ចោរលួច​ម៉ា​ស់មុខ​៦​ពាន់​នៅ​ជប៉ុន ចំ​ពេល​មាន​ការខ្វះខាត​

440
ចែករម្លែក

​ចោរ​នៅ​ជប៉ុន​បាន​លួច​យក​ម៉ាស់​មុខ​វេជ្ជសាស្ត្រ​ប្រមាណ​៦.០០០​ចេញ​ពី​មន្ទីរពេទ្យ​មួយ ខណៈ​ពេល​ប្រទេស​កំពុង​ជួប​ការខ្វះខាត​ម៉ាស់​មុខ​ក្នុង​បរិមាណ​ដ៏​ច្រើន​និង​​ថ្លៃ​ម៉ា​ស់មុខ​ក៏​ហក់​ឡើង​ខ្ពស់​ក្នុង​ការលក់​តាម​អន​ឡាញ ដោយសារ​តែ​ភ័យ​រឿង​កូរ៉ូណា​វីរុស​។​

​មន្ត្រី​មន្ទីរពេទ្យ​ម្នាក់​បាន​និយាយ​កាលពី​ថ្ងៃ​អង្គារ​ទី​១៨​កុម្ភៈ​ថា ម៉ា​ស់មុខ​៤​ឡាំង បាន​បាត់​ពី​ឃ្លាំង​ចាក់សោរ​នៅ​មន្ទីរពេទ្យ​កាកបាទ​ក្រហម​ជប៉ុន​នៅ​ក្រុងកូបេ​​តែ​«​យើង​នៅ​សល់​ម៉ាស់​មុខ​ច្រើន​ទៀត ដែល​គ្រប់គ្រាន់​សំរាប់​បន្ត​ប្រតិបត្តិការ​ប្រចាំថ្ងៃ​របស់​យើង​នៅ​មន្ទីរពេទ្យ​នេះ »​។​

​ប៉ូលិស​បាន​ធ្វើ​ការស៊ើបអង្កេត​ករណីនេះ និង​សង្ស័យថា ពួកចោរ​មានបំណង​លក់​ម៉ា​ស់មុខ​ទាំងនេះ​។​

​សូមបញ្ជាក់​ថា នៅ​ប៉ុន្មាន​ថ្ងៃ​មកនេះ​ម៉ាស់​មុខ​ត្រូវ​បាន​លក់​អស់ៗ​ពី​ហាង​និង​ឱសថស្ថាន​នៅ​ជប៉ុន​ចំ​ពេល​ចំនួន​អ្នក​ឆ្លង​កូរ៉ូណា​វីរុស​នៅក្នុង​ប្រទេសប​ន្ត​កើន​​ឡើង​។​

​ការ​លួច​ម៉ាស់​មុខ​នេះ កើត​ឡើង​នៅ​មួយ​ថ្ងៃ​បន្ទាប់ពី​ខ្មាន់​កាំបិត​ជាច្រើន​នាក់​នៅ​ហុងកុង​បាន​ប្លន់​យក​ក្រដាស​បង្គន់​រាប់រយ​ដុំ​ពី​បុរស​ដែល​កំពុង​ដឹក​ក្រដាសរ​​មូរ​បង្គន់​ដាក់​តាម​ទីផ្សារ ចំ​ពេល​អ្នករស់នៅ​ទីក្រុង​នេះ​ផ្អើល​នាំគ្នា​ទិញ​ទំនិញ​ចាំបាច់​ស្តុក​ទុក រួម​មាន​មី អង្ករ និង​ក្រដាស​បង្គន់​ដោយសារ​តែ​កូរ៉ូណា​វីរុស​៕ប្រែសម្រួល៖វាសនា