Home ព័ត៌មានជាតិ សង្គម រដ្ឋបាល​ស្រុក...

រដ្ឋបាល​ស្រុក​បូ​ទុម​សាគរ បុក​អណ្តូង​ជម្រៅ​ជាង​៤០​ម៉ែត្រ ត្រៀម​ដោះស្រាយ​កង្វះ​ទឹក​ប្រើ​

ដោយ​: សុ​ផានី​តា / កោះកុង​: រដ្ឋបាល​ស្រុក​បូ​ទុម​សាគរ សហការ​ជាមួយ​សមាជិក​ក្រុមប្រឹក្សា​ស្រុក និង​អាជ្ញាធរ​ឃុំ​មូលមតិ​គ្នា​បុក​អណ្តូង​មួយកន្លែង​ជម្រៅ​ជាង​៤០​ម៉ែត្រ​ចុះទៅ​ក្រោម​ដី ព្រមទាំង​បំពាក់​ម៉ូ​ទ័​រ​បូមទឹក ដើម្បី​ត្រៀម​ដោះស្រាយ​បញ្ហា​ខ្វះ​ទឹក​ប្រើប្រាស់​នៅ​រដូវប្រាំង​ខាងមុខ​។​

​ច្បាស់​ណាស់​ថា រដូវប្រាំង​នឹង​ប្រឈម​បញ្ហា​ខ្វះ​ទឹក​ប្រើប្រាស់ រដ្ឋបាល​ស្រុក​បូ​ទុម​សាគរ និង​អាជ្ញាធរ​មូលដ្ឋាន បាន​ជួល​ក្រុមហ៊ុន​ឯកជន​បុក​អណ្តូង​ជម្រៅ​៤០​ម៉ែត្រ​តម្លៃ​១៣០០​ដុល្លារ ត​បណ្តាញ​ទុយោ​ទឹក ធុង​ទឹក​ចំណុះ​៥០០០​លីត្រ និង​បំពាក់​ម៉ូ​ទ័​រ​១​គ្រឿង​តម្លៃ​២៥០០​ដុល្លារ​នៅក្នុង​បរិវេន​អគា​រដ្ឋបាល​ស្រុក​។​

​លោក ហាក់ ឡេង អភិបាលស្រុក​បូ​ទុម​សាគរ បានឱ្យដឹង​នៅ​ថ្ងៃទី​១១ ខែកុម្ភៈ ឆ្នាំ​២០២០​នេះ​ថា ព្រោះតែ​មានការ​ជូនដំណឹង​របស់​រាជរដ្ឋាភិបាល និង​ក្រសួង​ធនធានទឹក​អំពី​ការគំរាមកំហែង​គ្រោះរាំងស្ងួត​ឆ្នាំនេះ​នៅ​រដូវប្រាំង​ដែល​ធ្វើឱ្យ​ក្របខណ្ឌ​ស្ទើរតែ​ទូទាំងប្រទេស​ជួបប្រទះ​ការខ្វះ​ទឹក​ប្រើ ទើប​លោក​នឹង​អាជ្ញាធរ​រៀបចំ​បុក​អណ្តូង​នេះ​ឡើង សម្រាប់​ផ្គត់ផ្គង់​ទឹក​ជូន​ប្រជាពលរដ្ឋ​រស់នៅក្នុង​ទីរួមស្រុក​មិន​គិតថ្លៃ​អ្វី​ឡើយ​។​

​លោក​អភិបាលស្រុក​បូ​ទុម​សាគរ បន្ថែមថា ចំពោះ​គុណភាព​ទឹក​វិញ មាន​សភាព​ថ្លៃ​ល្អ ប្រើការ​បាន​តាម​តម្រូវការ​។ បច្ចុប្បន្ន លោក និង​អាជ្ញាធរ​មូលដ្ឋាន ក៏​កំពុង​តាមដាន​ពិនិត្យមើល ក៏ដូចជា​ស្វែងរក​ប្រភព​ទឹកសាប​បន្ថែម ដើម្បី​ដោះស្រាយ​រក្សា​ទឹក​ទុក និង​បូម​ចែកជូន​ពលរដ្ឋ​នៅពេល​ខ្វះខាត​ខ្លាំង​។ ទោះយ៉ាងណា ក៏​លោក​អំពាវនាវ​ដល់​ប្រជាពលរដ្ឋ​ត្រូវ​រួមគ្នា​ប្រើប្រាស់​ទឹក​ដោយ​សន្សំសំចៃ ជៀស​ង​ការប្រើប្រាស់​ខ្ជះខ្ជាយ​។​

