សម្តេច​តេ​ជោៈ​អ្នកធ្វើដំណើរ​ជាង​ពីរពាន់​នាក់ ​បើ​សា​មី​ប្រទេស​គេ​មិន​ទទួល ​គឺ​កម្ពុជា​នឹងបន្ត​មើល ថែ​ពួកគេ​

364
ចែករម្លែក
សម្តេច​តេ​ជោៈ​អ្នកធ្វើដំណើរ​ជាង​ពីរពាន់​នាក់​បើ​សា​ម៉ី​ប្រទេស​គេ​មិន​ទទួល​គឺ​កម្ពុជា​នឹង បន្ត​មើល ថែ​ពួកគេ​

ដោយៈ មុនី​រ័ត្ន​/ ​ភ្នំពេញៈ ប្រមុខ​ដឹកនាំ​កម្ពុជា​ សម្តេច​តេ​ជោ ហ៊ុន សែន បាន​បញ្ជាក់ថា ចំពោះ​នាវា​ទេសចរណ៍​ដែលមាន​អ្នកធ្វើដំណើរ​ជាង ២០០០​នាក់ ដែល​បានមក​ដល់ទី​សុវត្ថិភាព​ក្នុង​ទឹកដី​កម្ពុជា​ហើយ បើ​សាមី​ប្រទេស​គេ​មិន​ទទួល​ទេ គឺ​កម្ពុជា​នឹង​បន្ត​មើលថែ​ពួកគេ​។ នេះ​បើ​យោងតាម​ផេ​ក​ហ្វេ​ស​ប៊ុ​ក​ផ្លូវការ​របស់​សម្តេច​តេ​ជោ ហ៊ុន សែន កាលពី​ព្រលប់​ថ្ងៃទី​១៧ ខែកុម្ភៈ ឆ្នាំ​២០២០​។​


​ផេ​ក​ដដែល​បានសរសេរថា​នៅក្នុង​ពិធី​បូកសរុប​ការងារ​របស់ «​ក្រុមប្រឹក្សា​ជាតិ​កម្ពុជា​ដើម្បី​ស្ត្រី​» កាលពី​ព្រឹក​មិញ​ ថ្ងៃទី ១៧ ខែកុម្ភៈ នៅ​វិមាន​សន្តិភាព សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា បាន​មានប្រសាសន៍​អំពី​ជំងឺ COVID-19 (​ឈ្មោះ​ផ្លូវការ​នៃ​មេរោគ​កូ​រ៉ូ​ណា​ថ្មី​) ដែល​កំពុង​ញាំញី និង​អង្រួន​សភាពការណ៍​នៅក្នុង​ប្រទេស​ក្នុង​តំបន់ និង​ពិភពលោក​ឲ្យ​មានការ​ភ័យ​តក់ស្លុត​រហូត​បាត់អស់​នូវ​គុណធម៌ សីលធម៌ មនុស្សធម៌ និង​មិត្ត​ភាពល្អ​ជាមួយគ្នា​។

