ប្រជា​សហគមន៍​អភិរក្ស​ឃ្មុំ​ខេត្តសៀមរាប កាក់កប ប៉ុន្តែ​បារម្ភ​ខ្លាច​បាត់បង់​ឃ្មុំ​ធម្មជាតិ​

ដោយៈ មេសា​/​សៀមរាបៈ ក្រោម​កិច្ច​ចាត់ចែង​សម្របសម្រួល​របស់​អង្គការ GRET អ្នកសារព័ត៌មាន​ក្នុងស្រុក ១ ក្រុម បាន​ទៅដល់​ព្រៃ​អ​ភ​រិ​ក្ស​សត្វ​ឃ្មុំ​ធម្មជាតិ ដែល​ស្ថិតនៅ​ក្នុងភូមិ ត្បែង​ខាងលិច ឃុំ ត្បែង ស្រុក បន្ទាយស្រី ខេត្ត សៀមរាប ។ ប្រជា​សហគមន៍​អ​ភ​រិ​ក្ស​សត្វ​ឃ្មុំ​ធម្មជាតិ នៅ​ទីនោះ កំពុង​បារម្ភ​ខ្លាច​បាត់បង់​សត្វ​ឃ្មុំ​ធ្ម​ជាតិ ដែលជា​ទ្រព្យសម្បត្តិ​របស់​ពួកគាត់ ហើយ​ដែល​ពួកគាត់​បាន​អាស្រ័យ​ផល​យ៉ាង​កាក់កប​តាំងពី​ដូនតា​មក ។ ក្តីបារម្ភ​បែបនេះ​កើតឡើង​ដោយសារ​មាន​អ្នកខ្លះ​មកពី​ស្រុក​ឆ្ងាយ​បាន​យក​ឃ្មុំ​មិន​ត្រឹមត្រូវ​តាម​បច្ចេកទេស គឺ​ពួកគេ​បាន​យក ឃ្មុំ ទាំង​សំបុក ឬ ទាំង​កូន​ឃ្មុំ ពោលគឺ​ពួកគេ​មិនមែន​យកតែ​ក្បាលទឹក​ឃ្មុំ​ឡើយ ដែល​ការយក​ឃ្មុំ​បែបនេះ នាំឱ្យ​វិនាស​ហិនហោច​បាត់បង់​សត្វ​ឃ្មុំ នៅ​ថ្ងៃ​ណាមួយ​ជាមិនខាន ខណៈ​សត្វ​ឃ្មុំ​ធម្មជាតិ កំពុង​ប្រឈម​នឹង​បញ្ហា​ជាច្រើន​ស្រាប់​ទៅហើយ ដូចជា​ការបាត់បង់​ព្រៃឈើ ប​ម្រែ​ប្រ​មួល​អាកាសធាតុ និង ការប្រើប្រាស់​ថ្នាំ​គីមី​ពុល​ជាដើម ។


​មូលហេតុ​នាំឱ្យ​វិនាស​សត្វ​ឃ្មុំ​


​តាម​ធម្មតា សត្វ​ឃ្មុំ មាន​អាយុកាល​ត្រឹមតែ ១ ទៅ ២ ខែ ប៉ុណ្ណោះ ក៏​ស្លាប់ទៅ ។ ហេតុនេះ ត្រូវ​ការកូន​ឃ្មុំ​បន្ត​ពូជ​តទៅទៀត ហើយ​ប្រសិនបើ​យក​ឃ្មុំ​ទាំង​សំបុក ឬ ទាំង​កូន​ឃ្មុំ នោះ នៅពេលដែល​មេ​ឃ្មុំ​ស្លាប់ទៅ នឹង​មិនមាន​ឃ្មុំ​បន្ត​ពូជ​ទៀតឡើយ ។​
​កត្តា​ដែលនាំឱ្យ​វិនាស​បាត់បង់​សត្វ​ឃ្មុំ​មួយទៀត​នោះ គឺ​ការបាត់បង់​ព្រៃឈើ ព្រោះ​ឃ្មុំ​ត្រូវការ​លម្អង និង ទឹ​ដម​ផ្កាឈើ​ជា​អាហារ និង សម្រាប់​ចិញ្ចឹម​កូន​ឃ្មុំ​ក្នុង​សំបុក ។ ដូច្នេះ​នៅពេល​បាត់បង់​ព្រៃឈើ ឃ្មុំ​ក៏​បាត់បង់​អាហារ មិនអាច​ចិញ្ចឹមជីវិត​ខ្លួន​វា និង កូន​របស់​ពួកវា​ទៀតឡើយ ។​


