ស្លាប់​និង​ឆ្លង​Covid-19​នៅ​ចិន​ធ្លាក់​ចុះ​ តែ​បែរ​ជា​កើន​នៅ​កូរ៉េ​ខាងត្បូង​

368
ចែករម្លែក

​ចិន​កាលពី​ថ្ងៃ​អង្គារ​ទី​២៥​កុម្ភៈ​ បាន​រាយការណ៍​ការស្លាប់​ដោយ​ជំងឺឬ​វីរុស​Covid-19​ចំនួន​៧១​នាក់​ទៀត ដែល​នេះ​ជា​ចំនួន​ស្លាប់​តិច​បំផុត​ធៀប​នឹង​ចំនួន​ស្លាប់​​ប្រចាំថ្ងៃ​ក្នុង​រយៈពេល​២​សប្តាហ៍​មក​នេះ​។​

​ចំនួន​ចុងក្រោយ​នេះ​ធ្វើឲ្យ​អ្នក​ស្លាប់​ដោយ​កូរ៉ូណា​វីរុស​នេះ​នៅ​ចិន​កើន​ដល់​២.៦៦៣​នាក់​។​

​គណៈកម្មាធិការ​សុខាភិបាល​ជាតិ​ចិន ក៏​បាន​រាយការណ៍​ការ​ឆ្លង​៥០៨​ករណី​ថ្មី ដោយ​ទាំងអស់​លើកលែងតែ​៩​នាក់​ចេញ ស្ថិតក្នុង​ខេត្ត​ហ៊ូ​ប៉ី​។​វា​កើន​បន្តិច​ពី​ចំនួន​​ឆ្លង​៤០៩​ករណី​កាលពី​ថ្ងៃ​ចន្ទ ទោះជា​យ៉ាងណា​ចាត់ទុក​ថា​ទាប​បើ​ធៀប​នឹង​ចំនួន​ឆ្លង​២​ទៅ​៣​ពាន់​នាក់​ក្នុង​មួយថ្ងៃ​នៅ​ដំណាក់កាល​មួយ​។​

​ចំនួន​អ្នក​ឆ្លង​សរុប​នៅ​ចិន​ឥឡូវ​កើនឡើង​ដល់​៧៧.៦៥៨​នាក់​។​

បុគ្គលិក​ពេទ្យ​ធ្វើការ​នៅ​មន្ទីរពេទ្យ​មួយ​ក្នុង​ក្រុង​វូ​ហាន ក្នុង​ខេត្ត​ហ៊ូ​ប៉ី កាលពី​ថ្ងៃ​២២​កុម្ភៈ​

​ទោះជា​ការឆ្លង​រាលដាល​ជំងឺឆ្លង​នេះ​នៅ​ចិន​ហាក់​ទ្រឹង​និង​បង្ហាញ​និន្នាការ​ធ្លាក់ចុះ ក៏​Covid-19​កំពុង​ពង្រីក​ឥទ្ធិពល​របស់​វា​នៅ​ក្រៅ​ទឹកដី​ចិន​ ដូចជា​នៅ​កូរ៉េ​​ខាងត្បូង អ៊ីរ៉ង់​និង​អ៊ីតាលី​។​

​កូរ៉េខាងត្បូង​បាន​រាយការណ៍​អ្នក​ឆ្លង​៦០​នាក់​បន្ថែម​កាលពី​ថ្ងៃ​អង្គារ​។​

​កូរ៉េខាងត្បូង​ឥឡូវ​មាន​អ្នក​ឆ្លង​៨៩៣​នាក់ ជា​ចំនួន​ឆ្លង​ក្នុង​មួយ​ប្រទេស​ច្រើន​បំផុត​នៅ​ក្រៅ​ប្រទេស​ចិន ។​មនុស្ស​ម្នាក់​ទៀត​បាន​ស្លាប់ នាំ​ឲ្យ​មនុស្ស​ចំនួន​៨​នាក់​ហើយ​ស្លាប់​នៅក្នុង​ប្រទេស​នេះ​ដោយ​Covid-19៕​ប្រែ​សម្រួល​​វាសនា​/Ha

កម្មករ​មកពី​សមាគម​គ្រប់គ្រង​មេរោគ​កូរ៉េ ពាក់​សម្លៀកបំពាក់​ការពារ និង​បាញ់ថ្នាំ​សម្លាប់​មេរោគ​នៅ​ក្រុង​សេ​អ៊ូ​ល​កាលពី​ថ្ងៃ​២៤​កុម្ភៈ​