កីឡាករ អូលីវើ ហ្សីរូ (Oliver Giroud) ស័ក្តិសមនឹងទទួលបានការគោរពចំពោះឥរិយាបថ របស់កីឡាកររូបនេះ បន្ទាប់ពីប្រឹងប្រែងសម្របខ្លួននឹងផែនការរបស់គ្រូបង្វឹក ហ្វ្រែង ឡាំផាត (Frank Lampard) ក្រោយពីខកខានមិនបានផ្ទេរចេញកាលពីខែមករា នេះបើតាមការអះអាង របស់ខ្សែការពារ អែនតូនីញ៉ូ រូឌីជើ (Antonio Rudiger) ។
ហ្ស៊ីរូ មិនបានបង្ហាញមុខសូម្បីមួយលើកសម្រាប់ក្រុមឆេលស៊ីរវាងថ្ងៃទី ៣០ ខែវិច្ឆិកាដល់ ថ្ងៃទី១៧ខែកុម្ភៈ ខណៈកីឡាកររូបនេះត្រៀមចាកចេញពីក្លឹបនេះ។
បើទោះបីមានការចរចាជាមួយក្លឹបដូចជា Inter Milan ក៏ដោយក៏កិច្ចព្រមព្រៀងផ្ទេរមិនបានលេចចេញជាផ្លែផ្កាដែរ ហើយកីឡាកររូបនេះហាក់ដូចជាគ្មានអនាគតនៅពហុកីឡាដ្ឋាន Stamford Bridge ។
ប៉ុន្តែកីឡាករវ័យ៣៣ឆ្នាំរូបនេះបានដាក់ចិត្តដាក់កាយហើយប្រឹងប្រែងស្តាទម្រង់លេងរបស់ខ្លួនឡើងវិញ ដោយត្រូវបានប្តូរចូល អំឡុងពេលប្រកួតចាញ់ក្រុមម៉េនឆេស្ទ័រ យូណាយធីត ២-០ មុនពេលរកបានគ្រាប់បាល់លើក្រុម Tottenham កាលពីថ្ងៃសៅរ៍បន្ទាប់ពីត្រូវបានផ្តល់ឱកាស បង្ហាញមុខលើកដំបូងចាប់តាំងពីខែវិច្ឆិកា។
រូឌីជើ ជឿជាក់ថា គ្រប់គ្នាត្រូវតែទទួលស្គាល់សីលធម៌របស់មិត្តរួមក្រុមម្នាក់នេះ។ រូជីជើ និយាយថា “ខ្ញុំគោរពគាត់ខ្លាំងមែនទែន។ គាត់តែងតែមានការអត់ធ្មត់។ គាត់មិនដែល និយាយអ្វីនោះទេ បើទោះបីជាកិច្ចព្រមព្រៀងផ្ទេរមិនបានជោគជ័យក៏ដោយ។ គាត់នៅស្ងប់ស្ងាត់និងប្រឹងប្រែងហ្វឹកហាត់”។
ក្រុមឆេលស៊ីកំពុងធ្វើសកម្មភាពនៅក្របខណ្ឌឆេមពានលីកវគ្គ១៦ក្រុមចុងក្រោយ។ ចាំមើលថា តើក្រុមនេះអាចឆ្លងទៅវគ្គបន្តបានឬទេ៕ ប្រែសម្រួល: ពិសិដ្ឋ