​ប្រការ​ដ៏​គ្រោះថ្នាក់​មួយទៀត គឺ​អ្នកខ្លះ​យក​ឃ្មុំ​នៅពេល​យប់ ហើយ​ប្រើ​ភ្លើង ជាហេតុ​នាំឱ្យ​ឆេះ​មេ​ឃ្មុំ​ស្លាប់ ខណៈ​អ្នកខ្លះ​បាន​យក​ថ្នាំ​បាញ់​មូស​ទៅ​បាញ់​ដាក់​សំបុក​ឃ្មុំ ដើម្បី យក​ឃ្មុំ ដែល​ទង្វើ​បែបនេះ បណ្តាលឱ្យ​ឃ្មុំ​ពុល​ថ្នាំ​នោះ​ស្លាប់ ។​


​មួយសោត ការប្រែប្រួល​អាកាសធាតុ ក៏​ជា​កត្តា​នាំឱ្យ​បាត់បង់​សត្វ​ឃ្មុំ​ដែរ ព្រោះ​ឃ្មុំ​ដឹងថា រដូវ​កាលណា​មាន​ផ្កា​រីក​នៅទីណា ហើយក៏​នាំគ្នា​ទៅ​ក្រេប​ផ្កា​នៅ​ទីនោះ ។ ប៉ុន្តែ​ការប្រែប្រួល​អាកាសធាតុ ធ្វើឱ្យ​ឈើ​រីក​ផ្កា​យឺត ឬ រីក​មុន​រដូវ​កាល ហេតុនេះ​ពេល​ឃ្មុំ​នាំគ្នា​ទៅ​ក្រេប​ផ្កា​នៅ​ទីនោះ អាច​មិនទាន់មាន​ផ្កា​រីក ឬ ក៏​ហួស​រដូវ​ផ្កា​រីក​ទៅហើយ ដែលជា​លទ្ធផល គឺ​ឃ្មុំ​គ្មាន​លម្អងផ្កា​ជា​អាហារ ។​


​ប្រការ​ដ៏​គ្រោះថ្នាក់​បំផុត​មួយទៀត​ដែលនាំឱ្យ​វិនាស​បាត់បង់​សត្វ​ឃ្មុំ​ធម្មជាតិ​ដែរនោះ គឺ​ការប្រើប្រាស់​ថ្នាំ​គឺ​មី​នៅក្នុង​វិស័យ​កសិកម្ម ។ ការបាញ់​ថ្នាំ​សម្លាប់​សត្វល្អិត​នៅក្នុង​វិស័យ​កសិកម្ម ពេល​ឃ្មុំ​ទៅ​ក្រេប​ផ្កា​ដំណាំ​ទាំងនោះ ក៏​ពុល​ស្លាប់​យ៉ាង​រង្គាល ។​
​ម្យ៉ាងទៀត​រាល់​គ្រាប់ពូជ​ដំណាំ​ជាច្រើន​ប្រភេទ ក៏​សុទ្ធតែ​ដាក់​ថ្នាំ​ការពារ​សត្វល្អិត នៅពេល​យក​គ្រាប់ពូជ​ដំណាំ​ទាំងនោះ​ទៅ​ដាំ ពេល​ដំណាំ​លូតលាស់​ឡើង ក៏​ស្រូបយក​ទាំង​ជាតិពុល នៃ ថ្នាំ​គីមី​ទាំងនោះ​ទៅគ្រប់​ផ្នែក នៃ ដំណាំ​ទាំងនោះ ដោយ​រួមទាំង​ផ្កា​របស់​ពួកវា​ផង ។ ហេតុនេះ ពេល​ឃ្មុំ​ទៅ​ក្រេប​ផ្កា​ទាំងនោះ ក៏​ពុល​ស្លាប់​យ៉ាង​រង្គាល​ដែរ ។​


