ដោយ: មូលសម្បត្តិ / ភ្នំពេញ: ដូចស្វាយកែវរមៀតនៅបាត់ដំបងដែរ ដែលថាស្វាយឆ្នាំនេះបានធ្លាក់ថ្លៃខ្លាំងណាស់ ធ្វើឲ្យអ្នកដាំស្វាយ និងអ្នករកស៊ីទិញស្វាយមានការអស់សង្ឃឹមនិងខាតបង់ច្រើន។
លោក ទុយ វរៈ តំណាងសមាគមន៍ស្វាយកែវរមៀតប្រចាំតំបន់ឱរ៉ាល់ខេត្តកំពង់ស្ពឺ បានរាយការណ៍ឲ្យដឹងថ្មីៗនេះថា ស្វាយកែវរមៀតបានធ្លាក់ថ្លៃនេះ គឺក្នុងពេលមុនចូលឆ្នាំចិនវៀតណាម។ គាត់ដាក់ការសង្ស័យដោយសារកើតមានជំងឺកូរ៉ូណានៅចិន ពីព្រោះតាំងពីផ្ទុះជំងឺនេះមក ចិនបិទព្រំដែនជាមួយវៀតណាម ធ្វើឲ្យវៀតណាមស្ងាត់ចូលមកទិញស្វាយនៅកម្ពុជាយើង។ បើទោះបីជាពួកគេបានម៉ៅសន្យាទិញទុកជាមុនហើយក្តី។ ហើយចិនដែលបើករោងចក្រកែច្នៃផ្លែស្វាយនៅតំបន់ឱរ៉ាល់មួយចំនួនធ្លាប់តែទិញផ្លែស្វាយច្រើនៗ បានបិទរោងចក្រអស់២ទៅ៣រោងចក្ររួចមកហើយ។ រោងចក្រនៅសល់បានទិញផ្លែស្វាយតិចបំផុត ហើយលុះត្រាតែអ្នកមានស្វាយដឹកយកទៅលក់ដល់រោងចក្រផ្ទាល់តែម្តង ហើយឲ្យថ្លៃតែ ៧០០៛/គ.ក្រ។ ផ្លែស្វាយខៀវ (ស្វាយមិនខ្ចប់ក្រដាស) ថ្លៃតែ៥០០៛/គ.ក្រ។ ស្វាយខ្ចប់ក្រដាសថ្លៃ៨០០៛/គ.ក្រ។
លោក វរៈ ដាក់ការសង្ស័យដែលជាឧបសគ្គធំ គឺមកពីជំងឺកូរ៉ូណាផ្ទុះនៅចិន បានជាប៉ះពាល់ដល់ទីផ្សារស្វាយនៅកម្ពុជា។ សហគមន៍ស្វាយកែវរមៀតតំបន់ ឱរ៉ាល់មានជាង ៩០០ហិកតា ស្មើនឹង៨០គ្រួសារ។ នៅមានម្ចាស់ចម្ការស្វាយជាច្រើនរយហិកតាទៀតក៏ជួបវិបត្តិអត់ទីផ្សារដូចគ្នាដែរ។ ហើយផលស្វាយកែវរមៀតនៅខេត្តដទៃៗក៏មានវាសនាដូចគ្នាទាំងអស់៕ ល/Ha
