ពលរដ្ឋ​ដែល​កង​ឈុតខ្មៅ​ថៃ​ឱ្យ​រើ​ផ្ទះ​សង់​ថ្មី​ពី​ព្រំដែន​នៅ​ទំនប់​ក​៥​បានទទួល​ដី​ពី​អាជ្ញាធរ​

213
ចែករម្លែក

ដោយ​៖​ភ្នំ​ស្វាយ​/​បន្ទាយមានជ័យ​៖​ករណី​ពលរដ្ឋ​៣​គ្រួសារ​ដែល​ត្រូវ​កងកម្លាំង​ឈុតខ្មៅ​ថៃ​កង​តូច​លេខ​១២០៥​នៅ​ប៉ា​រ៉ៃ​ស្រុក​អារញ្ញ​ប្រាថេត​ខេត្ត​ស្រះកែវ​ឱ្យ​រើ​ផ្ទះ​សង់​ថ្មី​ពី​ចំណុច​ព្រំដែន​មិនទាន់​កំណត់​ច្បាស់លាស់​។​នៃ​ព្រំដែន​កម្ពុជា​ថៃ​(​ថៃ​ហៅ​តំបន់ស​)​នៅ​ទំនប់​ក​៥​ភូមិ​ទំនប់​ក​៥​សង្កាត់​/​ក្រុង​ប៉ោយប៉ែត​ខេត្តបន្ទាយមានជ័យ​កន្លងមក​នោះបាន​ទទួល​ដី​គោលនយោបាយ​ពី​អាជ្ញាធរ​ទៅ​នៅ​កន្លែង​ផ្សេង ។​

​លោក​វរសេនីយ៍​រស់​ពិសិដ្ឋ​នាយប៉ុស្តិ៍​ការពារ​ព្រំដែន​បឹង​សាគូ​នៃ​នគរបាល​ការពារ​ព្រំដែន​វរ​សេនា​តូច​៩១១​ប៉ោយប៉ែត​ប្រាប់​កាសែត​រស្មី​កម្ពុជា​ថ្ងៃទី​២១​ខែកុម្ភៈ​ថា​៖បើ​ខាង​ភាគី​ថៃ​ធ្វើ​អ្វី​ឬ​ទាហាន​ឈុតខ្មៅ​ថៃ​រាយ​លួស​បន្លា​ឬ​កាត់​ស្មៅ​មកលើ​តំបន់​ព្រំដែន​មិនទាន់​បានកំណត់​ច្បាស់លាស់​នេះ ក៏​កងកម្លាំង​នគរបាល​និង​កម្លាំងយោធា​កម្ពុជា​ក៏​ចេញទៅ​ហាមឃាត់​ដែរ ។​នេះ​ជាការ​គោរព​និង​អនុវត្ត​ស្មារតី​ខ្លឹមសារ​អនុស្សារណៈ​យោគយល់​គ្នា​(MOU)​ឆ្នាំ​២០០០​របស់​ព្រះរាជាណាចក្រ​កម្ពុជា​និង​ព្រះរាជាណាចក្រ​ថៃ ។​

​លោក​រស់​ពិសិដ្ឋ​នាយប៉ុស្តិ៍​ក៏​ដូច​លោក​មេបញ្ជាការរង​នគរបាល​ការពារ​ព្រំដែន​គោក​វរ​សេនា​តូច​លេខ​៩១១ បាន​អះអាងថា ៖ កាលពី​ថ្ងៃទី​១៩​ខែកុម្ភៈ​ឆ្នាំ​២០២០ នោះ​កម្លាំង​ការពារ​ព្រំដែន​ភាគី​ទាំង​២ លោក​សុខ ពេញ​ណន មន្ត្រី​តំណាង​សាលាក្រុង​ប៉ោយប៉ែត លោក​ភោគ លន ចៅសង្កាត់​ប៉ោយប៉ែត លោក​មេភូមិ​ទំនប់​ក​៥​និង​ពលរដ្ឋ​ទាំង​គ្រួ​សារបាន​សម្របសម្រួល​គ្នា​និង​យល់ព្រម​រើ​សំណង់ផ្ទះ​ឈើ​ទាំង​៣​គ្រួសារ​ចេញពី​ចំនុច​ព្រំដែន​នោះ ។​

​ពលរដ្ឋ​ទាំង​៣​គ្រួសារ​បានទទួល​កញ្ចប់​គោលនយោបាយ​ពិសេស​គឺ​ទទួល​ដីស​ង់​លំនៅស្ថាន​ទំហំ​២០​ម​គុណ​៥០​ម៉ែត្រ​នៅ​មណ្ឌល​អភិវឌ្ឍន៍​យោធិន​ពិការ​ខេត្តបន្ទាយមានជ័យ​នៅ​ចំណុច​ដីកា​រ៉េ​២​ឬ​២.២២២​នា​ព្រំប្រទល់​ស្រុក​ថ្មពួក ស្វាយចេក​និង​ភ្នំស្រុក ។​

​អ្នកស្រី​សំ​ស្រី​ឡឹង​ក្នុងចំណោម​ពលរដ្ឋ​៣​គ្រួសារ​នោះបាន​និយាយប្រាប់​សមត្ថកិច្ច​ថា​ផ្ទះ​តូច​សង់​ថ្មី​ពី​ឈើមូល​ប្រក់​ដំបូល​និង​បិទ​ជញ្ជាំង​ស័ង្កសី​របស់គាត់​និង​អ្នកជិតខាង​២​គ្រួសារ​ទៀត​បាន​សង់​ទៅ​កៀក​បន្ទាត់​ព្រំដែន​។​ត្រូវ​កម្លាំង​ព្រំដែន​ថៃ​និង​កម្ពុជា​បង្ខំ​ឱ្យ​រុះរើ​។​អ្នកស្រី​ប្រថុយ​សង់ផ្ទះ​បែបនេះ​ក៏​មកពី​មាន​សំណង់​ចាស់ៗ​របស់​ពលរដ្ឋ​មួយចំនួន​ក៏​សង់​ចូល​ព្រំដែន​នៅ​ម្តុំ​នោះដែរ ។​

​ទោះជា​យ៉ាងណា​ពេល​មានការ​ណែនាំ​និង​ដោះស្រាយ​ផ្តល់​ដី​កន្លែង​ផ្សេង​ទោះ​នៅក្នុង​ភូមិសាស្ត្រ​ក្រុង​ប៉ោយប៉ែត​ឬ​នៅ​ស្រុក​ថ្មពួក​ឬ​ស្រុក​ផ្សេងទៀត​ក៏​ពួកខ្លួន​យល់ព្រម​ដែរ​ត្បិត​អី​ពួកខ្លួន​ទីទ័លក្រ​និង​ជួប​ការលំបាក​ហើយ​។​ហើយ​ពួកខ្លួន​ក៏​ទទួល​អំណោយ​មួយចំនួន​សម្រាប់​ដោះ​ទាល់​នូវ​ការលំបាក​ចំពោះមុខ ៕S/

​រូបថត ៖ ពលរដ្ឋ​៣​គ្រួសារ​ដែល​ត្រូវ​កងកម្លាំង​ឈុតខ្មៅ​ថៃ​អោយ​រើ​ផ្ទះ​សង់​ថ្មី​ពី​ព្រំដែន​នៅ​ទំនប់​ក​៥ បានទទួល​ដី​ពី​អាជ្ញាធរ​(​រូប​៖ ភ្នំ​ស្វាយ​)​