ដោយៈ មុនីរ័ត្ន/ភ្នំពេញៈ នារីម្នាក់ត្រូវបានចាប់ខ្លួនពាក់ព័ន្ធករណីលក់ម៉ាសពាក់ការពារយ៉ាងច្រើនដែលមានតម្លៃរហូតដល់ជាងបួនម៉ឺនដុល្លារ។ ការចាប់ខ្លួននេះ បានធ្វើឡើងបន្ទាប់ពីនារីរូបនោះយកលុយពីជនរងគ្រោះហើយ ប៉ុន្តែមិនមានម៉ាសគ្រប់ចំនួន និងថែមទាំងបានរត់គេច តែត្រូវជនរងគ្រោះតាមរកឃើញចាប់ប្រគល់ឲ្យសមត្ថកិច្ច។
ជនសង្ស័យឈ្មោះ អ៊ឹង ហ្គិចហួង អាយុ២១ឆ្នាំ ត្រូវបានជនរងគ្រោះចាប់យកមកប្រគល់ឲ្យសមត្ថកិច្ចកាលពីថ្ងៃទី២២ ខែកុម្ភៈ ហើយត្រូវបានបញ្ជូនទៅតុលាការនៅថ្ងៃទី២៤ ខែកុម្ភៈ ឆ្នាំ២០២០ ដើម្បីចាត់ការតាមនីតិវិធី។
លោកវរសេនីយ៍ទោ ឡេង ប៊ុនហួរ នាយរងការិយាល័យព្រហ្មទណ្ឌកម្រិតស្រាលនៃនាយកដ្ឋាននគរបាលព្រហ្មទណ្ឌក្រសួងមហាផ្ទៃ បានថ្លែងប្រាប់រស្មីកម្ពុជាកាលពីរសៀលថ្ងៃទី២៤ ខែកុម្ភៈ ថា ទាក់ទងករណីនេះ ក្រោយពីទទួលបានពាក្យបណ្តឹងពីជនរងគ្រោះ ហើយខាងជនរងគ្រោះបានឃាត់ខ្លួនជនសង្ស័យយកមកឲ្យខាងការិយាល័យព្រហ្មទណ្ឌកម្រិតស្រាលធ្វើការសាកសួរ។ ករណីនេះ មានជនរងគ្រោះបានឡើងដល់ប្រាំមួយនាក់ហើយ។នារីរូបនោះត្រូវជនរងគ្រោះចាប់យកមកមកប្រគល់ឲ្យសមត្ថកិច្ចកាលពីថ្ងៃទី២២ ខែកុម្ភៈ និងបានបញ្ជូនទៅតុលាការនៅថ្ងៃទី២៤ ខែកកុម្ភៈ ។
លោកវរសេនីយ៍ទោ ឡេង ប៊ុនហួរ បានបញ្ជាក់ថា “ជនរងគ្រោះបានប្តឹងស្ត្រីរូបនោះពីបទឆបោក ដោយស្ត្រីរូបនោះគាត់បានយកលុយពីជនរងគ្រោះដើម្បីទិញម៉ាស (ម៉ាសពាក់ការពារ) ប៉ុន្តែអត់មានម៉ាសឲ្យគេ។ ជនសង្ស័យបានបង្កើតគណនីហ្វេសប៊ុកចំនួនបី ដើម្បីឆបោកគេ ដោយបានដើរតួជាម្ចាស់ម៉ាស និងថាខ្លួនមានម៉ាសលក់ ហើយឲ្យជនរងគ្រោះផ្ញើលុយឲ្យតាមវីង បន្ទាប់ពីទទួលបានលុយហើយ គាត់គេចខ្លួន។ ប៉ុន្តែដោយជនរងគ្រោះតាមរកឃើញក៏បានឃាត់ខ្លួនយកមកប្រគល់ឲ្យខាងខ្ញុំ ឃាត់ខ្លួនកាលពីថ្ងៃទី២២ ខែកុម្ភៈ”។
លោកបានបន្តថា ជនរងគ្រោះមានចំនួនប្រាំមួយនាក់ ទឹកប្រាក់ដែលបោកមានជាងបួនម៉ឺនប្រាំពាន់ដុល្លារ៕សរន/Ha
