អត្តបទៈសុផានីតា/កោះកុង៖មន្ទីរអប់រំយុវជននិងកីឡាខេត្តកោះកុងបានទទួលកំណាត់ជាង៧៦.១៦៧តោនស្មើនឹង៦.២៧៧កីពីក្រុមហ៊ុនរោងចក្រកាត់ដេរសម្លៀកបំពាក់KKNដើម្បីយកទៅប្រើប្រាស់តាមតម្រូវការបម្រើដល់វិស័យអប់រំទាំងមូល។ការទទួលនិងប្រគល់កំណាត់ពីរោងចក្រកាត់ដេរជាង៧ម៉ឺនតោន ធ្វើឡើងក្រោមវត្តមានអភិបាលរងខេត្ត តំណាងក្រុមហ៊ុន និងប្រធានមន្ទីរអប់រំ យុវជននិងកីឡាខេត្ត កាលពីថ្ងៃទី១៨ ខែកុម្ភៈ ២០២០។
លោកង៉ែតឡឹងប្រធានមន្ទីរអប់រំយុវជននិងកីឡាខេត្តកោះកុងបានចាត់ទុកការផ្តល់ជាអំណោយកំណាត់នេះ ជាការចូលរួមចំណែកដ៏សំខាន់ គ្រាកំពុងមានតម្រូវការកាត់សម្លៀកបំពាក់ តុបតែងបន្ទប់ សាលាប្រជុំតុឬកៅអីជាដើម។លោកប្រធានមន្ទីរអប់រំខេត្តបន្ថែមថាលោកនឹងសុំគោលការណ៍បន្ថែមពីក្រសួង ដើម្បីបើកវគ្គបណ្តុះបណ្តាលជំនាញវិជ្ជាជីវៈ។ក្នុងន័យបង្កើនចំណេះដឹង និងជំនាញពិតប្រាកដ ទាញយកប្រយោជន៍ទីផ្សារការងារ ក្រៅពីរៀននៅវិទ្យាល័យ ឬមណ្ឌលសិក្សាផ្សេងៗ។
កន្លងទៅក៏មានមន្ទីរអង្គភាពជំនាញនិងពលរដ្ឋនៅតាមសហគមន៍ធ្លាប់មកសុំកំណាត់យកទៅកែច្នៃនៅអង្គភាពរបស់ខ្លួនផងដែរ។ទន្ទឹមនោះលោកង៉ែតឡឹងគ្រោងស្នើសុំម៉ាស៊ីនដេរនិងអ៊ុតបន្ថែមដែរព្រោះសាច់កំណាត់ទាំងនេះម៉ាស៊ីនធម្មជាអាចដេរបានឯខ្លះទៀតត្រូវការម៉ាស៊ីនស្តង់ដារពីរោងចក្រ ទើបធ្វើទៅបាន។
ដោយឡែកលោកស្រេងហុងអភិបាលរងខេត្តកោះកុងលើកឡើងថាអំណោយជាកំណាត់សម្លៀកបំពាក់កំរាលតុកៅអីនិងទូរជាសកម្មភាពសប្បុរសធម៌ដ៏ប្រពៃមួយក្នុងការរួមចំណែកដំណើរការអភិវឌ្ឍន៍ខេត្តកាន់តែរីកចម្រើន។បើតាមលោកអភិបាលរងខេត្តកន្លងទៅរោងចក្រកាត់ដេរKKNបានជួយឧបត្ថម្ភជាច្រើនដល់រដ្ឋបាលខេត្តមន្ទីរពាក់ព័ន្ធ។
ពិសេសការផ្តល់ឱកាសការងារដល់ពលរដ្ឋនិងយុវជនក្នុងខេត្តនិងក្រៅខេត្តតែម្តង។ស្របពេលខណៈរាជធានីភ្នំពេញបំណាច់ខែកុម្ភៈឬចុងខែមីនាមានរោងចក្រមួយចំនួនប្រឈមនឹងការបិទទ្វាររោងចក្រពីព្រោះមេរោគជំងឺកូរ៉ូណានៅប្រទេសចិនមិនឱ្យមានការដឹកជញ្ចូនកំណាត់ចូលមកកម្ពុជា។
