​ក្រុមគ្រូពេទ្យ​សត្វ​អន្តរជាតិ​ចុះ​ព្យាបាល​ចាក់​វ៉ាក់សាំង​និង​គ្រៀវ​សត្វ​ឆ្កែ​,​ឆ្មា​ប្រមាណ​៥០០​ក្បាល​

383
ចែករម្លែក

ដោយៈ​សុផល​/​ភ្នំពេញ​៖ ក្នុង​គោលបំណង​ចូលរួម​ទប់ស្កាត់​ការសម្លាប់​ឆ្កែ​,​ឆ្មា​,​ការការពារ​ជំងឺ​ឆ្កែឆ្កួត និង​លើកកម្ពស់​សុខភាព​សត្វ​នៅក្នុង​ប្រទេស​កម្ពុជា ក្រុមគ្រូពេទ្យ​សត្វ​អន្តរជាតិ​មកពី​អង្គការ Four Paws International និង អង្គការ សង្គ្រោះ​សត្វ​កម្ពុជា​(ARC)​។​កាលពី​ព្រឹក​ថ្ងៃទី​២១ ខែកុម្ភៈ ឆ្នាំ​២០២០ បាន​សហការគ្នា​ចុះ​ចាក់​វ៉ាក់សាំង​ព្យាបាល​និង​គ្រៀវ​ប្រដាប់បន្តពូជ​សត្វ​ឆ្កែ​និង​ឆ្មា​ជូន​ប្រជាពលរដ្ឋនៅក្នុង​ភូមិ​ក្បាលកោះ សង្កាត់​កោះដាច់ ខណ្ឌ​ជ្រោយចង្វារ រាជធានី​ភ្នំពេញ ដោយ​ឥតគិតថ្លៃ​។​

​ការ​គ្រៀវ​និង​ចាក់​វ៉ាក់សាំង​សត្វ​ឆ្កែ​និង​ឆ្មា​នេះ​មាន​ផលប្រយោជន៍​ជាច្រើន​ដូចជា​៖​ធ្វើឱ្យ​សត្វ​មាន​សុខ​ភាពល្អ​មិនសូវ​កាច​ជួយ​កាត់បន្ថយ​គ្រោះថ្នាក់​បណ្តាលមកពី​កង្វះ​អាហារូបត្ថម្ភ​កាត់បន្ថយ​ការ​មានកូន​ច្រើន​នាំឱ្យ​កើត​ឆ្កែ​អនាថា ជាពិសេស​រួចផុត​ពី​ជំងឺ​ផ្សេងៗ​។​

​លោកស្រី វេជ្ជបណ្ឌិត Katherine Polak ប្រធាន​ផ្នែក​ថែរក្សា​សត្វ​អនាថា​ប្រចាំ​តំបន់​អាស៊ីអាគ្នេយ៍ នៃ​អង្គការ​FourPawsInternational​បាន​ឲ្យ​ដឹងថា​៖​មូល​ហេតុដែល​អង្គការ​លោកស្រី​សហការ​ជាមួយ​អង្គការ​សង្គ្រោះ​សត្វ​កម្ពុជា​ចុះមក​ចាក់​វ៉ាក់សាំង​គ្រៀវ​សត្វ​ឆ្កែ​ឆ្មា​នៅថ្ងៃនេះ​ដោយសារតែ​មើលឃើញថា​អ្នកស្រុក​នៅលើ​កោះដាច់​នេះ​បាន​ចិញ្ចឹមសត្វ​ច្រើន ហើយ​មាន​សំណើ​ពី​ប្រជាពលរដ្ឋ​។

