ដោយ: ម៉ារ៉ា / ភ្នំពេញ: ផ្ទះប្រជាពលរដ្ឋមួយកន្លែងជាន់ទី៥ ត្រូវបានអគ្គិភ័យឆាបឆេះយ៉ាងសន្ធោសន្ធៅ ខណៈដែលម្ចាស់ផ្ទះកំដៅម្ហូបទុកចោល បណ្តាលឲ្យឆ្លងចរន្តអគ្គិសនីផ្ទុះព្រីភ្លើង បង្កឱ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហៅរថយន្តពន្លត់អគ្គិភ័យចុះមកបាញ់ពន្លត់ កាលវេលាម៉ោង៨និង២០នាទីយប់ថ្ងៃទី២២ ខែកុម្ភៈឆ្នាំ២០២០ តាមបណ្ដោយផ្លូវលេខ៥ កែង១១៨ ភូមិ១ សង្កាត់ផ្សារកណ្ដាល១ ខណ្ឌដូនពេញ។
យោងតាមប្រភពពីប្រជាពលរដ្ឋ បានប្រាប់ឲ្យដឹងថា ផ្ទះដែលត្រូវអគ្គិភ័យឆាបឆេះមានម្ចាស់ផ្ទះជាជនបរទេស តែដោយសារម្ចាស់ផ្ទះបានកំដៅម្ហូបក្នុងម៉ាស៊ីនកំដៅដោយកំណត់នាទីរលត់ ស្រាប់តែមួយសន្ធូះក្រោយមកក៏មានផ្សែងហុយចេញពីផ្ទះជនបរទេសជាន់ទី៥ បង្កឲ្យឆេះជាអណ្ដាតភ្លើងយ៉ាងសន្ធោសន្ធៅ ផ្អើលដល់សមត្ថិច្ចហើយរថយន្តពន្លត់អគ្គិភ័យចុះមកអន្តរាគមន៍ចំនួន៤គ្រឿង ដោយប្រើទឹកអស់ចំនួន៣គ្រឿង ទើបបានរលត់ទៅវិញជាស្ថាពរ នៅថ្ងៃនោះដែរ។
សមត្ថកិច្ចបានបញ្ជាក់ថា ផ្ទះដែលត្រូវអគ្គិភ័យឆាបឆេះនេះខូចខាតសម្ភារៈមួយចំនួនតូច តែមិនបង្កឲ្យមានអ្នករងរបួសនោះទេ។ ចំណែកម្ចាស់ផ្ទះត្រូវបានសមត្ថកិច្ចហៅមកប៉ុស្តិ៍ផ្សារកណ្ដាល១ ដើម្បីធ្វើការអប់រំនិងណែនាំ៕ ល
