​ក្រោយពី​ធ្លាក់ចុះ​ខ្លាំង ឡុង ជិន បង្ហាញមុខ​ជាថ្មី​

339
ចែករម្លែក

ដោយ​៖ រ៉ូ​ហ្សា
​ភ្នំពេញ​៖
អ្នក​ប្រដាល់ ឡុង ជិន ដែល​មួយរយៈ​ចុងក្រោយ​នេះ បានធ្វើ​ឲ្យ​អ្នកគាំទ្រ​របស់គេ ខកចិត្ត​ជាច្រើនលើក ច្រើនសារ​នោះ ក៏​បាត់​មុខ​មួយរយៈ តែ​ពេលនេះ គេ​បាន​បង្ហាញខ្លួន​មកវិញ ដោយ​ជួប​ប្រកួត​ជាមួយ អ្នក​ប្រដាល់​ថៃ សេន មរកត (Sen Morokorth) លើស​ង្វៀន​អធិរាជ​កម្លាំង​រេ​ដ​អាន របស់​អាស៊ីអាគ្នេយ៍ នា​យប់​ថ្ងៃទី​២៣ កុម្ភៈ នេះ​។​

​ឡុង ជិន មួយរយៈ​នេះ គេ​ប្រកួត​ចាញ់​អ្នក​ប្រដាល់ ស្រករ​ក្រោយ​ជាច្រើនរូប ដែល​ការ​ចាញ់​ផ្ទួនៗ​នេះ បានធ្វើ​ឲ្យ​អ្នកគាំទ្រ​របស់គេ ស្រងាកចិត្ត​ជាខ្លាំង​។ បន្ទាប់ពី​លាក់ខ្លួន សម្ងំ​ហ្វឹកហាត់ មួយរយៈ​មក​នោះ ពេលនេះ ឡុង ជិន បង្ហាញខ្លួន​មកវិញ តែ​មិនដឹងថា គេ​បង្ហាញខ្លួន​ក្នុង​ភាពកំសោយ ឬក៏​ខ្លាំង​នោះទេ ។

ឡុង ជិន និង សេន មរកត​

​តាមពិត អ្នក​ប្រដាល់​កម្ពុជា​រូបនេះ គេ​មាន​ផ្លែ​វ៉ៃ​ល្អ រហ័ស ដែល​កន្លងមក ការ​ប្រ​កួ​ភាគច្រើន គេ​តែងតែ​ផ្ដួល​គូប្រកួត បាន​មុន​ទឹក​ទី​៥ ទៀតផង ។ ចំពោះ​ការស្រុតចុះ​នេះ ទំនងជា​គេ​ខ្ជីខ្ជារ ក្នុងការ​ហ្វឹកហាត់ ហើយ​មើលទៅ បានជា​សូម្បីតែ​អ្នក​ប្រដាល់ ដែល​គ្មាន​ឈ្មោះ​បោះ​សម្លេង​សោះ ក៏​គេ​វ៉ៃ​ចាញ់​ដែរ ។ ពួកគេ​ប្រកួត​គ្នា ក្នុង​ប្រភេទ​ទម្ងន់ ៦០ គីឡូក្រាម ។​

​ចំពោះ សេន មរកត នេះ​ជា​លើកដំបូង​ហើយ ដែល​គេ​ឆ្លងដែន មក​ប្រកួត​នៅ​ស្រុក​ខ្មែរ ។ មិនដឹងថា គេ​ខ្លាំង ឬ ខ្សោយ​នោះទេ តែ​គេ​ហ៊ាន​ប្រកួត ជាមួយ​ឡុង ជិន បែបនេះ ទំនងជា​មិន​អន់​ឡើយ ។ អ្នក​ប្រដាល់​ថៃ​រូបនេះ មាន​ប្រវត្តិ​ប្រកួត ចំនួន​៦៥​ដង ឈ្នះ​៥៥​ដង និង​ចាញ់​១០​ដង ។ ចំពោះ ឡុង ជិន​វិញ គេ​មាន​ប្រវត្តិ​ប្រកួត ចំនួន​៨៤​ដង ឈ្នះ​៦៤​ដង ចាញ់​១៨​ដង និង​ស្មើ​ពិន្ទុ​២​ដង ។ នៅក្នុង​ការប្រកួត​លើក​នេះ ឡុង ជិន អាច​ស្ដារ​មុខមាត់​បាន​វិញ​ដែរឬទេ ?​។​

​ម៉ន សា​ម៉េ​ត និង ប៊ូ វី​

​ម៉ន សា​ម៉េ​ត ក្លិប​កងចក្រ​រាជសីហ៍ ប្រកួត​ជាមួយ​អ្នក​ប្រដាល់​ថៃ ឈ្មោះ ប៊ូ វី (Bou Vy) ដោយ​ពួកគេ ប្រកួត​គ្នា ក្នុង​ប្រភេទ​ទម្ងន់ ៦០ គីឡូក្រាម​ដែរ ។​