សម្រាប់ខេត្តកោះកុងវិញគឺត្រូវបានលោកអភិបាលរងខេត្តអះអាងថាពុំមានការប្រឈមនឹងរោងចក្របិទទ្វារឡើយគឺកម្មករ-កម្មការិនីរោងចក្រនៅក្នុងតំបន់សេដ្ឋកិច្ចពិសេសខេត្តកោះកុងនៅតែអាចមកធ្វើការដូចធម្មតាបានមិនរងផលប៉ះពាល់ឬបិទទ្វាររោងចក្រអ្វីឡើយដោយរោងចក្រកំពុងត្រូវការកម្មករជាង៣ពាន់នាក់ទៀតផង។
មូលហេតុដែលអភិបាលរងខេត្តអះអាងយ៉ាងដូច្នេះក៏ព្រោះតែគ្រប់រោងចក្រឧស្សហកម្មនៅខេត្តកោះកុងមានទទួលបានវត្ថុធាតុដើមតែ១ភាគរយប៉ុណ្ណោះពីប្រទេសចិន។ជាក់ស្តែងរោងចក្រកាត់ដេរKKNមាន៩៩ភាគរយទទួលយកវត្ថុធាតុដើមពីប្រទេសថៃនិងប្រទេសមួយចំនួន។
លោកស្រេងហុងក៏រំពឹងដែរថាចិននឹងរកឃើញថ្នាំព្យាបាលជំងឺកូរ៉ូណាឆាប់ៗដើម្បីបញ្ចៀសផលប៉ះពាល់ដល់ការផ្គត់ផ្គង់ផលិតខាងផ្នែកឧស្សហកម្មនិងសេដ្ឋកិច្ចពលរដ្ឋ។ក្នុងនោះក៏អំពាវនាវដល់កម្មករទូទាំងប្រទេសថាប្រសិនបើកម្មករនៅរាជធានីភ្នំពេញឬតាមនៅបណ្តាខេត្តផ្សេងៗអត់ការងារធ្វើសុំមកដាក់ពាក្យចូលបម្រើការងារនៅរោងចក្រនៅក្នុងខេត្តកោះកុងបានគ្រាកំពុងខ្វះកម្លាំងពលកម្ម។
គួរជម្រាបថា នៅខេត្តកោះកុង មានសហគ្រាស គ្រឹះស្ថានឧស្សហកម្មធំៗសរុបចំនួន៧៣កន្លែង ដែលមានកម្មករនិយោជិតកំពុងធ្វើបម្រើការងារជាង១ម៉ឺន៤៩៣នាក់។លោកសម្បត្តិយ៉ុតណារ៉ុងតំណាងរោងចក្រកាត់ដេរKKNដែលមានមូលដ្ឋាននៅក្នុងតំបន់សេដ្ឋកិច្ចខេត្តកោះកុង បានឱ្យដឹងថា ក្រុមហ៊ុនរោងចក្រកាត់ដេររបស់លោកកំពុងខ្វះខាតកម្លាំងពលកម្មជាង៣ពាន់នាក់។
លោកបានបន្តថាទោះបីជាបច្ចុប្បន្នមានពលរដ្ឋនិងយុវជនមកពីបណ្តាខេត្តកំពុងបម្រើការងារយ៉ាងសកម្មក៏ដោយ។តំណាងរោងចក្រកាត់ដេរKKNដដែលលើកឡើងថាក្រុមហ៊ុនបានផ្តល់នូវប្រាក់ចំណូល៣លានក្នុង១ខែតាមរយៈផ្តល់ឱកាសការងារនិងជួយលើកកម្ពស់សេដ្ឋកិច្ចជីវភាពគ្រួសារពលរដ្ឋកម្ពុជាកាន់តែធូរធារនិងរីកចម្រើនជាបន្តបន្ទាប់។
ទៀតសោតក្រុមហ៊ុនKKNមានចំនួន៤រោងចក្រនិងមានកម្មករសរុបជាង៨.៥០០នាក់ពួកគេមានជំនាញដេរនិងអ៊ុតច្បាស់លាស់ក្រោយពីឆ្លងកាត់វគ្គបណ្តុះបណ្តាលរួចរាល់មកក្រោមកិច្ចសម្របសម្រួលពីរដ្ឋបាលខេត្ត មន្ទីរ និងដៃគូពាក់ព័ន្ធ៕S/