​លោកស្រី​បាន​បន្តថា​«​យើង​ធ្វើការ​នេះ​ដើម្បី​សង្គ្រោះ​សត្វ​ដូច​ជាការ​គ្រៀវ​ចាក់​វ៉ាក់សាំង​និង​ព្យាបាល​ជាដើម​រយៈពេល​៧​ថ្ងៃ​ដោយ​ធ្វើការ​ជាមួយ​សត្វ​ចឹ​ញ្ចឹ​ម​និង​សត្វ​ដែល​គ្មាន​អ្នក​ចិញ្ចឹម​(​អនាថា​)​ដោយ​មិន​គិតថ្លៃ​នូវ​ការព្យាបាល​ចាក់​វ៉ាក់សាំង​និង​គ្រៀវ​»​។​លោកស្រី​បាន​ឲ្យ​ដឹង​ទៀតថា​គេ​រំពឹងទុក​ថា​យុទ្ធនាការ​នេះ​នឹង​ព្យាបាល​ចាក់​វ៉ាក់សាំង​និង​គ្រៀវ​សុនខ​និង​ឆ្មា​ប្រមាន​៥០០​ក្បាល​។​យើង​យក​ទីតាំង​លើកដំបូង​នេះ​ដោយសារតែ​យើង​យល់ឃើញថា​ប្រជាពលរដ្ឋ​នៅលើ​កោះដាច់​នេះ​ស្រឡាញ់​សត្វ​ម្យ៉ាងទៀត​នៅ​តំបន់​នេះ​ខ្វះខាត​សេវា​បសុព្យាបាល​ដូច្នេះ​សត្វ​ទាំងអស់​គ្មាន​សុវត្ថិភាព​គ្មាន​ការចាក់​វ៉ាក់សាំង​ការពារ​ហើយ​សត្វ​ភាគច្រើន​មាន​ជំងឺ​រ៉ាំរ៉ៃ​។​

​លោកស្រី​វេជ្ជបណ្ឌិត​បាន​គូសបញ្ជាក់ថា​៖​អត្ថប្រយោជន៍​នៃ​ការ​គ្រៀវ​សត្វ​ឆ្កែ​និង​ឆ្មា​នេះ​បានផ្តល់​ប្រយោជន៍​យ៉ាងច្រើន​ដូចជា​ធ្វើឱ្យ​សត្វ​នោះ​ឱ្យ​រួច​ផុតពី​ជំងឺ​ផ្សេងៗ​និង​មិនសូវ​កាច​ជួយ​កាត់បន្ថយ​គ្រោះថ្នាក់​បណ្តាលមកពី​កង្វះ​អាហារូបត្ថម្ភ​កាត់បន្ថយ​ឆ្កែ​អនាថា​និង​ធ្វើឱ្យមាន​មាន​សុខ​ភាពល្អ​។
​ជាមួយគ្នា​នោះដែរ​លោកស្រី​បាន​លើកឡើងថា​យុទ្ធនាការ​នេះ​ក៏​ជា​សារ​មួយ​ក្នុងការ​ទប់ស្កាត់​ការហូប​សាច់សត្វ​ឆ្កែ​ឆ្មា​ដែល​នៅ​តំបន់​មួយចំនួន​ប្រទេស​កម្ពុជា​បាន​កំពុង​បរិភោគ​សាច់​ទាំងនេះ​។​ប៉ុន្តែ​នៅ​កោះដាច់​នេះ​មិនមាន​កន្លែង​លក់​សាច់សត្វ​ឆ្កែ​នោះទេ​។​

​លោកស្រី​វេជ្ជបណ្ឌិត​បាន​សង្កត់ធ្ងន់​ថា​«​ការធ្វើការ​នៅថ្ងៃនេះ​ក៏​ជា​សារ​មួយ​ក្នុងការ​ទប់ស្កាត់​ការហូប​សាច់សត្វ​ឆ្កែ​ឆ្មា​ដែល​នៅ​តំបន់​មួយចំនួន​ប្រទេស​កម្ពុជា បាន​កំពុង បរិភោគ​សាច់​ទាំងនេះ​។ ប៉ុន្តែ​នៅ​កោះដាច់​នេះ​មិនមាន​កន្លែង​លក់​សាច់សត្វ​ឆ្កែ​នោះទេ​ខ្ញុំ​ចង់​បន្ត​ឱ្យនៅ​កោះដាច់​នេះ​បន្ត​កុំឱ្យ​មានការ​លក់​សាច់​ឆ្កែ​ឆ្មារ​បន្តទៀត​។​ដូច្នេះហើយ​នៅពេល​យើង​ព្យាបាល​ចាក់​វ៉ា​សាំង​សត្វ​ទាំង​នោះទេ​នឹងធ្វើ​ឲ្យ​ម្ចាស់​សត្វ​គ្រប់គ្រង​និង​ស្រឡាញ់​សត្វ​របស់គាត់​បន្តទៀត​»​។​