គុណប្រយោជន៍ នៃ សត្វ​ឃ្មុំ​


​ឃ្មុំ​គឺជា​សត្វ​ស្លូតបូត មិនមែនជា​សត្វ​ចម្លងរោគ ហើយ​មាន​ប្រយោជន៍​យ៉ាងច្រើន ដែល​ក្នុងនោះ មាន​ប្រយោជន៍​ពី​ទឹកឃ្មុំ ប្រយោជន៍​ក្នុង​វិស័យ​កសិកម្ម និង ប្រយោជន៍​ក្នុងការ​រក្សា​ព្រៃឈើ ។​


​លោក ពាង ឆុ​ញ គឺជា​ប្រជា​សហគមន៍​ម្នាក់ នៃ តំបន់​អភិរក្ស​សត្វ​ឃ្មុំ​ធម្មជាតិ ភូមិ ត្បែង​ខាងលិច ឃុំ ត្បែង ស្រុក បន្ទាយស្រី ខេត្ត សៀមរាប ដែលជា​អ្នក​ប្រកបមុខរបរ​អភិរក្ស និង យក​ឃ្មុំ​នេះ​តាំងពី​វ័យក្មេង​មកម្ល៉េះ បានឱ្យដឹងថា កាលពីមុន​ក្នុង ១ ឆ្នាំ គាត់​អាច​ប្រមូល​ទឹកឃ្មុំ​បាន​ប្រមាណ​ជា ៧០០ ទៅ ៨០០ លីត្រ​ឯណោះ ។ ប៉ុន្តែ​ប៉ុន្មាន​ឆ្នាំ​ចុង​ក្រោយនេះ ក្នុង ១ ឆ្នាំ គាត់​អាច​ប្រមូល​ទឹកឃ្មុំ​បានត្រឹមតែ​ប្រមាណ​ជា ៣០០ លីត្រ​ប៉ុណ្ណោះ គឺ​ដោយសារ​មាន​អ្នករក​ឃ្មុំ​ច្រើន ម្យ៉ាងទៀត​ដោយសារ​មាន​អ្នក​មកពី​ស្រុក​ផ្សេង​ដែល​មិន​យល់ដឹង​អំពី​របៀប​ថែរក្សា​ឃ្មុំ ក៏​យក​ឃ្មុំ ទាំង​សំបុក​ឃ្មុំ ឬ កូន​ឃ្មុំ ជាហេតុ​នាំឱ្យ​ឃ្មុំ​ថយចុះ ។​


​ឥឡូវនេះ​ចូរ​យើង​គិតថា ក្នុង ១ ឆ្នាំ ប្រជា​សហគមន៍​អាច​ប្រមូល​ទឹកឃ្មុំ​បាន ៣០០ លីត្រ ក៏​ជាការ​ប្រសើរ​ណាស់ដែរ ព្រោះថា ទឹកឃ្មុំ ១ លីត្រ គិត​ជា​មធ្យម​លក់​ចេញ​ក្នុងតម្លៃ ១០ ម៉ឺន​រៀល ហេតុនេះ ក្នុង ១ ឆ្នាំ ប្រជា​សហគមន៍​អាច​រក​ចំណូល​ពី​ទឹកឃ្មុំ​បាន ៣០ លាន​រៀល ឬ ប្រមាណ​ជា ៧.៥០០ ដុល្លារ​ដែរ ដែល​ចំនួន​នេះ​ចាត់ទុកថា​ជា​ចំនួន​ដ៏​សមរម្យ​ណាស់ដែរ ។ នេះ​យើង​មិនទាន់​គិតដល់​គុណប្រយោជន៍ នៃ ទឹកឃ្មុំ ដូចជា​ប្រើប្រាស់​ជា​ឱសថ​បាន​ច្រើន​ប្រការ​ជាដើម​ផង ។​


