រោះ​កាលណា​មាន​សកម្មភាព​ទេសចរណ៍​ច្រើន វា​ជួយ​សម្រាល​ការចំណាយ​នៅតាមមូលដ្ឋានអាជីវកម្ម​ទេសចរណ៍ ហើយ​ជា​សារ​សម្រាប់​ផ្សព្វផ្សាយ​ទៅកាន់​ទេសចរ​ក្រៅប្រទេស ដែលជា​ការទាក់ទាញ​ភ្ញៀវ​ពី​ក្រៅប្រទេស​ឱ្យមក​ទស្សនា​កម្ពុជា​បន្ថែ​ម​ទៀត​។​

​កម្ពុជា​នៅតែ​ស្វាគមន៍​វត្តមាន​ទេសចរ​អន្តរជាតិ​គ្រប់គ្នា ដោយ​មិនមាន​ការរើសអើង​អ្វី​ទាំងអស់ ប៉ុន្តែ​នៅតែមាន​ការត្រួត ពិនិត្យ​តាមបច្ចេកទេស​វេជ្ជសាស្ត្រ​សុខាភិបាល និង​សូមឱ្យ​មានការ​ប្រុងប្រយ័ត្ន​ទាំងអស់គ្នា​។​

​លោក​ទិ​ត ចន្ថា បាន​រំលេច​សារ​អំពាវនាវ​មួយ​ឃ្លា​ថា «​អង្គរ​ឈរ​ជាង​មួយ​ពាន់​ឆ្នាំ រង់ចាំ​ភ្ញៀវ​មក​ទស្សនា មិន​ភ័យ​រឿង​កូ​រ៉ូ​ណា​ឡើយ​»៕ ល​/Ha

ទីតាំងផ្សាយពាណិជ្ជកម្ម

- Advertisment -

Most Popular

សម្តេច​តេ​ជោ​នាយករដ្ឋមន្ត...

​ដោយៈ​តារា​រិ​ទ្ធ​,​មុនី​...

ប្រជាពលរដ្ឋ​ងាយ​រងគ្រោះ​ច...

ដោយ​: ទេ​ពក​ង្រី / កំពង់ឆ...

រដ្ឋបាល​ខណ្ឌ​ពោធិ៍​សែន​ជ័...

ដោយ​៖ រ៉ា​ម៉ន / ភ្នំពេញ​៖...

បុរស​ម្នាក់​ចាប់រំលោភ​កូន...

​ដោយ​: សម្បត្តិ / ភ្នំពេញ...