ចិន​ដកតំណែង​មន្ត្រីខេត្ត​២​នាក់​ដោយសារ​កូរ៉ូណា​វីរុស និង​ព្រមាន​ដក​មន្ត្រី​ណា​ដែល​គេចវេះ​មិន​ទទួលខុសត្រូវ​

423
ចែករម្លែក

​ខេត្ត​ហ៊ូ​ប៉ី ដែល​ជា​ស្នូល​នៃ​ការផ្ទុះ​កូរ៉ូណា​វីរុ​សលើ​ពិភពលោក​បច្ចុប្បន្ន បាន​បណ្តេញ​លេខា​បក្ស​និង​នាយក​នៃ​គណៈកម្មាធិការ​សុខាភិបាល​ខេត្ត ចំ​ពេល​មាន​ការ​រិះ​​គន់​ពី​សាធារណជន​ជា​ទូទៅ​លើ​ការដោះស្រាយ​របស់​អាជ្ញាធ​រ​ចំពោះ​ការឆ្លង​រាលដាល​នេះ​។​

​អង្គការ​ប្រឆាំង​អំពើពុករលួយ​របស់​ចិន បាន​និយាយថា ប្រធាន​គណៈកម្មាធិការ​សុខាភិបាល​ខេត្ត​ហ៊ូ​ប៉ី លោក​ចាង ជីន និង​នាយក​គណៈកម្មាធិកា​រលោក​ស្រី​ លីវ យី​ង​ហ្ស៊ី ត្រូវបាន​ដកចេញ​ពី​តំណែង ​ដោយសារ​ហេតុផល​ដែល​មិន​ត្រូវ​បាន​បញ្ជាក់ ។​

​រដ្ឋាភិបាលកណ្តាល​នៅ​ក្រុង​ប៉េកាំង​ក៏​បាន​អំពាវនាវ​ឲ្យសាធារណជន​រាយការណ៍​អំពី​ការ​ធ្វេសប្រហែស​ការងារ​ណាមួយ​របស់​មន្ត្រី​មូលដ្ឋាន និង​បាន​គំរាម​ប​ណ្តេ​​ញ​ចោល​មន្ត្រី​ណា​ដែល​ត្រូវបាន​រកឃើញ​ថា​គេចវេះ​ពី​ការទទួលខុសត្រូវ​របស់គេ​។​

​មន្ត្រី​សុខាភិបាល​ថ្នាក់ទាប​រាប់សិប​នាក់​នៅ​ទូទាំង​ប្រទេស​ចិន ក៏​ត្រូវបាន​ដក​តំណែង​ដោយសារ​តែ​បរាជ័យ​ក្នុង​ការទប់ស្កាត់​ការរីក​រាលដាល​វីរុស​ឆ្លង​ដែល​បាន​​ចាប់ផ្តើម​ចេញពី​ផ្សារ​លក់​សត្វព្រៃ​ខុស​ច្បាប់​មួយ​នៅ​ក្រុង​វូ​ហាន​នៃ​ខេត្ត​ហ៊ូ​ប៉ី​កាលពី​ចុងឆ្នាំ​មុន ហើយ​មក​ទល់​ឥឡូវ​វា​បាន​សម្លាប់​មនុស្ស​ជាង​១​ពាន់​នាក់​ហើយ​។​

​អាជ្ញាធរ​ក្រុង​វូ​ហាន​និង​ខេត្ត​ហ៊ូ​ប៉ី ត្រូវ​បាន​ស្តីបន្ទោស​ខ្លាំង​ជាង​គេ​តាម​បណ្តាញ​សង្គម ចំពោះ​បរាជ័យ​ក្នុង​ការទប់ស្កាត់​វីរុស​នៅ​ដំណាក់កាល​ដំបូង​កាលពី​ខែ​ធ្នូ​ឆ្នាំ​២០១៩ ​ឬ​ក៏​មិន​បាន​រាយការណ៍​វា​ទៅ​កាន់​ថ្នាក់លើ​។​អភិបាលខេត្ត​ហ៊ូ​ប៉ី និង​អភិបាល​ក្រុង​វូ​ហាន ក៏​រង​ការរិះគន់​មិន​ធម្មតា​ដែរ​។​

​រដ្ឋាភិបាល​ក្រុង​នេះ​ក៏​រង​ការរិះគន់​ខ្លាំង​ចំពោះ​ការប្រព្រឹត្ត​លើ​បុគ្គលិក​ពេទ្យ​៨​នាក់ រួម​មាន​វេជ្ជបណ្ឌិត លី វេន​លៀង ដែល​បាន​ស្លាប់​ដោយ​កូរ៉ូណា​វីរុស​កាលពី​សប្តាហ៍​​មុន​។​ពួកគេ​បាន​ព្រមាន​អំពី​គ្រោះថ្នាក់​នៃ​កូរ៉ូណា​វីរុស​មុន​ដំបូង​គេ តែ​បែរជា​ត្រូវ​ប៉ូលិស​បាន​ហៅ​ទៅ​ព្រមាន​ចំពោះ​ការផ្សព្វផ្សាយ​ពាក្យ​ចចាមអារ៉ាម​។​

​ក្រោយ​ការរិះគន់​ពី​សាធារណជន អង្គការ​ប្រឆាំង​អំពើពុករលួយ​របស់​បក្ស​បាន​បញ្ជូន​ក្រុម​មួយ​ទៅ​កាន់​ក្រុង​វូ​ហាន​ដើម្បី​ស៊ើបអង្កេត​ករណី​លោក​លី វេន​លៀង ហើយ​មន្ត្រី​ការទូត​ចិន​បន្ទោស​ករណីនេះ​លើ​រដ្ឋាភិបាល​មូលដ្ឋាន​៕ដោយ៖វាសនា/Ha

លោក​ចាង ជីន​(​ឆ្វេង​) និង​លោកស្រី លីវ យី​ង​ហ្ស៊ី ត្រូវបាន​ដកចេញ​ពី​តំណែង បន្ទាប់​ពី​ក្រុមប្រឆាំង​អំពើពុករលួយ​ចុះ​ស៊ើបអង្កេត​