សម្តេច​តេ​ជោ​នាយករដ្ឋមន្ត្រី​បាន​បញ្ជាក់ថា ជំងឺ​ពិតប្រាកដ​ដែល​យើង​កំពុង​ប្រឈមមុខ​ជាក់ស្តែង​នាពេលនេះ គឺជា​ជំងឺ​ភ័យខ្លាច​ជ្រុល និង​អំពើ​រើសអើង​ជាតិ​សាសន៍​ជ្រុល រហូតដល់​បោះបង់​ពលរដ្ឋ​ខ្លួនឯង​ចោល​។ ជាក់ស្តែង​ដូចជា ករណី​នាវា​ទេសចរណ៍ MS Westerdam ដែលមាន​អ្នកធ្វើដំណើរ​ចម្រុះ​ជាតិ​សាសន៍​ជាង ២២០០​នាក់ ដែល​បាន​បដិសេធ​ដោយ​ប្រទេស​និង​កោះ​ចំនួន​ប្រាំមួយ មិន​ឲ្យ​ចូលចត ដែល​នៅក្នុង​នាវា​ដ៏​ធំ​នេះ ក៏មាន​ពលរដ្ឋ​អាម៉េរិក​ជាង ៦០០​នាក់​ផងដែរ ដែល​បាន​សុំ​ចូលចត​នៅ​កោះ ហ្គាំ​(Guam) ដែលជា​ទឹកដី​កោះ​មួយផ្នែក​របស់​សហរដ្ឋ​អាម៉េរិក ក៏​មិន​ត្រូវបាន​អនុ​ញ្ញា​តឲ្យ​ចូលចត​ដែរ​។ តើ​យ៉ាងម៉េច​បានជា​សាមី​ប្រទេស និង​សាមី​កោះ​ទាំងនោះ​សម្រេច​បែបនេះ​ទៅរួច​? ពិភពលោក​អាច​នឹង​បែកបាក់ ហើយ​តម្លៃ​មនុស្ស​នៅត្រង់ណា បើ​សិទ្ឋិ​រស់រានមានជីវិត​គ្មាន​ផង​នោះ​?។


​សម្តេច​តេ​ជោ ហ៊ុន សែន បាន​បញ្ជាក់ថា​ ការសម្រេចចិត្ត​របស់​ក​ម្ពុ​ជា​ក្នុងការ​ទទួល​នាវា​ទេសចរណ៍ MS Westerdam ឲ្យ​ចូលចត​នៅ​ក្រុងព្រះសីហនុ​ក្នុង​ទឹកដី​កម្ពុជា គឺជា​កាយវិការ​មនុស្ស​ធម៌​ដោយ​គ្មាន​ការរើសអើង​ជាតិ​សាសន៍ ក្នុងការ​លើកស្ទួយការគោរព​សិទ្ធិមនុស្ស​តាមរយៈ​ការជួយ​ផ្តល់នូវ​សិទ្ឋិ​រស់រានមានជីវិត​ដល់​មនុស្សជាតិ​ដែល​ជាប់គាំង​នៅក្នុង​នាវា​ទាំងអស់​។ ការសម្រេចចិត្ត​ត្រឹមត្រូវ​របស់​កម្ពុជា គឺ​មនុស្ស​ភាគច្រើន​នៅ​ទូទាំង​ពិភពលោក​បាន​គាំទ្រ​នូវ​កាយវិការ​មនុស្សធម៌​រប​ស់​កម្ពុជា ហើយ​ក្នុងនោះ​ក៏មាន​ការគាំទ្រ​ពីអង្គការ​សុខភាព​ពិភពលោក (World Health Organization) អង្គការ​ទេសចរណ៍​ពិភពលោក ( World Tourism Organization) អង្គការ​ឆ្នេរ​ស្អាត​បំផុត​ពិភពលោក ( The World’s Most Beautiful Bay) និង ពី​លោក Donald Trump ប្រធានាធិបតី​សហរដ្ឋ​អាម៉េរិក​ផងដែរ​។ នៅពេលនេះ​ចំនួន​អ្នកទេសចរ​ចម្រុះ​ជាតិ​សាសន៍ ៥០០ នាក់​ក្រោយពី​បាន​ត្រួតពិនិត្យ​សុខភាព​ថា​គ្មាន​សញ្ញា​វិជ្ជមាន​នៃ​មេរោគ​កូ​វីដ​១៩​ទេ (​កូ​រ៉ូ​ណា​) គឺ​ត្រូវ​បានផ្តល់​កន្លែង​ស្នាក់នៅ​បណ្តោះអាសន្ន​នៅ​សណ្ឋាគារ​សុខា​ក្នុង​រាជធានី​ភ្នំពេញ​។ ច្បាស់​ណាស់ បើ​សាមី​ប្រទេស​គេ​មិន​គិតដល់​ពលរដ្ឋ​គេ​ទេ គឺ​កម្ពុជា​នឹង​ទទួលខុសត្រូវ ព្រោះ​ពេលនេះ​បានមក​ទី​សុវត្ថិភាព​ក្នុងប្រទេស​យើង​ហើយ​។​

