ភ្នំពេញ៖ បទខ្មែរ មានចំណងជើង “ឡានសារ៉ែន” របស់ផលិតកម្មកាឡាក់ស៊ីដែលកំពុងតែ ល្បីនោះ បានផ្ទុះការគាំទ្រខ្លាំង រហូតមានតារាចម្រៀងថៃម្នាក់ យកមកច្រៀងតាមឡើងវិញ ដាក់លើ Youtube ដែលជារឿងកម្រ។
កាលពីថ្ងៃទី២០ ខែកុម្ភៈ ឆ្នាំ២០២០ មានតារាចម្រៀងថៃ ស្រីល្បីឈ្មោះនៅលើ Youtube ឈ្មោះ “Ice” បានយកបទចម្រៀងខ្មែរ កំពុងនិយមមួយបទ ចំណងជើងថា “ឡានសារ៉ែន” របស់តារាចម្រៀងស្រី តន់ ច័ន្ទសីម៉ា ទៅច្រៀងឡើងវិញ (Cover) និងថែមទាំងបានបកប្រែ ច្រៀងជាភាសាថៃ ថែមទៀតផង។
ជាការពិតណាស់ ប្រិយមិត្តភាគច្រើន ដែលនិយមស្តាប់បទចម្រៀងទាន់សម័យពីរោះៗបែប Acoustic នៅលើ Youtube ប្រាកដជាស្គាល់ហើយនូវតារាចម្រៀងស្រី Ice ដែលភាគច្រើន នាងតែងតែថតវីដេអូច្រៀង Cover បទចម្រៀងល្បីយ៉ាងពីរោះជាច្រើន ដោយបង្កើត Version ជារបស់ខ្លួនឯង ខុសពីម្ចាស់ដើម និងទទួលបានការគាំទ្រ យ៉ាងខ្លាំងពីសំណាក់មហាជន ដោយវីដេអូរបស់នាងនីមួយៗ មានចូលមើល រាប់លានដងឯណោះ។
រៀងចម្លែកខុសគេ នាងក៏បានជ្រើសរើសយកបទខ្មែរ “ឡានសារ៉ែន” យកមកបកស្រាយជា ភាសាថៃ និងបានបង្កើតបទថ្មីច្រៀងជាចង្វាក់ យ៉ាងពីរោះ និងបូកជាមួយនឹងមុខមាត់ស្រស់ ស្អាត កាយវិការគួរឲ្យស្រឡាញ់ ធ្វើឲ្យបទចម្រៀងមួយបទនេះកាន់តែមានរសជាតិថែម ទៀតផងដែរ។
មិនត្រឹមតែប៉ុណ្ណោះ នេះក៏ជាលើកទី១ហើយ ដែលឃើញមានតារាថៃ យកមកច្រៀង Cover ជាភាសារបស់ខ្លួនបែបនេះ ស្របពេលដែលមួយរយៈប៉ុន្មានឆ្នាំនេះ ឃើញមានតែការរាំ Cover តាមបទខ្មែរជាបន្តបន្ទាប់។
សូមរំលឹកថា កញ្ញា តន់ ច័ន្ទសីម៉ា កំពុងត្រូវបានទស្សនិកជនជាច្រើន ធ្វើការគាំទ្រតាមរយៈ បទចម្រៀងពីរោះៗជាច្រើនបទរបស់នាង ដែលបានបញ្ចេញនៅលើទីផ្សារដែលសុទ្ធតែជា បទផ្ទុះខ្លាំង ក្នុងឆ្នាំ២០១៩ កន្លងមកនេះ ដោយមានដូចជា បទ “រឹងមាំ”, “មនុស្សដូចខ្ញុំ”, “ខ្ញុំជឿ”, “អ្នកខាងនេះនឹកអ្នកខាងនោះ”, “បើមិនស្មោះស្រឡាញ់រកងាប់អី”,“យល់ច្រឡំថាគេស្រឡាញ់ យើង”និងបទដែលកំពុងផ្ទុះខ្លាំងគឺបទ “គេនោះជាស្រីកាប់ដាវ”ខណៈមានអ្នកចូលទស្សនាជា ៨លានដង ដែលជាចំនួនមួយច្រើន គួរឲ្យកត់សម្គាល់៕ ដោយ៖ បូរិន
