ដោយៈ មេសា/ភ្នំពេញៈ ប្រធានមន្ទីរសុខាភិបាលរាជធានីភ្នំពេញ លោកវេជ្ជបណ្ឌិត ងី មានហេង បានមានប្រសាសន៍អំពីហានិភ័យចំពោះសុខភាពអ្នកដែលទទួលទានភេសជ្ជៈផ្អែមថា មនុស្សចាស់ដែលទទួលទានភេសជ្ជៈផ្អែមក្នុង ១ ថ្ងៃ ១ កំប៉ុង ឬ លើសពី ១ កំប៉ុង ចំណែកកុមារក្រោមអាយុក្រោម ១២ ឆ្នាំ ទទួលទានភេសជ្ជៈផ្អែមក្នុង ១ ថ្ងៃលើសពីកន្លះកំប៉ុង ដែលមានចំណុះ ៣៣០ មិលី្លលីត្រ អាចប្រឈមមុខខ្ពស់នឹងហានិភ័យនាំឱ្យមានបញ្ហាធ្ងន់ធ្ងរដល់សុខភាព ដូចជានាំឱ្យមានជំងឺធាត់ លើសគីឡូ ពុកធ្មេញ ឬ ដង្កូវស៊ីធ្មេញ ហើយកាន់តែអាក្រក់ទៀតនោះ គឺនៅរយៈពេលយូរឆ្នាំបន្តិចទៅ វានឹងនាំឱ្យគេកើតជំងឺទឹកនោមផ្អែម ហើយកាលណាមានជំងឺទឹកនោមផ្អែម វានឹងនាំមកជាមួយនូវជំងឺកាចៗដទៃទៀត ដូចជាជំងឺសរសៃឈាម ជំងឺបេះដូង អាចឲ្យគាំងបេះដូង ឲ្យស្លាប់មួយចំហៀងខ្លួន និងជំងឺមហារីក ជាដើម ។
លោកវេជ្ជបណ្ឌិត ងី មានហេង ធ្លាប់ត្រូវបានសារព័ត៌មានក្នុងស្រុកដកស្រង់ប្រសាសន៍ថា ផលប៉ះពាល់សុខភាពកើតលើប្រជាជនកម្ពុជាអាយុ ២៥ ទៅ ៦៤ ឆ្នាំ ចាប់ពីឆ្នាំ ២០១០ ដល់ ២០១៦ គឺប្រេវ៉ាឡង់នៃអ្នកលើសទម្ងន់ ឬធាត់ កើតពី ១៥,៤ ភាគ ទៅ ២១,៩ ភាគរយ ហើយប្រេវ៉ាឡង់ នៃអ្នកមានជាតិស្ករលើសក្នុងឈាម កើនពី ១,៤ ភាគរយ ទៅ ៩,៦ ភាគរយ និយាយជារួម ។ ដោយឡែក ចំពោះកុមារនៅភ្នំពេញ ពួកគេទទួលស្ករច្រើនណាស់ ដោយតាមការអង្កេតសុខភាព លើសិស្សកម្ពុជា ក្នុងឆ្នាំ ២០១៣ មាន ៤២ ភាគរយ នៃសិស្សទទួលទានភេសជ្ជៈផ្អែម មួយ ឬច្រើនកំប៉ុងក្នុងមួយថ្ងៃ ។
ការលើកឡើងមកនេះ គឺជាករណីមួយដែលបង្កក្តីបារម្ភយ៉ាងខ្លាំងចំពោះបញ្ហាសុខភាពរបស់ប្រជាជនខ្មែរ ជាពិសេសចំពោះប្រភេទមនុស្ស ដែលពេលនេះ គឺជាកុមារ ហើយប៉ុន្មានឆ្នាំខាងមុខនេះពួកគេត្រូវក្លាយជាម្ចាស់ប្រទេស ទទួលខុសត្រូវចំពោះប្រទេសជាតិ ។
ហេតុនេះ លោកវេជ្ជបណ្ឌិត ងី មានហេង បានផ្តល់អនុសាសន៍ថា សូមកាត់បន្ថយបន្ដិចម្ដងៗដោយសម្រាប់មនុស្សចាស់ ក្នុងមួយថ្ងៃពិសាភេសជ្ជៈផ្អែម តិចជាងមួយកំប៉ុង, សម្រាប់ក្មេងក្រោមអាយុ១២ឆ្នាំ គឺតិចជាងកន្លះកំប៉ុង ដែលមានចំណុះ៣៣០ មិលី្លលីត្រ ក្នុងមួយថ្ងៃ ។ ចំនួននៅសល់ សូមកុំសោកស្តាយ ចូរចាក់វាចោលចុះ ព្រោះថាតម្លៃដែលយើងចាក់ចោលនោះមិនថ្លៃទេ ប៉ុន្តែបើយើងឈឺ វានឹងធ្វើឱ្យយើងចំណាយថវិកាអស់ច្រើន ហើយអាចគ្រោះថ្នាក់ជីវិតថែមទៀត ហើយនៅពេលដែលម្ចាស់ប្រទេសមានបញ្ហាសុខភាពបែបនេះ ប្រាកដណាស់ប្រទេសជាតិក៏ប្រាកដជាមិនអាចរឹងមាំខ្លាំងក្លាបានឡើយ ។
ក្រសួងសុខាភិបាល បានណែនាំផងដែរថា ដើម្បីសុខភាព កាត់បន្ថយការប្រើប្រាស់ជាតិផ្អែម បង្កើនលំហាត់ប្រាណ ជម្រើសល្អដើម្បីសុខភាព ហូបទឹកស្អាត ទឹកដាំពុះ ឬភេសជ្ជៈ ដែលមិនមានជាតិផ្អែម បើអ្នកផឹកភេសជ្ជៈផ្អែម មានហ្គាស ចំណុះ៣៣០មិលី្លលីត្រ អ្នកត្រូវដើរចម្ងាយផ្លូវប្រហែល ៣ គីឡូម៉ែត្រ ដើម្បីដុតបំផ្លាតថាមពល ១៣៥ កាឡូរី ពីភេសជ្ជៈដែលអ្នកបានផឹកនោះ ។
ដោយសារបញ្ហាទាំងអស់នេះមានការកើនឡើងពីមួយថ្ងៃទៅមួយ ទើបក្រសួងសុខាភិបាល ក្រសួងអប់រំ និងដៃគូពាក់ព័ន្ធ រួមគ្នាបើកយុទ្ធនាការបញ្ជ្រាបចំណេះដឹង ជូនប្រជាពលរដ្ឋ អំពីគ្រោះថ្នាក់ នៃភេសជ្ជៈផ្អែម ដើម្បី ឲ្យសាធារណជនកាត់បន្ថយការពិសាភេសជ្ជៈផ្អែម ដោយបានបើកយុទ្ធនាការចាប់ពីថ្ងៃទី៣០ ខែវិច្ឆិកាឆ្នាំ២០១៨ រហូតមកដល់សព្វថ្ងៃនេះ ៕ Kh/Ha