​ចំពោះ​វិស័យ​កសិកម្ម​វិញ គឺថា ផ្កា នៃ បន្លែ​ផ្លែឈើ​ទាំងឡាយ មិនអាច​ក្លាយជា​ផ្លែ​បានឡើយ ដ៏​រាប​ណា​គ្មាន​ជាតិ​លម្អង​ញី និង ឈ្មោល ផ្សំ​បញ្ចូល​គ្នា ហើយ​ផ្កា មិនអាច​ស្កាត់​រកគ្នា​បានឡើយ ហេតុនេះ​ឃ្មុំ​គឺជា​ភ្នាក់ងារ​ដ៏​សំខាន់បំផុត​មួយ ក្នុងការ​ធ្វើឱ្យ​ផ្កា ក្លាយជា​ផ្លែ គឺ​តាមរយៈ​ឃ្មុំ​ក្រេប​ពី​ផ្កា​មួយ​ទៅ​ផ្កា​មួយ ក៏បាន​នាំយក​លម្អងផ្កា​ជាប់​នឹង​ជើង​របស់​វា​ទៅជា​មួយ​ផង ធ្វើឱ្យ​លម្អង​ញី និង ឈ្មោល​បាន​លាយ​គ្នា ជាហេតុ​នាំឱ្យ​ផ្កា​ទាំងនោះ អាច​ក្លាយជា​ផ្លែ​ទៅបាន ដែល​ប្រការនេះ​បានសេចក្តីថា ប្រសិនបើ​គ្មាន​ឃ្មុំ ( និង សត្វល្អិត​ផ្សេងទៀត ) ទេ ផ្កា​ក៏​មិនអាច​ក្លាយជា​ផ្លែ​បានដែរ ពោលគឺ​ផ្កា​រួចហើយ ក៏​រុះ​រោយ​ចោល​ទៅ ។ ដូច្នេះ បន្លែ​ប្រភេទ​ខ្លះ​ដែល​គេ​ដាំ​ដើម្បី​យក​ផ្លែ ( ដូចជា​ត្រឡាច និង ល្ពៅ និង ត្រប់ ជាដើម ) គឺ​មិនមាន​ផ្លែ​ឡើយ ។​


​ត្រូវបាន​រកឃើញថា ប្រមាណ​ជា ៣០ ភាគរយ នៃ បន្លែ​ផ្លែឈើ គឺ​បានមកពី​ការបង្កា​ត់របស់​សត្វ​ឃ្មុំ ។​


​ចំណែក​ព្រៃឈើ​វិញ​ក៏​ដូច្នោះ​ដែរ គឺថា ប្រសិនបើ​គ្មាន​ឃ្មុំ​ទេនោះ ផ្កាឈើ​ទាំងនោះ មិនអាច​ក្លាយជា​ផ្លែ​បានឡើយ បើ​បែប​នោះ​មែន ទី ១ មនុស្ស និង សត្វ នឹង​មិនមាន​ផ្លែឈើ​ជា​អាហារ ហើយ​ទី ២ ឈើ​ក៏​នឹង​ដាច់​ពូជ ព្រោះ​គ្មាន​ផ្លែ ឬ គ្មាន​គ្រាប់​បន្ត​ពូជ ។


ហេតុអ្វី​អភិរក្ស​សត្វ​ឃ្មុំ​ធម្មជាតិ ហើយ​អភិរក្ស​ដោយ​របៀប​ណា​ ?


​ដូចដែល​បានលើកឡើង​ពី​ខាងដើម​នេះ គឺជា​មូល​ហេតុដែល​ចាំបាច់ ត្រូវតែ​ថែរក្សា​ការពារ​សត្វ​ឃ្មុំ​ឱ្យបាន​ល្អ ព្រោះថា ប្រសិនបើ​គ្មាន​ឃ្មុំ​ទេនោះ ក៏​គ្មាន​បន្លែ​ផ្លែឈើ និង ព្រៃឈើ​ដែរ ។


​លោក អេ​រិ​ក ហ្គឺ​រី​ន ជីវ​វិទូ បារាំង ដែលជា​អ្នកឯកទេស​ខាង​សត្វ​ឃ្មុំ បានផ្តល់​អនុសាសន៍​ថា ដើម្បី អ​ភ​រិ​ក្ស​សត្វ​ឃ្មុំ​ធម្មជាតិ​ឱ្យបាន​គង់វង្ស ទី ១ ត្រូវ​រក្សា​ព្រៃឈើ​ឱ្យបាន​ល្អ ហើយក៏​ត្រូវតែ​ដាំ​ដើមឈើ​បន្ថែមទៀត ព្រោះ​ឃ្មុំ​ត្រូវការ​លម្អងផ្កា​ឈើ​ជា​អាហារ និង សម្រាប់​ចិញ្ចឹម​កូន​បន្ត​ពូជ ដែល​ក្នុងន័យនេះ​បានសេចក្តីថា បើ​គ្មាន​ឃ្មុំ ក៏​គ្មាន​បន្លែ​ផ្ល​ឈើ និង ព្រៃឈើ ហើយ​បើ​គ្មាន​បន្លែ​ផ្លែឈើ និង ព្រៃឈើ ក៏​គ្មាន​ឃ្មុំ​ដែរ ។​