សម្តេច​តេ​ជោ ហ៊ុន សែន​បានបញ្ជាក់​ច្បាស់​ហើយ​ក្នុងពេល​អញ្ជើញ​ទទួល​អ្នកដំណើរ​ទេសច​រទាំង​អស់​នៅ​ខេត្ត​ព្រះសីហនុ​ថា បើ​មាន​អ្នកទេសចរ​ណា​ម្នាក់ មាន​ឆ្លង​ឬ​ផ្ទុកមេរោគ​កូ​វីដ​-១៩ គឺ សម្តេច​តេ​ជោ​អនុ​ញ្ញតឲ្យ​ចូល​កម្ពុជា​ឲ្យ​បាន​លឿន​មុនគេ​បំផុត ហើយ​នាំទៅ​កន្លែង​មាន​សុវត្ថិភាព​ដើម្បី​ផ្តល់​ការ​មើលថែ​និង​ព្យាបាល​ឲ្យ​បាន​ទាន់ពេលវេលា​ដែល​អាចធ្វើ​ទៅបាន​។ ការធ្វើ​បែបនេះ​គឺ​ដើម្បី​ទប់ស្កាត់​មិន​ឲ្យមេរោគ​ឆ្លង​រាលដាល​ទៅ​អ្នក​ដទៃទៀត​ដូចដែល​បាន​កើតឡើង​នៅក្នុង​នាវា​ទេសចរណ៍ Diamond Princess ដែល​ពេល​ថ្មីៗ​នេះ​គឺ​ទើប​សម្រេចយក​អ្នកទេសចរ​ចេញពី​នាវា​ដោយសារ​មាន​អ្នក​ឆ្លង​មេរោគ​កូ​វីដ​១៩ ពី​ម្នាក់​ទៅ​ម្នាក់​កាន់តែ​ច្រើនឡើងៗ​រហូតដល់​៣៥៦ នាក់​។ បើ​កម្ពុជា​មិន​ទទួល​នាវា​នេះ​ឲ្យ​ចូលចត​ទេ ម្ល៉េះ​មកទល់ពេលនេះ​មិនដឹង​ជារ​សាត់អណ្តែត​ទៅដល់​ទី​ណា​ទេ ព្រោះ​ស្បៀងអាហារ​ក៏​ជិត​អស់ រីឯ​ប្រេង​ក៏​ជិត​អស់​ទៀត​។ តើ​ចុងបញ្ចប់​នៃ​ជីវិត​ពួកគេ​នឹងត្រូវ​បូជា​នៅលើ​កប៉ាល់ ឬ​បោះ​ទម្លាក់ចោល​ក្នុង​ទឹកសមុទ្រ​? បើ​គ្រប់គ្នា​បដិសេធ​មិន​ទទួល​ពួកគេ​ឲ្យ​ចូលចត​?​។​ តែ​កម្ពុជា​មិនអាច​បិទ​ភ្នែក​ទុក​ឲ្យ​ពលរដ្ឋ​ទាំងនោះ​ស្លាប់​ទេ ព្រោះ​កម្ពុជា​ក៏​ធ្លាប់​ត្រូវបាន​គេ​មើលងាយ​និង​រើសអើង​ពីមុន ហើយ​កម្ពុជា​យល់ច្បាស់​ណា​ស់​អំពី​អារម្មណ៍​បែបនេះ​ចំពោះ​អ្នកទេសចរ​ទាំងអស់នោះ​។ យើងទាំងអស់គ្នា​និយាយ​ពី​សិទ្ធិមនុស្ស តែ​ពេលនេះ​ការរើសអើង​គឺមាន​ទំហំធំធេង​ណាស់ ដែល​បង្ហាញ​ច្បាស់​ថា​ជំងឺ​រើសអើង និង​ការភ័យខ្លាច​ជ្រុល​ហួសហេតុ​កំពុង​នាំទៅដល់​ការបំផ្លាញ​សិទ្ធិមនុស្ស​ពិតប្រាកដ​។​