​លោកស្រី​ក៏បាន​លើកឡើងថា​សត្វ​ឆ្កែ​បាន​ជួយ​មនុស្ស​ពិសេស​នៅក្នុង​វិស័យ​ដោះមីន​ផ្ទុយទៅវិញ​មនុស្ស​មិនបាន​ជួយ​ពួកវា​វិញ​ទេ​បែ​ជា​នាំគ្នា​លក់​ទៅ​ឲ្យ​គេ​ស្លាប់​ទៅវិញ​។​ចំពោះ​វិស័យ​ទេ​ចរណ៍​វិញ​អ្នកទេសចរ​បរទេស​គេ​មិន​ចង់ឃើញ​ការស្លាប់​សត្វ​ឆ្កែ​ឆ្មា​នោះទេ​។​សម្រាប់​ការចុះ​ជួយ​ព្យាបាល​ចាស់​វ៉ាក់សាំង​ដោយ​មិន​គិតថ្លៃ​នេះ​លោកស្រី​វេជ្ជបណ្ឌិត​ក៏បាន​ស្នើ​ដល់​រាជរដ្ឋាភិបាល​ក្នុងការ​គាំទ្រ​ផងដែរ​ដោយ​ធ្វើការ​ទប់ស្កាត់​ការជួញដូរ​សត្វ ឬ ចាប់​សត្វ​យកទៅលក់​ជាដើម​។​

​ពាក់ព័ន្ធ​នឹង​ជំងឺ​ដែល​កើតចេញពី​សត្វ​ឆ្កែ ឆ្មា​នោះ លោកស្រី​វេជ្ជបណ្ឌិត​បានឱ្យដឹងថា​៖​ពេល​ឆ្កែ​ឈឺ ម្ចាស់​ឆ្កែ​បាន​ទៅ​ឱសថដ្ឋាន​ទិញ​ថ្នាំ​របស់​មនុស្ស​ទៅ​ឲ្យ​សត្វ​លេប ក្នុងនោះ​មាន​ថ្នាំ​ពន្យា​កំណើត ថ្នាំព្រូន​ដែល​ថ្នាំ​នេះ​មិនត្រូវ​ជាមួយ​សត្វ​នោះទេ​ដែលជា​ហេតុ​ធ្វើ​ឲ្យ​សត្វ​នោះ​មាន​ជំងឺ​ផ្សេងៗ​ដូចជា​មហារីក​ដោះ​និង​ជំងឺ​ផ្សេងៗ ។

​ក្នុងឱកាស​នោះដែរ​លោកស្រី​វេជ្ជបណ្ឌិត​KatherinePolak​ក៏បាន​ឲ្យ​ដឹងថា​ការជួញដូរ​និង​បរិភោគ​សាច់សត្វ​ឆ្កែ​ឆ្មា​មិនមែន​មានតែ​នៅក្នុង​ប្រទេស​កម្ពុជា​នោះទេ​គឺ​មាននៅ​ប្រទេស​ផ្សេងទៀត​។​អ្នក​ដែល​ហូប​នោះ​ក៏​ប្រឈម​នឹង​ការឆ្លង​ជំងឺ​ផងដែរ​ដោយសារ​ប្រភព​សាច់សត្វ​នោះ មិនដឹង​មកពីណា​។ ពេល​គាត់​ហូប​សាច់សត្វ​មាន​ជំងឺ​នោះ​ជំងឺ​នឹង​ឆ្លង​មក​មនុស្ស​អីចឹង​ធ្វើ​ឲ្យ​មនុស្ស​នឹងមាន​បញ្ហា​ទាក់ទង​និង​ការបរិភោគ​សាច់​នេះ​ដូច្នេះ​គួរ​បញ្ឈប់​ការហូប​សាច់​ទាំងនេះ​»​។​