​ម្យ៉ាងទៀត លោក អេ​រិ​ក ហ្គឺ​រី​ន បន្តថា ពេល​យក​ឃ្មុំ ត្រូវ​យកតែ​ទឹកឃ្មុំ​បាន​ហើយ មិន​ត្រូវយក​សំបុក​ឃ្មុំ ឬ កូន​ឃ្មុំ​ឡើយ គឺ​ដើម្បី ទុកឱ្យ​កូន​ឃ្មុំ​ញាស់​ឡើង​បន្ត​ពូជ​តទៅទៀត ។ ចំណែក​សាធារណជន ក៏​ត្រូវតែ​ប្តូរ​ឥរិយាបថ​ដែរ គឺ​សូមកុំ​បរិភោគ​សំបុក​ឃ្មុំ ឬ កូន​ឃ្មុំ ទើប​អ្នកយក​ឃ្មុំ មិន​យក​សំបុក និង កូន​ឃ្មុំ ។ រីឯ​ការយក​ឃ្មុំ​តែ​ក្បាលទឹក​នេះ​ទៀតសោត ក៏ត្រូវ​យកតែ ៧០ ទៅ ៨០ ភាគរយ​បាន​ហើយ គឺ​មិន​ត្រូវយក​ទាំងអស់​ទេ ។ ធ្វើបែបនេះ គឺ​រយៈពេល​ជាង ២០ ថ្ងៃក្រោយ មេ​ឃ្មុំ​អាចបង្កើត​ទឹកឃ្មុំ​ឡើងវិញ ដែល​ក្នុង ១ សំបុក ឬ ១ បង្គង​គេ​អាច​យក​ទឹកឃ្មុំ​បាន ២ ទៅ ៣ ដង​ឯណោះ ដែល​នេះ​គឺជា​មធ្យោបាយ​ដ៏​ល្អ​បំផុត ។​


​លើសពីនេះ​ទៅ មិនត្រូវ​ប្រើ​ភ្លើង​យក​ឃ្មុំ​ឡើយ ហើយក៏​មិន​ត្រូវយក​ថ្នាំពុល ដូចជា​ថ្នាំ​បាញ់​មូស​ជាដើម ទៅ​បាញ់​ដាក់​សំបុក​ឃ្មុំ ដើម្បី យក​ឃ្មុំ​ឡើយ ព្រោះ​វា​បណ្តាលឱ្យ​ឃ្មុំ​ស្លាប់ ហើយក៏​ប៉ះពាល់​ដល់​សុខភាព​អ្នក​បរិភោគ​ដែរ ។​


​កាន់តែ​សំខាន់​ជាងនេះទៅទៀត គឺ​មិនត្រូវ​ប្រើប្រាស់​ថ្នាំ​គីមី​ពុល​នៅក្នុង​គ្រាប់ពូជ​ដំណាំ និង ពេល​ដាំ​ដំណាំ​ឡើយ ព្រោះ​វា​នាំឱ្យ​ពុល​ស្លាប់​សត្វ​ឃ្មុំ ។​


​កម្ពុជា​មោទនភាព​បំផុត​ដែលមាន​ឃ្មុំ​ច្រើន​ប្រភេទ​ជាងគេ​ក្នុង​លោក


​អ្នកជំនាញ​ទាំងឡាយ បាន​អះអាងថា នៅលើ​ពិភពលោក​មាន​ឃ្មុំ​ប្រមាណ​ជា ២ ម៉ឺន​ប្រភេទ ប៉ុន្តែ​ឃ្មុំ​ដែល​ផលិត​ទឹកបាន​ច្រើន​មានតែ ៩ ប្រភេទ​ប៉ុណ្ណោះ ។ ក្នុងចំណោម ៩ ប្រភេទ​នោះ មាន ១ ប្រភេទ គឺជា​ឃ្មុំ​នៅ​ទ្វីបអាហ្វ្រិក និង ទ្វីបអឺរ៉ុប ចំណែក ៨ ប្រភេទ​ទៀត គឺជា​ឃ្មុំ​នៅក្នុង​បណ្តា​ប្រទេស​ក្នុង​ទ្វីបអាស៊ី ។


