ថ្ងៃស្អែកសម្តេចតេជោ ហ៊ុន សែន នឹងអញ្ជើញសម្ពោធ​ផ្លូវជាតិលេខ ៥៨ ប្រវែង១៧៤ គីឡូម៉ែត្រ

229
ចែករម្លែក

ដោយ៖តារារិទ្ធ(បន្ទាយមានជ័យ)៖ផ្លូវជាតិលេខ ៥៨​ មានប្រវែង ១៧៤,១៦​ គីឡូម៉ែត្រ​​(រួមទាំងផ្លូវច្រកព្រំដែន​៤កន្លែង​ ៨,៩៨ គីឡូម៉ែត្រ)ពី​ក្រុង​ប៉ោយប៉ែតខេត្តបន្ទាយមានជ័យ​ដល់ ឃុំផ្លុង ខេត្តឧត្តរមានជ័យ ​ក្រោម​ប្រាក់កម្ចី​សម្បទាន​ពី​រដ្ឋាភិបាលចិន រួម​ជា​មួយ​នឹង​ថវិកា​បដិភាគ​របស់​រា​ជ​រដ្ឋាភិបាល​កម្ពុជាសរុប​ប្រមាណ​ជាង១២២​លានដុល្លារ​អាម៉េរិកនឹងប្រារព្ធពិធីសម្ពោធ​ជាផ្លូវការនៅថ្ងៃទី២៦ ខែកុម្ភៈ ស្អែកនេះ ក្រោមអធិបតីភាពដ៏ខ្ពង់ខ្ពស់​ សម្ដេចអគ្គមហាសេនាបតីតេជោ​ ហ៊ុន​ សែន​ នាយក​រដ្ឋមន្ត្រី​ នៃព្រះរាជា​ណាចក្រកម្ពុជា។

ផ្លូវ​នេះ​សាង​សង់​ដោយ​ក្រុមហ៊ុន Shanghai Construction Group Co., Ltd ក្រោម​ការត្រួតពិនិត្យ​លក្ខណៈ​បច្ចេកទេស​ពី​ក្រុមហ៊ុន Guangzhou Wanna Construction Supervision Co., Ltd នៃ​សាធារណរដ្ឋ​ប្រជាមានិត​ចិន ​។ ​ជា​ប្រភេទ​ផ្លូវ​ក្រាល​កៅស៊ូ​ពីរ​ស្រទាប់ (DBST) គិត​ចាប់ពី​ផ្លូវជាតិលេខ​៥ ត្រង់​ គីឡូម៉ែត្រ ៣៩៩+៩០០ ក្រុង​ប៉ោយប៉ែតខេត្ត​បន្ទាយមានជ័យទៅកាន់​ផ្លូវជាតិ​លេខ ​៦៨ ត្រង់​ គីឡូម៉ែត្រ ១០១+៥០០ (​ផ្លុ​ង​)ខេត្ត​ឧ​ត្ត​រ​មានជ័យ ។

កំណាត់​ផ្លូវ​នេះ​ចូល​រួម​ចំណែក​យ៉ាង​សំខាន់​ក្នុង​ការ​សម្រួល​ដល់​ការ​ធ្វើ​ដំណើរ​របស់​បង​ប្អូន​ប្រជាពលរដ្ឋ​នៅតំបន់​ភាគ​ពាយ័ព្យ​ប្រទេស ព្រមទាំង​ការ​ដឹក​ជញ្ជូន​កាន់តែ​ប្រសើរ​មួយ​កម្រិត​ទៀត ជាពិសេស​កំណាត់​ផ្លូវនេះ​អាច​សម្រួល​ដល់​ការ​តភ្ជាប់​ជាមួយ​ព្រះរាជាណាចក្រ​ថៃក្នុង​ការពង្រីក​សក្ដានុពល​សេដ្ឋកិច្ច​ ពាណិជ្ជកម្ម​ថែមទៀត​របស់​ប្រទេសជាតិ​​។

គម្រោង​ផ្លូវ​នេះ​បាន​ចាប់​ដំណើរ​ការ​បើក​ការដ្ឋាន​សាងសង់កាលពី​ថ្ងៃ​ទី​១០ ខែ​មិថុនា ឆ្នាំ​២០១៥ និងត្រូវ​បាន​បញ្ចប់​ការងារ​សាងសង់​ជា​ស្ថាពរ ១០០%​នៅ​ថ្ងៃ​ទី​០៨ ខែ​កុម្ភៈ ឆ្នាំ​២០១៩ កន្លង​ទៅ​នេះ​៕/Ha