Home ព័ត៌មានអន្តរជាតិ ម៉ាឡេស៊ី​ស្ថិ...

ម៉ាឡេស៊ី​ស្ថិតក្នុង​ចលាចល​នយោបាយ បន្ទាប់​ពី​នាយករដ្ឋមន្ត្រី​សុំ​លាឈប់​

​នាយករដ្ឋមន្ត្រី​ម៉ាឡេស៊ី លោក​មហា​ធៀ ម៉ូ​ហា​ម៉ា​ត​កាលពី​ថ្ងៃ​ចន្ទ​ទី​២៤​កុម្ភៈ​បាន​ដាក់​លិខិត​សុំ​លាឈប់​ពី​តំណែង​នាយករដ្ឋមន្ត្រី​ទៅកាន់​ព្រះមហាក្សត្រ​បន្ទាប់ពី​​សម្ពន្ធមិត្ត​របស់លោក​ប៉ុនប៉ង​ទម្លាក់​រដ្ឋាភិបាល និង​រារាំង​ការ​ស្នង​តំណែង​ពី​លោក ទៅកាន់​លោក​អាន់​វ៉ា អ៊ីប្រាហ៊ីម​ដែលជា​ប្រធាន​បក្ស​ក្នុង​ក្រុមចម្រុះ​។​

មហា​ធៀ បាន​សន្យា​ប្រគល់​អំណាច​ទៅ​អាន់​វ៉ា​ក្រោយ​លោក​ធ្វើ​នាយករដ្ឋមន្ត្រី​មួយរយៈ បើ​ក្រុមចម្រុះ​PH​ឈ្នះឆ្នោត តែ​ភាព​តានតឹង​ចេះតែ​កើន​ឡើង​រវាង​ក្រុម​ប្រជែង​គ្នា​ក្នុង​រដ្ឋាភិបាល

​ភាព​ស្រឡាំងកាំង​នយោបាយ​នេះ​បាន​កើត​ឡើង​ក្រោយ​ល្ខោន​នយោបាយ​ត្រូវ​បាន​សម្តែង​អស់​២៤​ម៉ោង ដោយ​គូប្រជែង​ក្នុង​គណបក្ស​ផ្ទាល់​របស់​លោក​អាន់​វ៉ា​និង​​ពួក​អ្នកនយោបាយ​ប្រឆាំង​រួមដៃគ្នា​បង្កើត​ក្រុម​ចម្រុះ​ថ្មី​មួយ​ដើម្បី​បង្កើត​រដ្ឋាភិបាល​។​គេ​ថា ក្រុម​ចម្រុះ​ថ្មី​នេះ​មិន​មាន​លោក​អាន់​វ៉ា​ទេ​ហើយ​មាន​ការចូលរួម​ពីស​​មាជិក​សភា​ជា​ច្រើន​ក្នុង​គណបក្ស​របស់​លោក ដែល​វា​ជា​សញ្ញា​បង្ហាញ​ថា​លោក​នឹង​មិន​អាច​ក្លាយជា​នាយក​រដ្ឋមន្ត្រី​បន្ទាប់ពី​លោក​មហាធៀ​បានទេ​។​

​គណបក្ស​Bersatu​របស់​លោក​មហា​ធៀ ក៏​បាន​ប្រកាស​ចាកចេញ​ពី​ក្រុមចម្រុះ​PH និង​ថា​គណបក្ស​នឹង​ព្យាយាម​បង្កើត​គណបក្ស​ដោយ​ខ្លួនឯង​។​

​ឥឡូវ អ្វី​នឹង​កើត​ឡើង​បន្ទាប់​ក្នុង​នយោបាយ​ម៉ាឡេស៊ី គ្មាន​នរណា​ទាយ​បានទេ​។​

​មុន​នេះ​កាលពី​ថ្ងៃអាទិត្យ​ ​ប្រធាន​គណបក្ស ប៉ា​ទី គី​ឌី​ឡាន រ៉ា​ក​យ៉ាត (PKR)​លោក​អាន់​វ៉ា អ៊ីប្រាហ៊ីម បាន​អះអាង​ថា រូបលោក​ត្រូវបាន​ដៃគូ​ក្នុង​ក្រុមចម្រុះ​ប៉ា​កាតា​ន ហា​រ៉ា​ប៉ាន​(PH)​ក្បត់​ដោយសារតែ​ពួកគេ​ព្យាយាម​រំលាយ​ចោល​រដ្ឋាភិបាល​បច្ចុប្បន្ន​ក្នុងពេល​លោក​រង់ចាំ​ពេលមកដល់​យ៉ាង​អន្ទះសារ​ដើម្បី​ចូល​កាន់តំណែង​នាយករដ្ឋមន្ត្រី​ដូរ​វេន​ពី​លោក​មហា​ធៀ ម៉ូ​ហា​ម៉ា​ត​។​

​ការចោទប្រកាន់​នេះ​ធ្វើឡើង​ចំ​ពេល​មាន​លេចឮ​ពាក្យ​ចចាមអារ៉ាម​ថា ក្រុមចម្រុះ​កាន់អំណាច​ថ្មី​មួយ​នឹង​ត្រូវ​បង្កើតឡើង ដោយ​រួម​បញ្ចូល​គណ​បក្​Bersatu​គណបក្ស​UMNO គណបក្ស​PAS​និង​បក្ស​ផ្សេងទៀត​។​

