ដោយបាយ័ន/សៀមរាបៈមន្ដ្រីនៃអាជ្ញាធរជាតិអប្សរាបាននាំគ្នាធ្វើពិធីក្រុងពាលីសុំសេចក្ដីសុខសេចក្ដីចំរើនពីបារមីវត្ថុសក្ដិសិទ្ធិដែលថែរក្សាប្រាសាទអង្គរជួយថែរក្សាសម្រាប់បើកពិធីប្រារព្ធខួប២៥ឆ្នាំនៃការបង្កើតអាជ្ញាធរជាតិអប្សរានៅថ្ងៃទី១៩ខែកុម្ភៈឆ្នាំ២០១៩ខាងមុខននេះ។ពិធីប្រុងពាលីនេះធ្វើឡើងនៅខាងមុខប្រាសាទអង្គរវត្ដកាលពីល្ងាចថ្ងៃទី១៤ខែកុម្ភៈឆ្នាំ២០២០ដោយមាននិមន្ដព្រះសង្ឃសូត្រមន្ដជ័យនតោដល់មន្ត្រីនៃស្ថាប័នអាជ្ញាធរជាតិអប្សរាផងដែរ។
មន្ត្រីអាជ្ញាធរជាតិអប្សរាបានឱ្យដឹងថាពិធីក្រុងពាលីសុំសេចក្ដីសុខនេះគឺធ្វើឡើងតាមទំនៀមទម្លាប់និងនិងប្រពៃណីរបស់ខ្មែរដែលមានតាំងពីបុរាណកាលមកក្នុងគោលបំណងសុំម្ចាស់ទឹកម្ចាស់ដីរក្សាដែនដីអង្គរ។ឱ្យផ្ដល់នូវសេចក្ដីសុខចម្រើនដល់ថ្នាក់ដឹកនាំក្រុមការងារនិងភ្ញៀវជាតិ-អន្តរជាតិទាំងអស់ដែល ចូលមកទស្សនាផងដែរ។ជាពិសេសជាផ្ដល់នូវក្ដីសុខនៃការប្រារព្ធពិធីខួប២៥ឆ្នាំនៃការបង្កើតអាជ្ញាធរជាតិអប្សរា។
បន្ទាប់ពីចប់ពិធីប្រុងពលីនេះហើយ ក្រុមការងារនឹងចាប់ផ្ដើមរៀបចំពិធីប្រារព្ធខួបចាប់ពីថ្ងៃទី១៥នេះ រហូតដល់ថ្ងៃទី២២ខែកុម្ភៈឆ្នាំ២០២០ខាងមុខដោយក្នុងនោះអាជ្ញាធរជាតិអប្សរាក៏បានដាក់តាំងនូវសមិទ្ធផលជាច្រើនក្នុងរយៈពេល២៥ឆ្នាំមកនេះ។ទន្ទឹមនឹនេះអាជ្ញាធរជាតិអប្សរានឹងបើកទ្វារស្វាគមន៍ដល់សាធារណជនព្រមទាំងសិស្សនិស្សិតដើម្បីសិក្សាស្វែងយល់ពីការងារស្ថាប័នដោយផ្ទាល់។
ដើម្បីញ៉ាំងឱ្យព្រឹត្តិការណ៍ប្រារព្វខួប២៥ឆ្នាំនេះកាន់តែពោរពេញដោយការចង់ចាំនិងអធឹកអធមបន្ថែមទៀត។អាជ្ញាធរជាតិអប្សរានឹងរៀបចំពិធីសាសនានៅបរិវេណខាងមុខប្រាសាទអង្គរវត្តដាក់ចង្ហាន់បិណ្ឌបាត្រប្រគេនព្រះសង្ឃចំនួន២២៥អង្គនៅថ្ងៃទី១៩ខែកុម្ភៈឆ្នាំ២០២០វេលាម៉ោង៧៖៣០នាទីព្រឹកបន្ថែមទៀត៕S/
រូបថតៈអាជ្ញាធរជាតិអប្សរាធ្វើពិធីក្រុងពាលីសុំសេចក្ដីសុខមុនធ្វើពិធីអបអរខួប២៥ឆ្នាំនៃការបង្កើតស្ថាប័នេះ(បាយ័ន)
