អគ្គិភ័យ​ឆេះ​ឃ្លាំង​ទុក​សម្ភារ សំណង់​យ៉ាង​សន្ធោសន្ធៅ​

433
ចែករម្លែក

ដោយ​: ចាន់តូ / ភ្នំពេញ​: ឃ្លាំង​មួយកន្លែង​ត្រូវបាន​អគ្គិភ័យ​លេប​ត្របាក់​យ៉ាង​សន្ធោសន្ធៅ កាលពី​វេលា​ម៉ោង ៩​យប់​ថ្ងៃអាទិត្យ ទី​១៦ ខែកុម្ភៈ ឆ្នាំ​២០២០ ចំណុច​ផ្លូវលំ​ក្នុងភូមិ​គោក​ចំបក់ សង្កាត់​ចោមចៅ​ទី​១ ខណ្ឌ​ពោធិ៍​សែន​ជ័យ​។​

​តាម​ប្រភព​បានឱ្យដឹងថា ដំបូង​ឡើយ​គេ​ឃើញ​មាន​ផ្សែងហុយ​ចេញពី​ក្នុង​ឃ្លាំង ដែល​ផ្ទុក​សម្ភារខាងលើ មួយសន្ទុះ​ក៏បង្ក​ជា​អគ្គិភ័យ​ឆាបឆេះ​យ៉ាង​សន្ធោសន្ធៅ ទើប​មានការ​ភ្ញាក់ផ្អើល​ដល់​បុគ្គលិក និង​កម្មករ ហើយក៏​ទាក់ទង​ទៅ​សមត្ថកិច្ច​មូលដ្ឋាន​ហៅ​រថយន្ត​ពន្លត់អគ្គិភ័យ​មក​ពន្លត់ជា​បន្តបន្ទាប់​ជាច្រើន​គ្រឿង​នៅ​កន្លែងកើតហេតុ បាន​បាញ់​ទប់ស្កាត់​មិន​ឲ្យ​ឆ្លង​ដល់ផ្ទះ​ក្បែរ​ខាង​ផ្សេងទៀត​។ ហើយ​ភ្លើង​ក៏បាន​រលត់ទៅវិញ​នៅវេលា​ម៉ោង ៩​និង ៣០​នាទី​នៅ​ថ្ងៃខែ​ឆ្នាំ​ដដែល​។ ចំពោះ​រថយន្ត​ពន្លត់​អគ្គិភ័យ​ប្រើប្រាស់​ទឹកអស់​ចំនួន ៨​គ្រឿង ចំណែកឯ​សម្ភារ​រង​ការខូចខាត​មួយចំនួនធំ​។

មូលហេតុ​អគ្គិភ័យ សមត្ថកិច្ច​កំពុងតែ​ស្រាវជ្រាវ​បន្ត តែបើតាម​សម្ដី​កម្មករ​ម្នាក់​ដែល​ធ្វើការនៅ​ទី​នោះបាន​ប្រាប់​ឲ្យ​ដឹងថា មកពី​ឆ្លង​ចរន្ត​អគ្គិសនី​បង្ក​ឲ្យ​មាន​អគ្គិភ័យ​កើតឡើង តែ​សំណាងល្អ​មិន​បង្ក​ឱ្យ​នរណាម្នាក់ រងរបួស​ឬ​ស្លាប់​នោះទេ ក្នុង​ហេតុការណ៍​អគ្គិភ័យ​នេះ​៕ ល​/Ha