​ចំណែក​លោក ឃៀង យិ​ង មេឃុំ​អណ្តូងទឹក បាន​ប្រាប់​ដែរ​ថា សព្វថ្ងៃនេះ ពលរដ្ឋ​រស់នៅក្នុង​មូលដ្ឋាន​គ្រប់គ្រង​របស់លោក​នៅ​មិនទាន់មាន​ការជួប​ខ្វះខាត​ទឹក​ប្រើប្រាស់​នោះទេ ដោយ​ប្រជាពលរដ្ឋ និង​អាជីវករ​ប្រើប្រាស់​ទឹក​របស់​ក្រុមហ៊ុន​ទឹក ក៏ដូចជា​អណ្តូង​ដែល​ជីក​តាម​ផ្ទះ​បានជា​ធម្មតា​។ ករណី​បើ​កង្វះខាត អាជ្ញាធរ​ស្រុក និង​ផ្ទះ​របស់លោក បាន​ត្រៀម​បង្ការ​មាន​ជា​អណ្តូងទឹក និង​ធុង​ស្តុក​ទឹក​ប្រមាណ​៥០០០​ទៅ​៦០០០​លីត្រ​ទុក​ចែកជូន​ពលរដ្ឋ​។​
​បើតាម​លោក​មេឃុំ​អណ្តូងទឹក រដូវប្រាំង​ម្តង នៅ​មូលដ្ឋាន​មិនសូវ​ជា​ចោទ​បញ្ហា​ខ្វះខាត​ខ្លាំងក្លា​អ្វី​ទេ គ្រា​ប្រភព​ទឹកសាប​មានទឹក​សមល្មម ប៉ុន្តែ​ក៏​ចាំបាច់​គិតគូរ​យកចិត្ត​ទុក​ដោះស្រាយ​តប​តាម​ការណែនាំ​របស់​ប្រមុខ​រដ្ឋាភិបាល និង​លោកស្រី​អភិបាលខេត្ត​កោះកុង​។

​គណៈកម្មការ​ទន្លេមេគង្គ ហៅ​កាត់ MRC ធ្លាប់បាន​អះអាង​កាលពី​ខែវិច្ឆិកា ឆ្នាំ​២០១៩​កន្លងទៅ​ថា ប្រទេស​កម្ពុជា និង​ថៃ នឹង​ទទួលរង​នូវ​គ្រោះរាំងស្ងួត​ធ្ងន់ធ្ងរ​ខ្លាំង ចាប់ពីពេលនោះ​រហូតដល់​ខែមករា ឆ្នាំ​២០២០​ខាងមុខ ធ្វើ​ឲ្យ​ប៉ះពាល់​ដល់​ផលដំណាំ​ផ្សេងៗ ដោយសារ​កង្វះខាត​ប្រើប្រាស់ និង​ទឹក​ស្រោចស្រព​ដាំ​ណាំ​កសិកម្ម​។ ដោយ​តំបន់​មួយ​ភាគ​ធំ​នៃ​ដង​ទន្លេមេគង្គ​ក្រោម​រង​ផលប៉ះពាល់​នៃ​គ្រោះរាំងស្ងួត ក្នុង​សភាព​កាន់តែ​ធ្ងន់ធ្ងរ​ឡើង​ចាប់ពី​ខែធ្នូ រហូត ដល់​ខែមករា ឆ្នាំ​២០២០ ព្រោះតែ​នៅតាម​តំបន់​ជាច្រើន​នៃ​ដង​ទន្លេ​មាន​ភ្លៀង​ធ្លាក់​តិចតួច ឬ​គ្មាន​ភ្លៀង​៕ ល​

ទីតាំងផ្សាយពាណិជ្ជកម្ម

- Advertisment -

Most Popular

សែ​ល​កាត​ដាក់ឱ្យ​ដំណើរការ...

​ដោយ​:​ដេប៉ូ​/​ភ្នំពេញ​: ...

សហព័ន្ធ​ស្រូវ​អង្ករ​កម្ពុ...

ដោយៈ ជា សីហៈ/ភ្នំពេញៈ សម្...

ប្រធាន​វិទ្យាស្ថាន​ចក្ខុវ...

​ដោយៈ​សុផល​/​ភ្នំពេញ​៖លោក...

អភិបាលស្រុក​ចន្ទ្រា ពិនិត...

ដោយៈ វ៉ៃ​កូ / ស្វាយរៀងៈ ដ...