ត្រាក់ទ័រ​៤​គ្រឿង​ត្រូវ​ចាប់ ជនជាតិ​វៀតណាម​៥​នាក់​ត្រូវ​បណ្តេញ​ចេញទៅ​ប្រទេស​កំណើត​វិញ​

272
ចែករម្លែក

ដោយ​: សាត​ចាន់​បុត្រ / មណ្ឌលគិរី​: ត្រាក់ទ័រ​ឈូស​ដី​ចំនួន​៤​គ្រឿង ដែល​គេ​សង្ស័យថា ពុំមាន​ឯកសារ​ចូលមក​ប្រទេស​កម្ពុជា រួមទាំង​បំណង​ឈូសឆាយ​ដីព្រៃ ត្រូវបាន​នគរបាល​កា​ពារ​ព្រំដែន​នៃ​វរៈ​៦២១​ឃាត់ទុក កាលពី​ថ្ងៃទី​២៥​ខែកុម្ភៈ​ឆ្នាំ​២០២០ ចំណុច​ជិត​ប៉ុស្តិ៍​កង់​រ៉ូ​គង់ នា​ស្រុក​អូ​រាំង ខេត្តមណ្ឌលគិរី​។​

​សហគមន៍​ជនជាតិដើម​ឃុំ​ដាក់​ដាំ​ថា គេ​បានឃើញ​គ្រឿងចក្រ​ចំនួន​៤​គ្រឿង ឡាន​២​គ្រឿង រួមទាំង​ជនជាតិ​វៀតណាម​៦​នាក់ បាន​លួច​ចូលមក​ទឹកដី​សហគមន៍​សមូហភាព ជនជាតិដើម ភូមិ​ពូ​ឡេះ ឃុំ​ដាក់​ដាំ ជិត​ប៉ុស្តិ៍​កង់​រ៉ូ​ឡង់ ដោយ​គ្មាន​មូលហេតុ​និង​ច្បាប់​ត្រឹមត្រូវ តែ​ត្រូវ​សហគមន៍​តាម​ទាន់​។​

​សហគមន៍​បន្តថា ក្រុម​នេះ​បញ្ជាក់ថា មាន​អ្នកមានអំណាច​(​ឧកញ៉ា​ដែល​ពូកែ​ទិញ​ដី​ក្នុង​ឃុំ​ដាក់​ដាំ​)​ជា​អ្នក​អោយ​គ្រឿងចក្រ​មក ដើម្បី​ឈូស​ដីព្រៃ​តំបន់​កា​ពារ​ទីនោះ​។​

​សហគមន៍​បញ្ជាក់ថា ដោយសារ​មានការ​ជម្រុញ​ពី​សហគមន៍​ខ្លាំងពេក ទើប​មាន​ក្រុមប៉ូលិស​ចំនួន​៣​ឡាន ចិះ​មក​ធ្វើ​អន្តរាគមន៍ និង​ធ្វើការ​ឃាត់ទុក​នៅ​ប៉ុស្តិ៍​កង់​រ៉ូ​ឡង់​។​

​ករណីនេះ ឧ​ត្ត​ម​សេនីយ៍​ទោ ឡោ សុខា ស្នងការ​នគរបាល​ខេត្តមណ្ឌលគិរី បាន​ប្រាប់​អ្នកកាសែត​ថា ជនជាតិ​វៀតណាម​ទាំង​៥​នាក់​នឹងត្រូវ​ប​ញ្ដេ​ញ​ចេញ​ទៅវិញ ពីព្រោះ​ពួកគាត់​មាន​លិខិតឆ្លងដែន​ត្រឹមត្រូវ​។ ចំណែក​គ្រឿងចក្រ​ចំនួន​៤​គ្រឿង សមត្ថកិច្ច​ជំនាញ និង​ធ្វើការ​ត្រួតពិនិត្យ​លើ​ឯកសារ​ពាក់ព័ន្ធ រួច​និង​ធ្វើការ​ប្រគល់​ឲ្យ​មន្ត្រី​គយ​ចាត់ការ​បន្ត​។​