​សម្តេច​តេ​ជោ បាន​បន្តថា បើតាម​គម្រោង​ដែល​បានគិត​ក្នុង​ការជួយ​ដល់​អ្នកទេសចរ​ទាំងអស់ គឺ​ក្រោយពេល​អ្នកទេសចរ​វគ្គ​ទី​១​ ដែល​កំពុងស្នាក់នៅ​បណ្តោះអាសន្ន​ក្នុង​ទីក្រុង​ភ្នំពេញ​បាន​ចាក​ចេញពី​កម្ពុជា​ហើយ គឺ​នឹង​ដឹក​អ្នក​ដែល​កំពុង​រង់ចាំ​នៅក្នុង​នាវា​ទេសចរណ៍​ក្នុង​ខេត្ត​ព្រះសីហនុ​មកកាន់​រាជធានី​ភ្នំពេញ​ជា​បន្តទៀត​រហូតដល់​អ​ស់​។ អ្នកដំណើរ​ទាំងអស់​នឹង​ត្រូវដាក់​ឲ្យ​ពិនិត្យ​សុខភាព​យ៉ាង​ហ្មត់ចត់​បំផុត មុននឹង​អនុញ្ញាត​ឲ្យ​មក​ស្នាក់​នៅតាម​សណ្ឋាគារ​។ បើទោះបី​ត្រូវ​ការចត​រយៈពេល​វែង​យ៉ាងណាក្តី ក៏​កម្ពុជា​ផ្តល់ឱកាស​ឲ្យ​នាវា​ទេសចរណ៍​នេះ​បន្ត​ស្នាក់នៅ​កម្ពុជា​ដោយ​មិន​គិតពី​ថ្លៃ​ចត និង​ថ្លៃ​សេវា​ផ្សេងៗ​នៅក្នុង​ដែនសមុទ្រ​កម្ពុជា​ដែរ​។ កម្ពុជា​ទទួលខុសត្រូវ​លើ​កិច្ច​ការដែល​ខ្លួន​កំពុង​ធ្វើ​ឲ្យ​បាន​ហ្មត់ចត់​និង​ល្អ​បំផុត ហើយ​បន្ត​សហការ​ជាមួយ​អង្គការ​ដៃគូ​នានា និង​សហគមន៍​អន្តរជាតិ​ដើម្បី​រួមគ្នា​ដោះស្រាយ​បញ្ហា​ប្រឈម​ជា​សកល​នេះ​។ ទន្ទឹមនឹង​នេះដែរ គឺ​ដើម្បី​លុបបំបាត់​ជំងឺ​ភ័យខ្លាច​ជ្រុល និង​ជំងឺ​រើសអើង​ជ្រុល ដើម្បី​លើកស្ទួយ​តម្លៃ​សីលធម៌ គុណធម៌​ឡើងវិញ និង​ដើម្បី​សិទ្ឋិ​រស់រានមានជីវិត និង​សេចក្តីសុខ​របស់​មនុស្ស​ជាតិ​ទូទាំង​ពិភពលោក​។


​សម្តេច​តេ​ជោ ហ៊ុន សែន បានបញ្ជាក់​ជូន​ផងដែរ​ថា​ ទោះបី​នៅ​ប្រទេស​ណាក៏ដោយ មិនថាតែ​ប្រទេស​ចិន​ទេ ប្រសិនបើ​ត្រូវការ​កម្ពុជា គឺ​សម្តេច​តេ​ជោ នឹងចូលរួម​ដោយ​មិន​រារែក​ឡើយ​៕សរន/Ha

អាជ្ញាប័ណ្ណចែកចាយផ្តាច់មុខ