ស្តេច​ម៉ាឡេស៊ី តែងតាំង​មហា​ធៀ ជា​នាយករដ្ឋមន្ត្រី​ចាំផ្ទះ ក្រោយ​ទទួល​ការសុំ​លាឈប់​

263
ចែករម្លែក

​ការសុំ​លាឈប់​ពី​តំណែង​នាយក​រដ្ឋមន្ត្រី​របស់​លោក​មហា​ធៀ ម៉ូ​ហា​ម៉ា​ត ត្រូវបាន​ស្តេចម៉ាឡេស៊ី ទទួលយក​កាលពី​ល្ងាច​ថ្ងៃ​ចន្ទ​ទី​២៤​កុម្ភៈ ។​ព្រះមហាក្សត្រ​ក៏​បាន​​តែងតាំង​លោក​មហា​ធៀ ជា​នាយករដ្ឋមន្ត្រី​ចាំផ្ទះ រហូតដល់​​មាន​ការជ្រើសរើស​បាន​នាយក​រដ្ឋមន្ត្រី​ថ្មី​ម្នាក់​។​

​មុន​នេះ​ក្នុង​ថ្ងៃ​ដដែល មហា​ធៀ វ័យ​៩៥​ឆ្នាំ បាន​ដាក់​ពាក្យ​សុំ​លាលែង​ពី​តំណែង​នាយករដ្ឋមន្ត្រី និង​ក៏​លាឈប់​ពី​ប្រធាន​បក្ស​របស់​បក្ស​Bersatu​ចំ​ពេល​មាន​​ពាក្យ​លេច​ឮ​ថា​កិច្ចព្រមព្រៀង​ថ្មី​មួយ​នឹង​ត្រូវ​បង្កើតឡើង​ដើម្បី​ជំនួស​ក្រុមចម្រុះ​Pakatan Harapan (PH)​ដែល​កំពុងកាន់​អំណាច​។​

​វា​បាន​កើតឡើង​មួយ​ថ្ងៃ​បន្ទាប់ពី​ប្រធាន​គណបក្ស Parti Keadilan Rakyat (PKR)​ដែល​ជា​បក្ស​ដៃគូ​ក្នុង​ក្រុមចម្រុះ​លោក​អាន់​វ៉ា អ៊ីប្រាហ៊ីម កត់សម្គាល់ថា​មាន​​អំពើ​ក្បត់​ពី​សំណាក់​ដៃគូ​ក្នុង​ក្រុមចម្រុះ​ដើម្បី​បំបែកបំបាក់​PH​។​

​ក្នុងពេល​ជាមួយគ្នា មេដឹកនាំ​បក្ស​Bersatu លោកមូ​យីត​ឌីន យ៉ាស​ស៊ីន បានប្រកាសថា គណបក្ស​ចាកចេញ​ពី​ក្រុមចម្រុះ ​PH ខណៈ​សមាជិក​សភា​របស់​គណបក្ស​PKR​ចំនួន​១១​រូប ក៏​បាន​ប្រកាស​ចាកចេញ​ពី​គណបក្ស​និង​PH​ដើម្បី​បង្កើត​ប្លុក​ឯករាជ្យ​មួយ​នៅក្នុង​សភា​។​

​ការចាកចេញ​របស់​ស​មាជិក​សភា​ទាំង​នេះ​នាំឲ្យ​ក្រុមចម្រុះកាន់​អំណាច​បាត់បង់​សំឡេង​ភាគច្រើន​នៅក្នុង​សភា មានន័យថា រដ្ឋាភិបាលចម្រុះ​បច្ចុប្បន្ន​រលាយ​​ជា​ស្វ័យប្រវត្តិ​។​

​ចំណាត់ការ​ជា​ហូរហែ​នេះ​ត្រូវបាន​គេ​មើលឃើញថា​ជា​ការប៉ុនប៉ង​រារាំង​មិនឲ្យ​លោក​អាន់​វ៉ា ចូល​បន្ត​តំណែង​នាយករដ្ឋមន្ត្រី​ពី​លោក​មហា​ធៀ​។​ទោះជា​យ៉ាង​ដូច្នេះ​​ក្តី លោក​អាន់​វ៉ា បាន​និយាយថា មហា​ធៀ​មិនបាន​ចូលរួម​ក្នុង​ផែនការ​បង្កើត​ក្រុម​ចម្រុះ​ថ្មី​នេះ​ទេ​។​

​ប្រភព​ព័ត៌មាន​បាន​និយាយថា ការលាឈប់​របស់លោក​មហា​ធៀ កើត​ឡើង​បន្ទាប់ពី​មានការ​ប្រកាស​គាំទ្រ​ឲ្យ​លោក​នៅ​ធ្វើ​ជា​នាយករដ្ឋមន្ត្រី​ដល់​ចប់​អាណត្តិ​​សភា​។​វា​អាច​ជា​តា​ក់ទិច​មួយ ដោយសារតែ​លោក​អាន់​វ៉ា អ៊ី​ប្រា​ហ៊ី​ម និង​អ្នកគាំទ្រ​ទន្ទេញ​តែ​ពាក្យ​ចូល​កាន់តំណែង​ជំនួស​មហា​ធៀ តាម​ការសន្យា​ចង​សម្ពន្ធភាព​​មុន​ឈ្នះឆ្នោត​។​

​ក្រុម​ចម្រុះថ្មី​ណាមួយ​ទាមទារ​សមាជិកសភា​យ៉ាងតិច​១១២ ក្នុង​សភា​ដែលមាន​២២២​កៅអី ដើម្បី​បង្កើត​រដ្ឋាភិបាល​មួយ​។​

​ការវិវត្តន៍​នយោបាយ​កាលពី​ថ្ងៃ​ចន្ទ​ស្របគ្នា​នឹង​របាយការណ៍​កាលពី​ថ្ងៃ​អាទិត្យ​ថា លោក​មហាធៀ​រៀបចំ​ផែនការ​បង្កើត​សម្ពន្ធ​ភាព​ថ្មី​មួយ​ជំនួស​ក្រុមចម្រុះ​កំពុង​​កាន់អំណាច ដោយ​រួម​បញ្ចូល​បក្សប្រឆាំង Umno និង PAS តែ​អាច​បញ្ចេញ​ចោល​អតីត​ដៃគូ​ខ្លះ​ក្នុង​PH៕​ប្រែ​សម្រួល​៖​វាសនា​/Ha

ស្តេច​ម៉ាឡេស៊ី តែងតាំង មហា​ធៀ (ស្តាំ)ជា​នាយករដ្ឋមន្ត្រី​ចាំ​ផ្ទះ​រហូតដល់​មាន​នាយក​រដ្ឋមន្ត្រី​ថ្មី​

អាជ្ញាប័ណ្ណចែកចាយផ្តាច់មុខ