​នៅក្នុង​ទំព័រ​ហ្វេ​ស​ប៊ុកមួយ លោក​អាន់​វ៉ា បាន​និយាយថា ខណៈ​នៅ​មិនទាន់​មាន​ការប្រកាស​ផ្លូវការ​នៅឡើយ​កាលពី​ថ្ងៃអាទិត្យ លោក​ត្រូវបាន​គេ​ផ្តល់​ព័ត៌មាន​មក​ថា​មាន​អំពើ​ក្បត់​ហើយ​។​លោក​បាន​ទទួលស្គាល់ថា មាន​ការប៉ុនប៉ង​បំបែក​ក្រុមចម្រុះ​PH ដូច្នេះ​រដ្ឋាភិបាល​ថ្មី​មួយ​អាច​ត្រូវ​បង្កើតឡើង​។​

​កាលពី​យប់​ថ្ងៃអាទិត្យ មាន​ការជួបជុំ​មួយ​រវាង​សមាជិក​សភា​មក​ពី​ក្រុម​នយោបាយ​បែកបាក់ រួម​មាន​អ្នក​នយោបាយ​មក​ពី​បក្ស​Bersatu, UMNO, PAS និង​ក្រុម​បំបែក​ខ្លួន​មួយ​មក​ពី​បក្ស PKR ។​សារព័ត៌មាន​ម៉ាឡេស៊ី​ក៏​បាន​និយាយថា មេដឹកនាំ​គណបក្ស​ចំនួន​៦​បាន​ចូល​គាល់​ស្តេច​ម៉ាឡេស៊ី​កាលពី​ល្ងាច​ថ្ងៃ​អាទិត្យ​។​

​ជំនួប​នេះ​កើត​ឡើង​បន្ទាប់ពី​មាន​កិច្ចប្រជុំ​របស់​ក្រុមប្រឹក្សា​ប្រធាន​ក្រុមចម្រុះ​PH កាលពី​យប់​ថ្ងៃ​សុក្រ នៅ​ពេល​នាយក​រដ្ឋមន្ត្រី​មហា​ធៀ បាន​និយាយថា​«​មិន​មាន​ការកំណត់​កាលបរិច្ឆេទ​សំរាប់​ដូរ​មេដឹកនាំ​ទៅកាន់​អ្នក​ស្នង គឺ​លោក​អាន់​វ៉ា ក្រោម​កិច្ច​ព្រមព្រៀង​មួយ​ក្នុងចំណោម​ដៃគូ​របស់​PH​ដើម្បី​ដណ្តើម​ជ័យជម្នះ​ក្នុង​ការបោះឆ្នោត​កាលពី​ឆ្នាំ​២០១៨​ទេ​។​

​នៅពេល​ត្រូវ​បាន​សួរថា​តើ​លោក​អាន់​វ៉ា​នឹង​ជា​នាយករដ្ឋមន្ត្រី​នៅពេល​បន្ទាប់​ឬ លោក​មហា​ធៀ បាន​និយាយថា​«​បញ្ហា​នេះ​មិន​កើត​មាន​ទេ​។​តំណែង​នេះ​គឺ​ខ្ញុំ​ជា​អ្នក​សំរេច​បន្ទាប់ពី​កិច្ចប្រជុំ​Apec​ទៅ​»​។​

​ទោះជា​យ៉ាងណា​កន្លងមក លោក​មហា​ធៀ​បាន​អះអាង​ថា​លោក​នឹង​រក្សា​ពាក្យ​សន្យាថា​នឹង​ប្រគល់​តំណែង​ទៅកាន់​អ្នក​ស្នង​ពី​លោក​នៅ​ក្រោយ​កិច្ចប្រជុំ​Apec​នៅ​ខែ​វិច្ឆិកា​៕​ប្រែ​សម្រួល​៖​វាសនា​

លោក​អាន់​វ៉ា និង​ភរិយា គ្រោង​ចូលគាល់​ស្តេច​នៅ​ថ្ងៃ​ចន្ទ​ទី​២៤​កុម្ភៈ ដើម្បី​រាយការណ៍​ថ្វាយ​ព្រះមហាក្សត្រ​អំពី​បច្ចុប្បន្នភាព​នយោបាយ​

ទីតាំងផ្សាយពាណិជ្ជកម្ម

- Advertisment -

Most Popular

អភិបាលក្រុង​ស៊ូ​វ៉ុ​ន កូរ...

​ដោយៈ រ៉ា​ម៉ន / ភ្នំពេញៈ ...

រដ្ឋមន្ត្រីក្រសួង​រ៉ែ និង...

​ដោយៈ រិ​ទ្ធិ​សែន / ពោធិស...

កងទ័ពជើងទឹក បាន​ដឹកបញ្ជូន...

ដោយៈ វណ្ណៈ / ព្រះសីហនុៈ ក...

រដ្ឋបាល​ខេត្តសៀមរាប​ចែក​ម...

ដោយ​: គូលែន / សៀមរាប​: នៅ...