​លោក​នី​ម​ដូ​ល្លា​ពេទ្យសត្វ​នៅ​អង្គការ​សង្គ្រោះ​សត្វ​កម្ពុជា​បានលើកឡើង​ថា​អង្ក​ការ​លោក​បាន​ចាក់​វ៉ាក់សាំង និង​គ្រៀវ​សត្វ​ដោយ​មិន​គិតថ្លៃ​។ លោក​បញ្ជាក់ថា​៖«​ថ្ងៃនេះ​យើង​មក​កោះដាច់​ដើម្បី គ្រៀវ ចាក់​វ៉ាក់សាំង ដោយ​មិន​គិតថ្លៃ ក្នុង​រយៈពេល​៤​ថ្ងៃ​ហើយនឹង​ធ្វើ​នៅ​វត្ត​ក្បែ​នេះ​៣​ថ្ងៃ​ទៀត​»​។

​លោក​បាន​ឲ្យ​ដឹងថា​ចាប់តាំងពី​បង្កើត​អង្គរការ​នៅ​ឆ្នាំ​២០២៦​មក​ភាគច្រើន​នៃ​ជំងឺ​លើ​សត្វ​នោះ​ការចាក់​ថ្នាំ​ពន្យា​កំណើត​ដោយ​វះកាត់​គ្រៀវ​ហើយ​សត្វ​ដែល​ទទួល​ការព្យាបាល​នោះ​គឺ​សត្វ​នៅតាម​វត្ត​នៅក្នុង​រាជធានី​ភ្នំពេញ​។​ជំងឺ​ដែល​កើត​មកលើ​សត្វ​ភាគច្រើន​គឺ​ជំងឺ​លើ​ស្បែក​និង​ជំ​អឺ​រាគ​(​ប៉ា​វូ​)​ជំងឺ​ដុំ​គីស​ដុះ​លើ​ប្រដាប់ភេទ​សត្វ​ឆ្កែ ឆ្មា ជាដើម​។​

​លោក នី​ម ដូ​ល្លា បាន​បង្ហាញថា​ក្នុងការ​គ្រៀវ​សត្វ ស្ទើរតែ​១០០​ភាគរយ ដែល​ទទួលបាន​ជោគជ័យ គឺមាន​តែ​១​ភាគរយ​មិន​ជោគជ័យ​។ មុន​គ្រៀវ​សត្វ​ទាំងនោះ​គឺ​បាន​ពិនិត្យ​នូវ​ចង្វាក់បេះដូង​បាន​ត្រឹមត្រូវ ផ្ទុយទៅវិញ​បើសិន​ឆ្កែ​ឆ្មា​មាន​ជំងឺ​បេះដូង​មិន​ធ្វើការ​វះកាត់​នោះទេ​។​ជាមួយគ្នា​នោះដែរ​លោកគ្រូ​ពេទ្យសត្វ​រូបនេះ​ក៏បាន​អំពាវនាវ​ថាស​ត្វ​ចឹ​ញ្ចឹ​ម​គឺជា​សត្វ​មិនមែន​សម្រាប់​បរិភោគ​ទេ​គឺ​ប្រៀបដូចជា​សមាជិក​ក្នុង​គ្រួសារ​មួយ​។​សត្វ​កាច​នៅពេល​វះកាត់ វា​ក៏​អាច​ក្លាយ​សត្វ​ស្លូត​វិញ​បានដែរ​៕S/

​ចំណងជើង​រូបថត​៖​ក្រុមគ្រូពេទ្យ​សត្វ​អន្តរជាតិ ចុះ ព្យាបាល ចាក់​វ៉ាក់សាំង​និង​គ្រៀវ​សត្វ ឆ្កែ និង​ឆ្មា ប្រមាណ​៥០០​ក្បាល​នៅ​កោះដាច់​(​រូប​៖​សុផល​)​