ដោយ៖ រ៉ូហ្សា
កែប៖ នាថ្ងៃទី២៣ ខែកុម្ភៈ ឆ្នាំ២០២០ ព្រឹត្តការណ៍ការប្រកួតរត់ពាក់កណ្តាលម៉ារ៉ាតុន នៅខេត្តកែបលើកទី១ ដែលមានកីឡាករ-កីឡាការិនី ជាង ១០០ នាក់ ចូលរួម ដែលមកពី ៨ ប្រទេស ក្រោមការសហការរវាង សហព័ន្ធអត្តពលកម្មស្ម័គ្រ ជាមួយក្រុមហ៊ុន (DELIGHT) ខេត្តកែប ក្នុងគោលបំណងបំផុសវិស័យកីឡា អត្តពលកម្មចម្ងាយឆ្ងាយរបស់ខ្លួន។
លោក ហ៊ុន បូរី អគ្គលេខាធិការ សហព័ន្ធ បានប្រាប់ឲ្យដឹងថា ការប្រកួតរត់ពាក់កណ្តាលម៉ារ៉ាតុន នៅខេត្តកែប លើកទី១ មាន ៨ ប្រទេសចូលរួម គឺកម្ពុជា បារាំង អាមេរិក ជប៉ុន ឈីលី ជាដើម ក្នុងនោះកីឡាករ-កីឡាការិនី ចូលរួមច្រើន គឺមកពីប្រទេសជប៉ុន។ សម្រាប់វិញ្ញាសា រួមមាន ចម្ងាយ៥គីឡូម៉ែត្រ មានកីឡាចូលរួម ចំនួន៧៥នាក់ ចម្ងាយ១០គីឡូម៉ែត្រ មានកីឡាករ ចូលរួមចំនួន ៣៣នាក់ និងចម្ងាយ២១គីឡូម៉ែត្រ មានកីឡាករ ចូលរួមចំនួន ២៧នាក់ ។
លោកបានបន្តថា ការរៀបចំធ្វើឡើង ដើម្បីបំផុសវិស័យកីឡា អត្តពលកម្មចម្ងាយឆ្ងាយ ហើយគ្រោងបង្កើតការប្រកួតកីឡា រត់ពាក់កណ្តាលម៉ារ៉ាតុន ជ្រើសរើសជើងឯកថ្នាក់ជាតិខេត្ត ព្រមទាំងបំផុសឲ្យបណ្តាប្រទេសជាច្រើន បានស្គាល់តំបន់ទេសចរធម្មជាតិ ខេត្តកែបរបស់កម្ពុជាផងដែរ៕v