​អ្វី​ដែលជា​ប្រការ​គួរ​មោទនភាព​បំផុត​នោះ គឺ​ក្នុងចំណោម​ឃ្មុំ​ទាំង ៨ ប្រភេទ​នៅ​ទ្វីបអាស៊ី​នោះ គឺមាន​ឃ្មុំ ៤ ប្រភេទ​គឺជា​ឃ្មុំ​របស់​ប្រទេស​កម្ពុជា​នេះ​តែម្តង ហើយ​ឃ្មុំ​ទាំង ៤ ប្រភេទ​នោះ គឺ ១. ឃ្មុំចង្អេរ ឬ ឃ្មុំ​យក្ស , ២. ឃ្មុំផ្លិត​ពណ៌​ក្រហម , ៣. ឃ្មុំផ្លិត​ពណ៌​ខ្មៅ , និង ៤. ឃ្មុំ​រូង ៕ Kh

អ្នកសារព័ត៌មានជួបជុំគ្នានៅអង្គការ GRET មុនពេលចេញដំណើរទៅព្រៃអភិរក្សសត្វឃ្មុំធម្មជាតិ ( រូបៈ មេសា)
កម្ពុ​ជាមាន​មោទនភាព​បំផុត​ដែលមាន​ឃ្មុំ​ដល់​ទៅ ៤ ប្រភេទ ក្នុងចំណោមឃ្មុំដែលមានទឹកច្រើនទាំង ៩ ប្រភេទទូទាំងពិភពលោក ( រូបៈ មេសា)
ការយកឃ្មុំទាំងសំបុក ឬ ទាំងកូន គឺជាកំហុសដ៏ធំ ព្រោះវានាំឱ្យផុតពូជឃ្មុំធម្មជាតិ (រូបៈ អ៊ីនធឺណេត)
មធ្យោបាយល្អបំផុត នៃ ការយកឃ្មុំ គឺយកតែក្បាលទឹកបានហើយ ហើយយកតែ ៧០ ទៅ ៨០ ភាគរយបានហើយ ( រូបៈ មេសា)
ប្រជាសហគមន៍ ពាង ឆុញ កាលពីមុនក្នុង ១ ឆ្នាំ គាត់អាចរកទឹកឃ្មុំបាន ៧០០ ទៅ ៨០០ លីត្រ ប៉ុន្តែបច្ចុប្បន្ន ១ ឆ្នាំ បានប្រមាណជា ៣០០ លីត្រ ដោយក្នុង ១ លីត្រ តម្លៃ ១០ ម៉ឺនរៀល ហេតុនេះ ១ ឆ្នាំ អាចរកប្រាក់ចំណូលបាន ៣០ លានរៀល នេះមិនទាន់គិតពីការលក់ក្រមួនឃ្មុំផងទេ ( រូបៈ មេសា)
លោក អេរិក ហ្គឺរីន អ្នកឯកទេសខាងឃ្មុំ ផ្តល់អនុសាសន៍អំពីការថែរក្សាឃ្មុំឱ្យបានគង់វង្ស ( រូបៈ មេសា)

ទីតាំងផ្សាយពាណិជ្ជកម្ម

- Advertisment -

Most Popular

មន្ត្រី​អភិរក្ស​សត្វព្រៃ ...

​ដោយៈ ដេប៉ូ / មណ្ឌលគិរីៈ ...

អាជ្ញាធរ​ខណ្ឌចំការមន និង​...

​ដោយៈ រ៉ា​ម៉ន ភ្នំពេញៈ អា...

​សមត្ថកិច្ច ឲ្យ​ម្ចាស់​ហា...

​ដោយៈ ស​រិ​ទ្ធ / កណ្តាលៈ ...

​ក្រុមការងារ​សុខាភិបាល​ខេ...

ដោយៈ ទេ​ពក​ង្រី / កំពង់ឆ្...