ក្រសួង​កោះប្រជុំ​ភាគី​ពាក់ព័ន្ធ​ពិភាក្សា​ស្ដីពី​កម្មវិធី​ហ្វឹកហាត់​ការងារ​ដល់​យុវជន និង​អ្នក​កំពុង​បម្រើ​ការងារ​ក្នុង​វិស័យ​ទេសចរណ៍​

137
ចែករម្លែក

​ដោយ​: មូល​សម្បត្តិ / ភ្នំពេញ​: ក្រសួងទេសចរណ៍​កាល​ពីថ្ងៃ​ទី​២០ខែកុម្ភៈ​នេះ ដោយមាន​កិច្ចសហការ​ជាមួយ​អង្គការ​អន្តរជាតិ​ខាង​ការងារ (ILO) ប្រចាំ​កម្ពុជា បាន​បើក​កិច្ចប្រជុំ​ជាមួយ​តំណាង​សាលា​បណ្ដុះបណ្ដាល ភាគី​ឯកជន ក្រសួង​ស្ថាប័ន​ពាក់ព័ន្ធ ពិភាក្សា​លើ​ការ​ដាក់ចុះ​អនុវត្ត​គោលការណ៍​ណែនាំ​ស្ដីពី “​ការអនុវត្ត​កម្មវិធី​ហ្វឹកហាត់​ការងារ​ក្នុង​វិ​ស័​ទេសចរណ៍ (Tourism Apprenticeship Guideline )”​។

​លោក ប៉ាក់ សុខុម រដ្ឋលេខាធិការ​ក្រសួង​បាន​លើកឡើងថា ការបណ្ដុះបណ្ដាល​ជំនាញ ដល់​អ្នក​កំពុង​បម្រើ​ការងារ និង​យុវជន​ក្មេងៗ ជា​គោលដៅ​អាទិភាព​របស់​ក្រសួង ដើម្បី​ទ្រទ្រង់​ភាពរឹងមាំ​នៃ​វិស័យ​ទេសចរណ៍ និង​ការអភិវឌ្ឍន៍​ទេសចរណ៍​ប្រកបដោយ​ចីរភាព​។ កន្លងមក ក្រសួង​បានដាក់ចុះ​កម្មវិធី​បណ្ដុះបណ្ដាល និង​ពង្រឹងសមត្ថភាព​ជាច្រើន​ស្របតាម​ស្តង់ដា​អាស៊ាន​មានដូចជា ការបណ្ដុះបណ្ដាល​ដំបូង​។ ការបណ្ដុះបណ្ដាល​បន្ត​។ ការបណ្ដុះបណ្ដាល​ខាងក្នុង (In-House Training)​។ ការបណ្ដុះបណ្ដាល​ចល័ត ការបណ្ដុះបណ្ដាល​ជំនាញ​បន្ថែម​ដល់​អ្នក​កំពុង​បម្រើ​ការងារ ការវាយតម្លៃ​ទទួលស្គាល់​បទពិសោធន៍​ឬ​ការសិក្សា​ពីមុន​។ ការបណ្ដុះបណ្ដាល​ជំនាញ​ទេសចរណ៍​ដល់​ពលករ​ចំណាកស្រុក​ត្រឡប់មកវិញ​ឲ្យ​បម្រើ​ការងារ​ក្នុង​ផ្នែក​សណ្ឋាគារ​ជាដើម​។

​ការហ្វឹកហាត់​ការងារ​ជា​កម្មវិធី​ថ្មី ដែល​នឹងមាន​ការចូលរួម​ដោយ​អង្គភាព​អាជីវកម្ម សាលា​បណ្ដុះបណ្ដាល អ្នក​ហ្វឹកហាត់​ការងារ និង​ភាគី​ពាក់ព័ន្ធ​ផ្សេងៗ​ទៀត សំដៅ​ឆ្លើយតបបាន​កាន់តែ​ខ្ពស់​នូវ​តម្រូវ​ការជំនាញ​របស់​ទីផ្សារការងារ​។

​លោក​រដ្ឋលេខាធិការ​ក៏បាន​ប្រាប់ថា ក្រសួងទេសចរណ៍​កំពុង​សហការ​ជាមួយ​ភាគី​ពាក់ព័ន្ធ​ដាក់ចុះ​កម្មវិធី​ប ណ្ដុះ​បណ្ដាល​អ្នក​កំពុង​បម្រើ​ការងារ​បន្ថែមទៀត​នាពេល​ខាងមុខនេះ​។

​គួរ​រំលឹក​ផងដែរ​ថា បច្ចុប្បន្ន​អ្នក​កំពុង​បម្រើ​ការងារ​ដោយផ្ទាល់​ក្នុង​វិស័យ​ទេសចរណ៍​កម្ពុ​ជាមាន​ប្រមាណ ៦៣​ម៉ឺន​នាក់​។ ស្របតាម​ផែនការ​យុទ្ធសាស្ត្រ​អភិវឌ្ឍ​ធនធានមនុស្ស​ក្នុង​វិស័យ​ទេសចរណ៍ ២០១៧-២០២៥ និង​ស្មារតី​នៃ​ការអនុវត្ត កិច្ចព្រមព្រៀង​ទទួលស្គាល់​គ្នា​ទៅវិញទៅមក​លើ​អ្នកជំនាញ​ទេសចរណ៍​អាស៊ាន (MRA-TP) ក្រសួង​មាន​គោលដៅ​សម្រេចការ​បណ្ដុះបណ្ដាល​ឲ្យ​បាន​យ៉ាងតិច ៥០% ត្រឹម​ឆ្នាំ​២០២០ ១០០% ត្រឹម​ឆ្នាំ​២០២៥ និង​សម្រេច គោលដៅ​អភិវឌ្ឍ​ប្រកបដោយ​ចីរភាព SDG4: ការសិក្សា​ពេញ​មួយជីវិត និង SDG8: ការងារ​សមរម្យ ត្រឹម​ឆ្នាំ​២០៣០៕ ល​

អាជ្ញាប័ណ្ណចែកចាយផ្តាច់មុខ