​សា​ម៉េ​ត ជា​អ្នក​ប្រដាល់​ចិត្តធំ ក្លាហាន និង​មាន​ផ្លែ​វ៉ៃ​ចេញ​ល្អ រហ័ស តែ​អ្នក​ប្រដាល់​រូបនេះ ចូលចិត្ត​កេង​បន្លំ បន្ថែម​លើ​គូប្រកួត ក្នុងខណៈដែល​គូប្រកួត​ដួល ឬ​ក្រោយពេល​អាជ្ញាកណ្ដាល ឃាត់​ទៅហើយនោះ ។ មួយរយៈ​នេះ នៅលើ​សង្វៀន​ប្រកួត សា​ម៉េ​ត តែងតែបាន​ទទួលលទ្ធផល​ល្អ ភាគច្រើន ។​

​ចំពោះ ប៊ូ វី វិញ គេ​ក៏​ឧស្សាហ៍​ឆ្លងដែន មក​ប្រកួត​នៅ​ស្រុក​ខ្មែរ ម្ដងម្កាល​ដែរ ។ គេ​ជា​អ្នក​ប្រដាល់ ដែលមាន​ច​រឹត​ស្ងប់ស្ងាត់ តែ​គេ​មិនមែនជា​អ្នក​ប្រដាល់ ដែល​ខ្សោយ​នោះឡើយ ។ កាល​មក ប្រកួត​នៅ​ស្រុក​ខ្មែរ កន្លងមក គេ​មាន​ឈ្នះ មាន​ចាញ់​ជាធម្មតា ។ សម្រាប់​លើក​នេះ ទាំង ម៉ន សា​ម៉េ​ត ទាំង ប៊ូ វី ពិតជា​ទទួល​ការងារ​ធ្ងន់ ដូចគ្នា​ហើយ ។​

​អ្នកខ្លាំង​ដែល​ត្រូវ​ប្រកួត​គ្នា​

​សា​ម៉េ​ត មាន​ប្រវត្តិ​ប្រកួត ចំនួន​១៤៨​ដង ឈ្នះ​១០៩​ដង ចាញ់​៣៣​ដង និង​ស្មើ​ពិន្ទុ​ចំនួន​៦​ដង ។ ចំពោះ​អ្នក​ប្រដាល់​ថៃ ប៊ូ វី វិញ គេ​មាន​ប្រវត្តិ​ប្រកួត ចំនួន​៩៣​ដង ឈ្នះ​៧៥​ដង ចាញ់​១៧​ដង និង​ស្មើ​ពិន្ទុ​១​ដង ។ ជំនួប​មួយ​នេះ មិនដឹងថា ម៉ន សា​ម៉េ​ត បន្ថែម​ស្ថិតិ​ឈ្នះ ក្នុង​កំណត់ត្រា​ប្រកួត​របស់ខ្លួន ឬក៏​យ៉ាងណា​នោះទេ ។​

​ជំនួប​រវាង អ្នក​ប្រដាល់​រួម​ជាតិ​វិញ​នោះ វីរៈ សុខ​ខួច ក្លិប​ពន្លឺ​ថ្មី នៃ​សមាគម​ប្រដាល់ ក្រសួងការពារជាតិ ប្រកួត​ជាមួយ អ្នក​ប្រដាល់ ប៉ុក វិបុល ក្លិប​ទ័ព​ឆ័​ត្រ​យោង ៩១១ ក្នុង​ប្រភេទ​ទម្ងន់ ៥៤ គីឡូក្រាម ។ ថន ភឿ​ត ក្លិប​ឃ្លាំងមឿង​កីឡា ប្រកួត​ជាមួយ ផាន រះ ក្លិប​ជ្រៃ​សែន​ជ័យ​ខេត្តកំពង់ស្ពឺ ដោយ​ប្រកួត​គ្នា ក្នុង​ប្រភេទ​ទម្ងន់ ៦០ គីឡូក្រាម ។ អ្នក​ប្រដា​ជើងចាស់ ដែល​គ្មាន​កេរ្តិ៍ឈ្មោះ ផៃ គឹម​ហឿ​ត ក្លិប​គី​សែ​មាន​រិ​ទ្ធ ប្រកួត​ជាមួយ​អ្នក​ប្រដាល់​ជើង​ថ្មី ឌុន សុ​ភុ​ត ក្លិប​អេ​ភូ​ថង​កីឡា ដោយ​ប្រកួត​គ្នា ក្នុង​ប្រភេទ​ទម្ងន់ ៦០ គីឡូក្រាម ៕v