​លោកស្នងការ​បានឱ្យដឹង​ទៀតថា គ្រឿងចក្រ​នេះ ត្រូវបាន​គេ​ចល័ត​មក​ពី​ខេត្តរតនៈគិរី ចំណែក​ជនជាតិ​វៀតណាម​ខាងលើ ក៏​ឆ្លង់ដែន​ចូល​ទឹកដី​កម្ពុជា​តាម​ច្រកព្រំដែន​ក្នុង​ខេត្តរតនៈគិរី​ផងដែរ​។ គ្រឿងចក្រ​ទាំងនេះ ត្រូវបាន​គេ យកមក​បម្រុង​មក​ធ្វើ​សកម្មភាព​វាយ​ព្រៃ​ឲ្យ​ក្រុមហ៊ុន មី​ហ្គា​ហ្វើ​ស ទាំង​មិនទាន់មាន​ការអនុញ្ញាត​ពី​អាជ្ញាធរ និង​មន្ត្រី​ជំនាញ​។​

​ប្រធាន​មន្ទីរ​កសិកម្ម​លោក សុង ឃាង នា​ព្រឹក​ថ្ងៃទី​២៦​កុម្ភៈ​នេះ ពុំ​អាច​ស្វែងរក​ការបញ្ជាក់​បាន​នោះទេ ខណៈ​ប្រព័ន្ធ​ទូរ​សព្ទ​ទាក់ទង​ពុំបាន​។​

​ករណី​ស្រដៀង​គ្នា រឿង​ឈូស​កាប់​ព្រៃឈើ​នោះ លោក កែវ សុភ​ក៌ ប្រធាន​មន្ទីរ​បរិស្ថាន​ខេត្តមណ្ឌលគិរី បានឱ្យដឹង​ផងដែរ​ថា មន្ត្រី​ឧ​ទ្យា​នុ​រក្ស​ដែនជម្រកសត្វព្រៃ​សីមា មន្ត្រី​កងរាជអាវុធហត្ថ​លើ​ផ្ឌៃ​ប្រទេស និង​មន្ត្រីនគរបាល​នៃ​ស្នងការដ្ឋាន ខេត្ត មណ្ឌលគិរី បានធ្វើការ​ចាប់ខ្លួន​ជនសង្ស័យ​ម្នាក់ ដែល​ចូលមក​កាប់​រាន​ដីព្រៃ​យក​ជា​កម្មសិទ្ធិ ចំណុច​ភ្នំ​ស្រឡៅ ក្នុងស្រុក​អូ​រាំង កាលពី​ថ្ងៃទី​២៥​កុម្ភៈ​។​

​លោក កែវ សុភ​គ៌ បន្ថែមថា ជនសង្ស័យ មានឈ្មោះ សុខ ជា ភេទ​ប្រុស អាយុ ២២​ឆ្នាំ ជនជាតិ​ព្នង រស់នៅ​ភូមិ​ពូ​ត្រែង ឃុំ ដាក់​ដាំ​ស្រុក​អូររាំង ខេត្តមណ្ឌលគិរី​។​
​ក្នុងនោះ​សមត្ថកិច្ច ក៌​បាន​ដកហូត​វត្ថុតាង​រួមមាន​៖ រណា​យន្ត​ចំនួន​១​គ្រឿង កាំបិត​ចំនួន ០១​ដើម​។ បច្ចុប្បន្ន ជនសង្ស័យ​ត្រូវបាន​បញ្ជូនមក​មន្ទីរ​បរិស្ថាន​ខេត្ត​មណ្ឌល​គី​រី ដើម្បី​កសាង​សំណុំរឿង​ទៅតាម​នីតិវីធី​ច្បាប់​៕ ល​

ទីតាំងផ្សាយពាណិជ្ជកម្ម